Byłoha kiraŭnika Biełaruskaha centra akredytacyi asudzili pa spravie Hajuna

Alaksandru Kandratoviču 39 hadoŭ. Jon rodam ź Lidy, dzie ŭ 2006 hodzie skončyŭ miascovy kaledž na pryborabudaŭnika.

Paśla hetaha mužčyna pierabraŭsia ŭ Minsk i pastupiŭ u BNTU na pryładabudaŭničy fakultet, dzie vyvučaŭ kanstrujavańnie i vytvorčaść pryboraŭ. Paźniej tam ža jon atrymaŭ stupień mahistra techničnych navuk u halinie mietrałohii i mietrałahičnaha zabieśpiačeńnia.

Svaju karjeru Alaksandr pačynaŭ u dziaržaŭnym siektary. Bolš za vosiem hadoŭ jon adpracavaŭ u Biełaruskim dziaržaŭnym centry akredytacyi (BDCA). Tam jon pačynaŭ z pasady viadučaha ekśpierta i ŭ vyniku dasłužyŭsia da namieśnika načalnika adździeła, zajmajučysia acenkaj sistem kiravańnia i ŭnutranymi aŭdytami.

Zhodna z adkrytymi danymi, z kanca 2019 hoda Kandratovič syšoŭ ź dziaržpradpryjemstva ŭ pryvatny siektar. U 2020‑m jon staŭ kiraŭnikom kansałtynhavaj kampanii AKKREDO, suzasnavalnikam TAA «KalibSI Bieł» i ŭvajšoŭ u praŭleńnie Asacyjacyi łabaratoryj «Kampietentnaść».

Alaksandr zachaplajecca pryborami i elektronikaj. Taksama mužčyna lubić padarožničać — jon ź siamjoj pieryjadyčna jeździŭ u ES da samaha zatrymańnia. Nieviadoma, zatrymali jaho na miažy ci zabrali z chaty.

Viadoma, što jaho aryštavali pry kancy 2025 hoda. A niadaŭna Alaksandra sudzili ŭ Minskim haradskim sudzie. Jaho abvinavacili pavodle častak 1 i 2 artykuła 361‑4 Kryminalnaha kodeksa Biełarusi — sadziejničańnie ekstremisckaj dziejnaści.

Vidavočna, što kryminalny pieraśled biznesoŭca źviazany sa spravaj Hajuna.

Kandratoviču prysudzili chatniuju chimiju.

«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta. 

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu. 

• 0
• 0
• 0
• 0
• 0
• 1
• 6
• 0