«Saŭdepaŭski adpačynak pa košcie piaci zorak u Turcyi». Biełaruska vyklikała dyskusiju, raskrytykavaŭšy sanatoryj na Naračy
Karystalnica Threads pad nikam versache_guci adpačyła ŭ biełaruskim sanatoryi na Naračy i była rasčaravanaja. Trochdzionny adpačynak siamji ź dziciom abyšoŭsia amal tysiaču dalaraŭ, i jana ličyć, što takich hrošaj heta nie kaštuje. Adkazali žančynie i sam sanatoryj, i inšyja karystalniki, piša «Salidarnaść».
Usie fota apublikavanyja akaŭntam sanatoryja ŭ Tredsie
«Kali vy chočacie saŭdepaŭski adpačynak pa košcie 5* u Turcyi, ź ježaj, jak u zavodskaj stałoŭcy, i z budoŭlaj pad voknami, vam siudy, — napisała niezadavolenaja karystalnica. — Amal 1000$ za dvuch darosłych i dzicia 4‑ch hadoŭ, na 3 nočy. Uklučana: basiejn 1,5 hadziny i trochrazovaje charčavańnie ź minimalnym vybaram narmalnaj ježy. Poŭnaje rasčaravańnie. Sanatoryj «Pryaziorny».
U kamientarach niekatoryja biełarusy nie padzialili jaje mierkavańnie:
«Nie raskazvajcie kazak. Ježa tam vydatnaja. I sanatoryj najvyšejšaha kłasa».
«Adpačyvaju tam štohod šeść hadoŭ zapar. Usio zadavalniaje. U hetym hodzie pa charčavańni sapraŭdy ŭźnikli pytańni asabista ŭ mianie i ŭ inšych turystaŭ. I «Plisa» zdała pazicyi pa charčavańni, i navat «Alfa Radon». Ale tut niejkija bolš hłybokija pracesy (sačycie za situacyjaj u śviecie). Ale nakont stałoŭki — zahnuli, heta nie tak. Servis — top, terytoryja — top».
Ludzi pišuć pra pryjazny piersanał, biaspłatnuju parkoŭku pry zajeździe, dahledžanuju terytoryju.
«Nakont budoŭli — sanatoryj pracuje kruhły hod, i heta zdorava, što jany nie spyniajucca i palapšajucca. Uletku dla dziaciej stolki zabaŭlalnych prahram. Taksama ŭletku dla dziaciej jość azdaraŭlenčaja prahrama z cudoŭnymi pracedurami! U prakacie možna ŭziać ledź nie ŭsie vidy transpartu. Restaran na bierazie — kajf!»
Znajšlisia, praŭda, i krytyki.
«315$ z čałavieka za sutki… Jany z hłuzdu źjechali? Raniej jeździli, padabałasia. Ale zaraz ceńnik za trochrazovaje charčavańnie i basiejn malusieńki — heta pierabor. A kali dabudujuć adkryty basiejn, košt budzie 500$ na čałavieka?»
«Jak dobra, što ni razu nie ŭhavaryli mianie pajechać u našy sanatoryi z saŭkovym servisam. Dy jašče ŭsie skoki nadvorja ŭ nas u apošnija hady, kamary. A ŭ Turcyi dobra za takija hrošy. I mora ciopłaje, i piasočak haračańki».
«Ja b z zadavalnieńniem akunułasia ŭ Saŭdepiju, ale nie za tysiaču baksaŭ, kaniešnie».
«Na Kanarach, ź pieralotam, u cudoŭnym hateli adpačyŭ tańniej».
Sanatoryj: «My nie sprabujem kapijavać all inclusive hatelaŭ Turcyi»
Adhuknuŭsia ŭ kamientarach i sam sanatoryj. Ad jaho imia vykazali škadavańnie, što adpačynak nie apraŭdaŭ čakańniaŭ.
«Vy absalutna majecie racyju ŭ nastupnym: my nie sprabujem kapijavać all inclusive hatelaŭ Turcyi. Heta pryncypova roznyja pradukty».
Sanatoryj patłumačyŭ, što viadzie płanavuju renavacyju i sapraŭdy jość šumnaja budoŭla, i prynios prabačeńni, «kali ŭpuścili hety momant pry braniravańni puciovak».
Adnosna charčavańnia reakcyja była takoj:
«Našy hości pryjazdžajuć z hastrytami, pankreatytami, paśla apieracyj — pahadziciesia, u sanatoryi važnaje nie tolki asarci, a jakaść i dyjetyčnaja biaśpieka. Pry hetym u nas zaŭsiody jość pryvabny vybar: ryba/miasa/ptuška, harodnina, śviežaje zialeniva, supy, kašy, kampoty, sadavina, vypiečka».
A što tyčycca koštu, to ŭ sanatoryi adznačyli, što
«heta vielmi dalikatnaja tema: vy albo zhadžajeciesia ź im, albo vybirajecie bolš adpaviedny dachodam uzrovień (vybar sanatoryjaŭ u Biełarusi vialiki)».
«Sumny horad, pra jaki pryniata dobra kazać». Rasijanka raskrytykavała Minsk — biełarusy joj iranična padziakavali
«Cukierki ŭ šakaładze, b**dź!» Rasijskaja błohierka-miljońnica naviedała Biełaruś i vyśmiejała biełaruskuju movu
Biełaruskim sanatoryjam u Rasii ekanamičny kryzis tolki na karyść
Biełaruś štohod naviedvajuć kala 5 miljonaŭ turystaŭ z Rasii
200 rasijskich vajskoŭcaŭ buduć sioleta zadarma adpačyvać u biełaruskich sanatoryjach
Zamiežnych turystaŭ u biełaruskich sanatoryjach stała jašče bolš
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień11
Kamientary