Brytanskaja Reform UK Faradža atrymała achviaravańnie $49 miljonaŭ ad kryptamiljardera

Brytanskaja pravapapulisckaja partyja Reform UK atrymała achviaravańnie sumaj 36 młn funtaŭ sterlinhaŭ (kala $49 miljonaŭ) ad brytanskaha kryptamiljardera, suzasnavalnika kryptabiržy BitMEX Bena Deła, jaki žyvie ŭ Hankonhu, piša Bi-bi-si.

Svajo rašeńnie Deła rastłumačyŭ u kałoncy dla Telegraph tym, što chacieŭ by zabiaśpiečyć «roŭnyja ŭmovy» dla partyi Najdžeła Faradža z ulikam finansavych mahčymaściaŭ dvuch jaje hałoŭnych palityčnych apanientaŭ — Lejbarysckaj i Kansiervatyŭnaj partyj.

Hetaja suma stała najbujniejšym adnarazovym achviaravańniem, jakoje kali-niebudź atrymlivała palityčnaja partyja ŭ Vialikabrytanii. Papiaredniuju rekordnuju sumu — 9 młn funtaŭ (prykładna $12,2 młn) — taksama atrymała Reform UK i taksama ad kryptamiljardera — Krystafiera Charborna.

Rekord sumy achviaravańnia, atrymanaha pavodle tastamientu, naležyć kansiervataram — 10 młn funtaŭ sterlinhaŭ (kala $13,5 młn).

Faradž zajaviŭ, što dla jaho hetaje achviaravańnie — «vialiki honar i nahoda dla honaru».

«U adroźnieńnie ad tych, chto vykazvaje ŭjaŭnuju zakłapočanaść stanam «našaj demakratyi», adnačasova robiačy ŭsio mahčymaje, kab jana zastavałasia kartelem, ja chaču sumlennaj baraćby i roŭnych umoŭ, — piša Deła. — Ź niadaŭnich prablem partyi ja zrabiŭ vysnovu, što joj varta nadavać mienš času zboru srodkaŭ dla kankurencyi na roŭnych umovach [na vybarach] i bolš času — padrychtoŭcy da pracy va ŭradzie».

Raniej Deła zajaviŭ, što budzie achviaravać partyi Faradža pa adnym miljonie funtaŭ sterlinhaŭ na miesiac da siaredziny 2029 hoda — krajniaj daty, da jakoj kiroŭnaja Lejbarysckaja partyja zmoža pryznačyć usieahulnyja vybary. Adnak ciapier jon vyrašyŭ pieraličyć usiu abiacanuju sumu adrazu — na vypadak, kali ŭrad u budučyni pasprabuje abmiežavać bujnyja achviaravańni.

Zaraz u Vialikabrytanii niama abmiežavańniaŭ na achviaravańni, jakija hramadzianie, što žyvuć u krainie, mohuć pieraličvać palityčnym partyjam.

Adnak niadaŭna Lejbarysckaja partyja anansavała abmiežavańnie 100 tysiač funtaŭ sterlinhaŭ (kala $135 tysiač) na achviaravańni ad brytancaŭ, jakija žyvuć za miežami krainy. Kab atrymać mahčymaść achviaravać bolšuju sumu, nieabchodna budzie pražyć u Vialikabrytanii nie mienš za hod.

Druhoje čytańnie hetaha zakonaprajekta pavinna adbycca ŭ Pałacie łordaŭ 14 vieraśnia. Deła, jaki naradziŭsia ŭ brytanskim Šefiłdzie i ciapier žyvie ŭ Hankonhu, užo zajaviŭ, što płanuje viarnucca ŭ Vialikabrytaniju, kab zachavać mahčymaść i ŭ budučyni finansavać partyju Faradža. Raniej jon achviaravaŭ joj 4 młn funtaŭ.

Inšy bujny sponsar Reform UK, Krystafier Charbarn, jaki žyŭ u Tajłandzie, taksama, vidać, źbirajecca pierajechać u Vialikabrytaniju i ŭžo zarehistravaŭsia tam jak vybarščyk, pisała ŭ červieni Times. U krasaviku 2026 hoda Charborn zajaviŭ, što płany ŭrada ŭzmacnić kantrol nad finansavańniem palityčnych partyj nie pieraškodziać jamu praciahvać rabić achviaravańni na karyść partyi Najdžeła Faradža.

Fandrajzinh Reform UK užo nieadnarazova vyklikaŭ pytańni ŭ pravaachoŭnych orhanaŭ. Na minułym tydni brytanskaja palicyja abviaściła pra pačatak rasśledavańnia pa padazreńni ŭ parušeńni zakona ab zamiežnym finansavańni niekalkimi pradstaŭnikami kiraŭnictva partyi paśla taho, jak na Channel 4 News vyjšaŭ repartaž z razmovaj, źniataj schavanaj kamieraj. U razmovie išła havorka pra hatoŭnaść parušyć zabaronu na pieravody ad zamiežnikaŭ.

U razmovie ŭdzielničaŭ i sam Faradž, jaki zajaviŭ, što jaho niapravilna zrazumieli. U Reform UK admaŭlajuć jakija-niebudź pravaparušeńni i zajavili, što buduć supracoŭničać sa śledstvam.

U dačynieńni da samoha Faradža ciapier viadziecca rasśledavańnie kamisii pa parłamienckich standartach. Jana vyśviatlaje, ci pavinien byŭ jon zadekłaravać hrašovy padarunak sumaj 5 młn funtaŭ sterlinhaŭ, atrymany im ad Charborna ŭ 2024 hodzie.

Tady Faradž nie byŭ deputatam i nie źbiraŭsia bałatavacca, adnak nieŭzabavie paśla atrymańnia padarunka ad kryptamiljardera źmianiŭ svajo mierkavańnie i pajšoŭ na vybary, jakija vyjhraŭ.

Faradž śćviardžaje, što nie pavinien byŭ dekłaravać hety «vyklučna pryvatny» padarunak, pakolki jon nie mieŭ dačynieńnia da jaho deputackaj abo palityčnaj dziejnaści. Na jaho dumku, parłamienckaje rasśledavańnie — heta prajava palityčnaj baraćby.

Na fonie skandału z-za hetaha padarunka Faradž skłaŭ paŭnamoctvy deputata i pajšoŭ na pieravybary ŭ svajoj akruzie. Adnak usie brytanskija partyi vyrašyli ich bajkatavać i nie vystaŭlać kandydataŭ suprać Faradža.

Adzinym jaho kankurentam u akruzie ŭ vyniku staŭ brytanski komik Džonatan Dejvid Charvi, jaki ŭdzielničaŭ u vybarach pad psieŭdanimam «Hraf Śmietnicatvary».

• 0
• 0
• 0
• 2
• 0
• 0
• 0
• 0