«Adhetul ličycie jaho vostravam». Chto i jak pravodzić apieracyju «adsiačeńnia» Kryma
Ukrainskija vajskoŭcy na pačatku červienia ździejśnili sieryju ŭdaraŭ pa mastavych pierachodach, jakija viaduć z akupavanaha rasijanami Kryma na maciaryk. Heta istotna ŭskładniła łahistyku armii Rasii na poŭdni. Ździejśniła hetuju apieracyju absalutna novaje padraździaleńnie, infarmacyja pra jakoje doŭhi čas była zasakrečanaja, piša Ukrainskaja słužba Bi-bi-si.
Dla ŭdaraŭ ukrainskija siły ŭpieršyniu vykarystali middle-strike BPŁA ajčynnaj vytvorčaści. U papiarednija hady dla źniščeńnia mastavych pralotaŭ USU vykarystoŭvali zachodnija kryłatyja rakiety Storm Shadow i bojeprypasy reaktyŭnych sistem HIMARS.
Ciapier ataki na klučavyja krymskija masty — kala Čanhara i Armianska — byli zroblenyja ŭkrainskimi bieśpiłotnikami FP-2 i «Biehiemot» (imi bili tolki pa Čanhary), jakija zdolnyja nieści 75‑100 kh bajavoj častki na adlehłaść da 300 km.
Udary pa Čanhary byli ździejśnienyja ŭ noč z 6 na 7 červienia, a taksama paŭtorna — u noč na 9 červienia. Masty kala Armianska byli atakavanyja 11 červienia.
Taksama 8 červienia pad udaram byŭ most, jaki viadzie z Hieničeska da Arabackaj strełki.
Usie jany istotna paškodžanyja, što publična pryznali akupacyjnyja ŭłady Chiersonščyny, i patrabujuć ramontu. Ruch na ich spynili. Rasijanie apieratyŭna sprabujuć naładzić pantonnyja pierapravy.
Hetuju kampaniju «adsiačeńnia» Kryma arhanizavała i praviała absalutna novaja struktura va USU, pra jakuju dahetul minimum infarmacyi.
Havorka pra centr multydamiennych apieracyj «Fałanha».
Što takoje «Fałanha»
Hetuju strukturu viasnoj 2026 hoda ŭtvaryli rašeńniem ukrainskaha Minabarony, abjadnaŭšy siły dvuch mahutnych šturmavych padraździaleńniaŭ: Pieršaha asobnaha šturmavoha pałka imia Dźmitryja Kacubajły i 475‑ha Asobnaha šturmavoha pałka Code 9.2.
Jany jašče ŭ 2022 hodzie byli stvoranyja na asnovie dobraachvotnickich padraździaleńniaŭ, chutka maštabavalisia i arhanizavali sposab efiektyŭnaha spałučeńnia dronavych i šturmavych dziejańniaŭ na froncie.
Abodva pałki prajšli słaŭny bajavy šlach, naprykład, 1 AŠP viadomy bajami pad Pakroŭskam, a 475 AŠP — udziełam u apieracyi pa vyzvaleńni Kupianska naprykancy 2025 hoda.
Uznačalvajuć padraździaleńni dva Hieroi Ukrainy — major Dźmitryj Fiłataŭ (pazyŭny «Piarun») kamanduje 1 AŠP, a major Alaksandr Naścienka (pazyŭny «Flint») — 475 AŠP.
Multydamienny centr atrymaŭ svaju nazvu ad bajavoha paradku piachoty ŭ Staražytnaj Hrecyi. Asnoŭnaj zbrojaj pieršaha šerahu vajaroŭ u fałanzie była doŭhaja dzida (daŭžynia 4‑7 mietraŭ). Spałučeńnie hetaj zbroi i pabudovy stroju davała značnyja pieravahi armii Alaksandra Makiedonskaha.
Ułasna, adsiul i łohika najmieńnia ŭkrainskaj navacyi, tłumačyć u intervju Ukrainskaj słužby Bi-bi-si kamandzir Alaksandr Naścienka.
Sens u tym, što ŭkrainskija šturmaviki ŭpieršyniu atrymali svaju «doŭhuju dzidu» — udarnyja middle-strike bieśpiłotniki, pieravažna FP-2. Raniej jany mieli tolki drony blizkaha radyusa dziejańnia.
«Doŭhuju dzidu prydumaŭ nie Alaksandr Makiedonski, ale mienavita jon zmoh zbudavać na hetym niepieramožny bajavy paradak», — adznačaje «Flint».
«Midł-strajki» piachotnikaŭ faktyčna zamianili taktyčnuju avijacyju na froncie, dadaje jon.
