Zialenski patroliŭ Pucina raźvieddanymi pra padzieńnie rejtynhu rasijskaha kiraŭnika i rost pratesnych nastrojaŭ u RF
Prezident Ukrainy Uładzimir Zialenski apublikavaŭ post pa vynikach dakładaŭ ukrainskich śpiecsłužbaŭ. Pavodle jaho słoŭ, ukrainskaja raźviedka atrymała dostup da dakumientaŭ, jakija traplajuć na stoł kiraŭniku Kramla i jakija śviedčać pra surjozny ŭnutrany kryzis u Rasii pierad vosieńskimi vybarami.
Pavodle słoŭ ukrainskaha lidara, dadzienyja byli zdabyty dziakujučy sumiesnaj pracy ŭkrainskaj raźviedki i siabroŭ Ukrainy. Jon adznačyŭ, što rasijskamu dyktataru redka prynosiać praŭdu «biez upryhažeńniaŭ», ale navat aficyjnyja spravazdačy rasijskich viedamstvaŭ užo fiksujuć tryvožnyja dla Kramla trendy.
Hałoŭnaja vysnova z dakumientaŭ, jakuju ahučyŭ prezident Ukrainy, tyčycca rezkaha rostu sacyjalnaj napružanaści ŭ RF pierad zapłanavanymi na vierasień vybarami ŭ rasijski parłamient.
«Asabliva, tak zvanyja prahnoznyja pakazčyki niezadavolenaści rasijan Pucinym buduć praciahvać niaŭchilna raści, i jaho ŭžo ciapier pačali pryvučać da dumki, što rost niezadavolenaści nie ŭdasca spynić i hety pakazčyk «nie vyjdzie na płato» da vieraśnia…» — zajaviŭ Zialenski.
Z apublikavanych hrafikaŭ i spravazdač vynikaje, što ŭ Rasii adbyvajecca «erozija Danbaskaha kansiensusu», a niezadavolenaść rasijan budzie niaŭchilna raści. Zhodna z dakumientam, da vieraśnia ŭzrovień adabreńnia dziejnaści Pucina ŭpadzie da 55%, a ŭzrovień nieadabreńnia vyraście da 33%.
Pry hetym fiksujecca i ŭstojlivaja tendencyja da padzieńnia rejtynhaŭ rasijskaj kirujučaj partyi, što, pavodle słoŭ ukrainskaha lidara, «aznačaje nieabchodnaść značna bolšych falsifikacyj».
Taksama raźviedka dakładvaje pra istotny rost pratestnych nastrojaŭ mienavita ŭ rasijskich rehijonach.
Zialenski padkreśliŭ, što hetyja rasijskija spravazdačy jašče nie ŭličvajuć budučyja padziei leta, imavierna, namiakajučy na ŭkrainskija apieracyi: «Ličym, što ŭ hetych spravazdačach jašče nie ŭličany patencyjnyja padziei červienia, lipienia i žniŭnia, jakija nie mohuć nie paŭpłyvać na situacyju ŭ Rasii dadatkova».
Prezident Ukrainy padkreśliŭ, što na ŭsie publičnyja i tajemnyja mirnyja inicyjatyvy Kreml pakul adkazvaje praciaham vajny. Adnak, na dumku Zialenskaha, unutranaja situacyja ŭ samoj Rasii pavinna pierakanać Maskvu ŭ advarotnym.
Ukraina pa-raniejšamu prapanuje damaŭlacca pra «hodny mir», ale kali Kreml budzie ihnaravać realnaść, Zialenski prahnazuje źmienu ŭłady ŭ RF.
«Vidavočna, tendencyi nie źmieniacca, i z časam heta moža aznačać, što pahadnieńnie daviadziecca zaklučać užo z kimści inšym z Rasii — z tym, chto nie budzie zakryvacca ad realnaści», — padahulniŭ Uładzimir Zialenski.
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka6
Kamientary