Prarasijski błohier zajaviŭ, što ŭkrainskija drony laciać u Rasiju praź Biełaruś
Anatol Šaryj śćviardžaje, što biełaruskija ŭłady viedajuć pra vykarystańnie nieba nad Biełaruśsiu, ale nie ŭmiešvajucca, i heta jašče adzin znak, što situacyja na froncie dla Rasii paharšajecca.
«Nam udałosia pabyvać u zakrytym bunkiery SPA Hienštaba Minabarony Rasijskaj Fiederacyi, — iranizuje błohier. — Praanalizavaŭšy paloty dronaŭ, my pryjšli da najpraściejšaj vysnovy: častka ź ich lacić praz terytoryju Biełarusi. Heta absalutna dakładna. Jany sapraŭdy pralatajuć praz terytoryju Biełarusi», — napisaŭ Šaryj u svaim telehram-kanale.
Pa słovach błohiera, u kamientarach jamu pišuć, što «heta i tak było zrazumieła», ale dla jaho piersanalna «heta stała adkryćciom».
«Akazvajecca, biełaruskaja pavietranaja prastora daŭno vykarystoŭvajecca Ukrainaj dla taho, kab praź jaje drony lacieli na Rasijskuju Fiederacyju», — śćviardžaje błohier i zadajecca pytańniem, čamu tak adbyvajecca.
Jak davodzić błohier, bolš žorstkaja reakcyja Minska mahła b pryvieści da niepasrednaha ŭstupleńnia Biełarusi ŭ vajnu. Pavodle jaho słoŭ, uciahnuć Biełaruś u kanflikt imkniecca Kijeŭ, a praloty dronaŭ mohuć być častkaj takoj stratehii. Ale ŭ padtrymku hetaj viersii jon nie pryvodzić nijakich dokazaŭ, abyšoŭšysia tolki zaŭvahaj:
«Tut nasamreč maje miesca pravakacyja, raściahnutaja ŭ časie. I my bačyli mnostva sprob z roznych bakoŭ uciahnuć RB u vajnu».
«Cikava, jak doŭha možna ihnaravać padobnaha kštałtu praloty. A kali zaŭtra praź Biełaruś tanki pojduć na Rasiju, heta taksama nie budzie zaŭvažana?» —
raźvivaje svaje fantazii Šaryj i zaŭvažaje, što stanovišča Maskvy pastupova horšaje, «tamu što z usich bakoŭ adbyvajecca zanadta šmat ruchu».
Błohier krytykuje rasijskija ŭłady za adsutnaść «vyraznaj reakcyi na prykmietnaje pavieličeńnie pastavak uzbrajeńnia i hrošaj na ŭzbrajeńnie» Ukrainie, u toj čas jak «situacyja ŭsio bolš i bolš nahniatajecca i horšaje».
«Płan całkam zrazumieły. My vydatna bačym, što robiać kijeŭskija «dronavody», kali jany bjuć pa trasach i pačynajuć vysiakać masty. Dumaju, najbližejšym časam usie maleńkija masty buduć raźbityja. A ŭžo dalej, nu vy pamiatajecie, što dalej…» — prahnazuje Šaryj, i tut možna ź im pahadzicca.
Anatol Šaryj — ukrainski žurnalist antyŭkrainskich pohladaŭ. Z 2019 hoda žyvie za miažoju. Ułady Ukrainy abvinavačvajuć jaho ŭ dziaržaŭnaj zdradzie.
U 2021 hodzie Litva abviaściła Šaryja piersonaj non-hrata.
Paśla pačatku rasijska-ŭkrainskaj vajny Šaryj niaredka ahučvaŭ pazicyi, jakija supadajuć z aficyjnymi rasijskimi naratyvami, ale ŭ 2023 hodzie jon simpatyzavaŭ pryhožynskim miaciežnikam, a nie Kramlu.
Ciapier čytajuć
Džon Koŭł pryjedzie ŭ Biełaruś 15 vieraśnia. Łukašenka, adnak papiaredziŭ: «vialikaj ździełki» nie budzie13
Kamientary
Eto jasno kak biełyj dień było i užie davno.