Pavodle jaho słoŭ, niekatoryja mahutnyja ŭmacavańni rasijan možna razburyć tolki mahutnymi avijabombami, ale kožny vylet ukrainskaha bambavika źjaŭlajecca nadzvyčaj ryzykoŭnym, pakolki heta pryjarytetnaja cel dla Rasii.
Akramia taho, ukrainskaja avijacyja zaraz pieravažna pryciahnutaja nie dla padtrymki vojskaŭ na piarednim krai, a dla vykanańnia funkcyj SPA ŭ tyle.
Uzbrajeńnie šturmavych pałkoŭ dalnabojnymi dronami taksama značna paskoryła čas na płanavańnie i praviadzieńnie apieracyj.
Kali zapyt na padtrymku avijacyi moh razhladacca tydniami, to ciapier apieracyja z paražeńniem dronami rasijskich pazicyj na siaredniaj dystancyi (100‑300 km) zajmaje ŭsiaho niekalki hadzin.
«Taja reaktyŭnaść, jakuju my atrymali, jana časam maje vyrašalnaje značeńnie na poli boju. Mnie ciapier nie treba šukać, chto adpracuje pa hetaj celi. Ja mahu sam uziać i adpracavać», — kaža kamandzir 475 AŠP.
Imklivaje pavieličeńnie dalnabojnaści šturmavych padraździaleńniaŭ adpaviadaje łohicy hetaj vajny.
Čym bolšaj stanovicca «kił-zona», jakaja zaraz składaje kala 20 km, tym mienš u joj i pobač ź joj celaŭ dla paražeńnia. Tamu padraździaleńni piaredniaha kraju, a tym bolš tyja, jakija majuć raźvituju bieśpiłotnuju častku, prosta vymušanyja šukać sabie celi za dziasiatki, a to i sotni kiłamietraŭ ad ŁBS (linii bajavoha sudakranańnia).
Tamu viasnoj hetaha hoda ŭźnikła ideja źvieści ŭ adziny centr padraździaleńni płanavańnia, raźviedki i praviadzieńnia takich apieracyj ź niekalkich šturmavych pałkoŭ.
Tak i źjaviłasia «Fałanha».
Naścienka padkreślivaje, što asnoŭnaja zadača centra — raźviedka i płanavańnie. Jon taksama analizuje pole boju i efiekt ad naniesienych udaraŭ. U zaležnaści ad hetaha nadalej užo płanujecca praviadzieńnie šturmavych mierapryjemstvaŭ «na ziamli», to-bok niepasredna ŭ zonie adkaznaści padraździaleńnia.
U zaležnaści ad paśpiachovaści i efiektyŭnaści pracy «Fałanhi» hety dośvied Minabarony ŭ budučyni płanuje maštabavać na inšyja vajskovyja čaści.
«Centr multydamiennych apieracyj «Fałanha» ŭžo pakazvaje vielmi dobry vynik. Jon byŭ stvorany mienavita dla płanavańnia i realizacyi paśpiachovych šturmavych dziejańniaŭ. Nie dla inšych metaŭ. Heta nie kaardynacyjny centr Sił bieśpiłotnych sistem, heta nie kaardynacyjny centr ahniavoha paražeńnia. Heta mienavita centr, jaki płanuje naziemnyja šturmavyja apieracyi», — tłumačyć jon.
Zaraz abodva nazvanyja vyšej šturmavyja pałki vajujuć na hulajpolskim kirunku i sprabujuć strymać prasoŭvańnie ŭ bok Zaparožža amal 100‑tysiačnaj armii rasijskaj hrupoŭki «Uschod».
Ułasna, mienavita z hetaj metaj i było pryniata rašeńnie atakavać krymskija masty.
Udary pa mastach Kryma
Jak płanavałasia apieracyja?
Kibierraźviedka centra «Fałanha» vyjaviła, što rasijskaja armija źmianiła maršrut dla padvozu paliva na hulajpolski kirunak, kaža Alaksandr Naścienka.
Raniej jon išoŭ z Tahanroha pa trasie na Maryupal. Ale naprykancy viasny ŭkrainskija vajskoŭcy zmahli ŭziać hetuju trasu pad ahniavy kantrol i źniščyli sotni adzinak transpartu US RF, u tym liku i bienzavozaŭ.
Tamu rasijskaje kamandavańnie vyrašyła nakiravać ich u abychod — praz Krym.
Ukrainskaja kibierraźviedka pierachapiła hetuju infarmacyju.
