Taćciana Łaŭnikovič pracavała buchhałtarkaj u dziaržaŭnaj ustanovie i vychoŭvała dzicia. Niadaŭna jaje asudzili za «sadziejničańnie ekstremisckaj dziejnaści».
Taćcianie Łaŭnikovič 36 hadoŭ. U 2012 hodzie jana skončyła Paleski dziaržaŭny ŭniviersitet pa śpiecyjalnaści «finansy i kredyt». Z 2013 hoda pracavała buchhałtarkaj naličeńnia zarobkaŭ spačatku ŭ doślednym rybhasie «Biełaje», a paśla na praciahu siami hadoŭ u kampanii «Vaš Pradmarkiet».
Apošnim miescam pracy Taćciany značycca Centr zabieśpiačeńnia dziejnaści biudžetnych arhanizacyj Kalinkavickaha rajona, dzie jana była buchhałtarkaj.
Žančyna haduje niepaŭnaletniaje dzicia.
Homielski abłasny sud vynies Taćcianie prysud pavodle častak 1 i 2 artykuła 361‑4 Kryminalnaha kodeksa Biełarusi — «sadziejničańnie ekstremisckaj dziejnaści». Zvyčajna pa hetym artykule ŭ Biełarusi sudziać pa spravie Hajuna.
Łaŭnikovič pryznačyli chatniuju chimiju.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vyciahnuć adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu.
«Naša Niva» — bastyjon biełaruščyny
PADTRYMAĆSiamju ź Minska buduć sudzić za zdradu dziaržavie i kantrabandu zbroi. Ich, padobna, zatrymali na miažy — voś što viadoma
Byłoha kiraŭnika Biełaruskaha centra akredytacyi asudzili pa spravie Hajuna
Salihorac, jaki raniej adbyŭ sutki za «Pahoniu» i straciŭ pracu, ciapier za kratami za «Hajuna» i abrazu słužbovaj asoby
Ciapier čytajuć
«Spasibo, Lena! Prodołžajtie viesti nabludienije». Aficer, jaki pisaŭ Charysavaj, paśviŭsia ŭ čatach palitemihracyi, a niekatorym dziaŭčatam navat prapanoŭvaŭ abmianiacca niudsami62
Kamientary
Heta ŭ čymści nahadvaje zakliki da admieny sankcyj, jakija škodziać "prostym" ludziam.
My na vajnie suprać prarasiejskaj chunty škłoŭskaha viertuchaja, jakaja panuje ŭ Biełarusi, i dla jakoj nie isnuje nijakich abmiežavańniaŭ - ani zakonnych, ani maralnych. A vajna nikoli nie składajecca z adnych pieramoh i nie byvaje biez strataŭ. Pieramoža toj, chto ściśnie zuby i budzie zmahacca dalej, a nie šukać nahody zdacca. I Ukraina, ŭ jakoj kožny dzień za svabodu štodzionna hinuć dziasiatki ludziej, heta dakazvaje.