Biełarusy vyjhrali ŭ kamandy Naŭsiedy. I pryśviacili pieramohu pamiaci Miełkaziorava
Kamanda demakratyčnaj Biełarusi 13 červienia zaniała pieršaje miesca ŭ mižnarodnym dabračynnym futbolnym turniry Ambassadors’ Cup 2026 u Vilni (Litva). Druhoje — u kamandy Ofisa prezidenta Litvy, u jakoj hulaŭ i sam Hitanas Naŭsieda, treciaje miesca zaniali ŭdzielniki z Hiermanii, piša «Biełsat».
Turnir abjadnaŭ pradstaŭnikoŭ roznych krainaŭ, ambasadaŭ, biznesu i hramadskich arhanizacyj, palitykaŭ, a jaho hałoŭnaja meta — padtrymka dziaciej i raźvićcio spartyŭnych mahčymaściaŭ dla tych, kamu heta asabliva patrebna.
Na šlachu da pieramohi biełaruskaja kamanda zhulała z kamandaj Brytanskaj ambasady, a taksama z kamandami Tajvania, Ispanii i Indyi.
Finalnaja častka turniru suprać kamandy prezidenta Litvy zaviaršyłasia sieryjaj pienalci, dzie hulcy demakratyčnaj Biełarusi pakazali charaktar i ŭpeŭnienaść. Dakładnyja ŭdary, padtrymka adzin adnaho i mocny kamandny duch dapamahli biełarusam atrymać pieramohu i zaniać pieršaje miesca ŭ turniry.
Biełaruskaja kamanda ŭdzielničała ŭ spabornictvie treci raz, ale raniej nie zajmała anijakich pryzavych miescaŭ.
Pieramohu, pa słovach dypłamatyčnaha daradcy Śviatłany Cichanoŭskaj Dzianisa Kučynskaha, biełarusy pryśviacili žurnalistu Mikitu Miełkazioravu, jaki raptoŭna pamior pry kancy minułaha hoda.
Asobna varta adznačyć dabračynny składnik mierapryjemstva: samy vialiki danat zrabiła kampanija PZU — piać tysiač jeŭra. PZU — heta polskaja strachavaja hrupa i adzin z hałoŭnych partnioraŭ turniru. Hety ŭniosak staŭ važnaj padtrymkaj dla inicyjatyŭ, jakija dapamahajuć dzieciam zajmacca sportam, trenavacca i atrymlivać novyja mahčymaści dla raźvićcia.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień9
Kamientary
Cichanoŭskaja a) nie była abrana demakratyčnym čynam b) navat pry najaŭnaści mahčymaści (piera)abracca na płatformie Libiera ŭ demakratyčny sposab choć zaŭtra, nie robić i nie źbirajecca rabić taho.
Vynik: słova "demakratyja", "demakratyčny" - nie pra jejny Ofis.