«My atrymali infarmacyju, što rychtujecca vielmi vialikaja kałona RF. Na praciahu karotkaha pramiežku času — kala 6 hadzin — było pryniata rašeńnie ŭdaryć pa Čanharskim moście dla taho, kab hetaja kałona nie prajšła. Heta było pozna ŭnačy z 6 na 7 červienia. My niedastatkova paškodzili hety most, i praź dzień my znoŭ pa im udaryli», — raskazvaje «Flint».
Zabłakavaŭšy adzin mastavy pierachod, bajcy «Fałanhi» adrazu raspačali padrychtoŭku ŭdaraŭ pa tych mastach, što zastalisia na pierahonie Armiansk — Pierakop.
Kibierraźviedka pierachapiła infarmacyju, što adzin z kamandziraŭ bryhad RF skazaŭ svaim padnačalenym: sprabujcie prajechać praz Armiansk.
Centr «Fałanha» pryniaŭ rašeńnie nanieści ŭdar u hetym rajonie: atakavać adzin most u Armiansku i dva abjaznyja praz kanał. Kałona RF jakraz stajała na hetym učastku ŭ čakańni prajezdu.
«Usie try masty byli vielmi mocna paškodžanyja i technika była źniščana. Heta była vialikaja kałona techniki RF», — zaŭvažyŭ Naścienka.
Kamandzir 1 AŠP Dźmitryj Fiłataŭ kazaŭ, što ŭ hetaj kałonie było kala 50 mašyn, u tym liku i bienzavozaŭ. Častka ź ich trapiła pad udar.
Na apublikavanych pres-słužbaj pałka videa možna zaŭvažyć, što drony FP-2 atakujuć hruzavik, jaki staić u čarzie pierad mostam. U čarzie vidać jak minimum 10 mašyn.
Jaki vynik apieracyi?
Pavodle słoŭ kamandzira Naścienki, łahistyka ŭ Krym užo «razburana».
«Transpartnaha kalidora ŭ Krym z macieryka bolš niama. My vypisali «sankcyju na śmiarotnaje pakarańnie». Naniosšy ŭdary pa mastach, my desakralizavali hety abjekt. Toje, što ŭsie masty buduć dabityja — u mianie sumnievaŭ niama. Heta budzie sistematyčnaja praca 100%. Adhetul možna ličyć Krym vostravam. Niachaj rasijanie kuplajuć łodki, kab pierabiracca na maciaryk», — zajaviŭ jon.
Pavodle jaho słoŭ, vykarystańnie rasijanami pantonnych pierapraŭ zamiest mastoŭ «palehčyć» pracu dla Sił abarony.
«Zadačy całkam źniščyć masty ŭ nas nie było. U pryncypie nas zadavalniaje biahučaja situacyja. Paškodžanyja masty — heta abmiežavany ruch. Kali jany kidajuć pantony, to heta nie daje takoj samaj prapusknoj zdolnaści, jak stacyjanarny most. Tam tolki reviersny ruch: adna pałasa jedzie, inšaja — staić. I tak ceły dzień. Stvarajucca vielizarnyja «chvasty» z mašyn, łahistyka łamajecca».
Na dumku kamandzira pałka, užo najbližejšym časam rasijskija padraździaleńni na Zaparožžy adčujuć istotnyja prablemy ad parušanaj łahistyki.
Jon pryvioŭ danyja pierachopaŭ pra rost deficytu paliva ŭ rasijskich bryhadach hrupoŭki «Uschod».
«Ja vam skažu: heta prosta katastrofa. Toj abjom paliva, jaki raźmiarkoŭvajecca na ŭsie bryhady hrupoŭki, nastolki mały, što ŭ nas tolki adzin połk stolki «prahłynaje». To-bok u ich situacyja pa palivie vielmi-vielmi drennaja», — kaža Naścienka.
Pavodle jaho słoŭ, rasijanie nie spyniajuć sprob pravieźci bienzavozy z Kryma na maciaryk. Jany ich maskirujuć pad cyvilny transpart, naprykład, abšyvajuć drevam.
Kali ŭdasca trymać łahistyku RF zabłakavanaj «praciahły čas», to možna čakać źjaŭleńnia mahčymaściaŭ dla «paśpiachovych dziejańniaŭ» USU na froncie, kaža Alaksandr Naścienka, adnačasova nie raskryvajučy, što jon maje na ŭvazie pad frazaj «paśpiachovyja dziejańni».
«Ci liču ja, što ŭ nas składajucca pieradumovy dla peŭnych paśpiachovych dziejańniaŭ na froncie? Tak, liču. Ale davajcie nie budziem zabiahać napierad. Usio tolki pačynajecca. Ja dumaju, što z pavieličeńniem abjomaŭ pastupleńnia da nas srodkaŭ budzie ŭsio bolš i bolš paražeńniaŭ».
Kamientary