U Rasii aryštavali departavanaha biełarusa. Jon ciškom viarnuŭsia, ale spaliŭsia, kali pajšoŭ u palicyju pa daviedku
43‑hadovaha Vasila Karpickaha ŭžo dvojčy vyhaniali z Rasii — i, vidać, rychtujecca treciaja sproba. Ale jamu tam jak miodam namazana.
Łamanosaŭski rajonny sud Archanhielska 18 sakavika 2026 hoda asudziŭ hramadzianina Biełarusi Vasila Karpickaha za toje, što jon dvojčy niezakonna pierasiek rasijskuju miažu, niahledziačy na zabaronu ŭjezdu.
Uradženiec vioski Stajki Aršanskaha rajona Viciebskaj vobłaści ŭpieršyniu trapiŭ pad rasijskaje pravasudździe ŭ 2022 hodzie: jaho asudzili ŭ Narjan-Mary (heta centr Nienieckaj aŭtanomnaj akruhi Archanhielskaj vobłaści Rasii) za pjanaje kiravańnie. Pakarańnie Karpicki adbyŭ u kałonii-pasialeńni, paśla čaho ŭłady departavali jaho ŭ Biełaruś i zabaranili ŭjezd u Rasiju na piać hadoŭ.
Ale zabarona jaho nie spyniła. Užo 15 vieraśnia 2023 hoda Karpicki sieŭ na ciahnik Orša—Smalensk i znoŭ pajechaŭ u Rasiju. Jaho zatrymali i znoŭ departavali — na hety raz praz Damadziedava. I paŭtorna abjavili piacihadovuju zabaronu ŭjezdu.
Zrešty, nie padziejničała i heta. Karpicki niejak praśliznuŭ u Rasiju ŭ kancy 2024 hoda ci pačatku 2025 hoda i dabraŭsia da svajho Narjan-Mara. Tak by i žyŭ cichieńka, ale biełarus asabista pryjšoŭ u kryminalna-vykanaŭčuju inśpiekcyju pa daviedku — tak palicejskija i daviedalisia, što jon znachodzicca na terytoryi Rasii.
Sud pryznaŭ Karpickaha vinavatym pa dvuch epizodach č. 2 art. 322 Kryminalnaha kodeksa Rasii (niezakonnaje pierasiačeńnie miažy) i pryznačyŭ 1 hod 3 miesiacy prymusovych rabot z utrymańniem 10% zarobku ŭ dziaržaŭny prybytak. Čas, praviedzieny pad vartaj, zaličyli z raźliku dzień za dva, i vyzvalili.
Piacihadovaja zabarona ŭjezdu, jakuju Karpickamu abviaščali dvojčy, praciahvaje dziejničać — tak što paśla adbyćcia prymusovych rabot jaho, vidać, čakaje čarhovaja departacyja.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień9
Kamientary