Što heta za 196 palitviaźniaŭ, pra vyzvaleńnie jakich zajavili prapahandysty?

U siłavikoŭ, u adroźnieńnie ad niezaležnaha hramadstva, jość dakładnyja śpisy represavanych biełarusaŭ. Pravaabaroncy ž źbirajuć infarmacyju pa krupinkach — i pra aryštavanych, i pra sutnaść abvinavačvańnia, i terminy, i fakt vyzvaleńnia čałavieka. Niešta dalataje adrazu, niešta praź miesiacy ci navat hady. Kali nieviadoma, jaki termin atrymaŭ palitviazień i ni jon, ni chtości ź jaho susiedziaŭ ci svajakoŭ pra jaho vyzvaleńnie nie paviedamlaŭ, to čałaviek pavinien zastavacca ŭ śpisie palitviaźniaŭ. Heta adzinaja pravilnaja stratehija.

Naturalna, što za šeść hadoŭ represij naźbirałasia niejkaja kolkaść tych, chto ŭžo vyzvaleny, ale pamyłkova visić u bazie. Niechta vyjšaŭ pa skančeńni terminu, niechta pa pamiłavańni (bo śpisy pamiłavanych taksama zvyčajna nie publikujucca).

U krasaviku 2026 hoda «Viasna» praviała invientaryzacyju śpisu, u vyniku čaho kala 100 čałaviek atrymali status «były palitviazień». Adpaviedna, kolkaść palitviaźniaŭ tady istotna skaraciłasia.

Havorka faktyčna idzie pra toje, što ciapier ułady praviali jašče adnu invientaryzacyju śpisu «Viasny». Śćviardžajecca, što jon pavinien źmienšycca na 196 čałaviek. Ale ci tak heta?

Niekatoryja imiony ludziej, jakija pamyłkova dahetul ličacca palitviaźniami, byli nazvanyja ŭ efiry ANT, ź niekatorymi ź ich byli zapisanyja hutarki, niekalki imionaŭ udałosia razhledzieć na papierach, jakija pakazaŭ u kadry Ihar Tur. Niama padstaŭ nie vieryć tym papieram — heta milicejskija vypiski z dataj vyzvaleńnia i infarmacyjaj pra pastanoŭku na ŭlik.

Takim čynam, ahułam u siužecie zhadvalisia 13 palitviaźniaŭ.

Siem ź ich pakul što nasamreč paznačanyja na sajcie «Viasny» jak palitviaźni. Heta: Alena Rybak, Uładzisłaŭ Fiedarovič, Vadzim Saskaviec, Taćciana Trafimčyk, Valancin Samasiuk, Andrej Kraśnik, Alaksandr Syryca, Siarhiej Safronaŭ.

Aproč taho, ANT paviedamiła pra raniejšaje vyzvaleńnie jašče šaści čałaviek, ale jany i tak u «Viasny» byli adznačanyja jak byłyja palitviaźni. Heta: Dźmitryj Siŭko, Uładzimir Čmuraŭ, Michaił Razuvanaŭ, Aleh Kiekuch, Alaksandr Pimašenka.

Atrymlivajecca, jak minimum hetyja šaściora ŭvachodziać u lik 196 asobaŭ ad ANT, ale «Viasna» nie ličyć ich ciapierašnimi palitviaźniami.

Takim čynam, śpis palitviaźniaŭ «Viasny» pavinien skaracicca, ale ŭsio ž nie na 196 čałaviek, a na mienšuju kolkaść. Dakładnaść moža ŭźniknuć tolki ŭ situacyi, kali dziaržava apublikuje hety śpis 196 čałaviek, a pravaabaroncy zmohuć źvieryć jaho sa svajoj bazaj.

Zrešty, varta pamiatać, što śpis palitviaźniaŭ niapoŭny. U im niama dziasiatkaŭ (a moža, i sotniaŭ čałaviek), jakija znachodziacca ŭ SIZA ŭ čakańni suda i pra jakich pakul niama infarmacyi.

• 1
• 0
• 0
• 2
• 0
• 2
• 1
• 0