41‑hadovuju žančynu z Babrujska asudzili pa palityčnaj spravie. Da jaje čaplalisia jašče ŭ 2020‑m

Hańnie Kraśnieŭskaj 41 hod. Jana žyvie ŭ Babrujsku, zamužam, vychoŭvaje 10‑hadovaha syna. Žančyna zachaplajecca intelektualnymi hulniami i kvizami.

Sjamja žyła zvyčajnym žyćciom — miarkujučy pa sacsietkach, u lutym 2025 hoda Kraśnieŭskija jašče paśpieli źlotać u Jehipiet na nievialiki adpačynak.

U pole zroku siłavikoŭ babrujčanka trapiła jašče padčas paślavybarčych pratestaŭ. U kastryčniku 2020 hoda miascovy sud aštrafavaŭ jaje na 10 bazavych vieličyń (na toj momant 270 rubloŭ) za ŭdzieł u masavych mierapryjemstvach.

Ciapier ža stała viadoma pra kryminalnuju spravu. Mahiloŭski abłasny sud pryznaŭ Kraśnieŭskuju vinavataj pavodle č. 1 art. 361‑4 Kryminalnaha kodeksa, sadziejničańnie ekstremisckaj dziejnaści. Što kankretna stała nahodaj dla pieraśledu i jaki dakładny termin pryznačyli žančynie — pakul nieviadoma. Joj prysudzili chatniuju chimiju.

«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj.

Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyłasia ŭciečka infarmacyi, i abviaściŭ pra zakryćcio prajekta. 

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu. 

• 1
• 0
• 0
• 0
• 0
• 1
• 7
• 0