U Biełarusi KDB zatrymaŭ rasijskaha biznesmiena, jakoha ŭ Rasii šukali za pastaŭki niajakasnaj tušonki dla armii
Rasijskaha biznesoŭca ŭ našaj krainie adsačyli pa telefonnych pieramovach i vuličnych videakamierach.
Supracoŭniki KDB zatrymali ŭ Biełarusi biznesmiena Dźmitryja Mizhira, jaki try miesiacy znachodziŭsia ŭ rasijskim vyšuku. Zatrymańnie adbyłosia paśla taho, jak mužčyna pasprabavaŭ vyjechać praź Biełaruś za miažu.
Jaho adsačyli pa telefonnych pieramovach i vuličnych kamierach videanazirańnia. Mužčynu ŭžo pieradali Rasii.
Mizhira abvinavačvajuć u machlarstvie ŭ asabliva bujnym pamiery ŭ składzie hrupy. Jaho ličać klučavym suviaznym u schiemie pastavak 170 ton niajakasnych miasnych kansiervaŭ u zonu «SVA». Ahulnaja škoda aceńvajecca ŭ 700 miljonaŭ rasijskich rubloŭ (8,6 młn dalaraŭ).
Kansiervy vyrablalisia na kambinacie «Sialacina» pad Maskvoj. Zamiest naležnaha miasa ŭ ich kłalii abrezki śvinych tuš, špik i zabaronienyja charčovyja dabaŭki.
Pavodle viersii śledstva, jon byŭ pasrednikam pamiž vytvorcami i Minabarony RF. Praz Mizhira pieradavalisia chabary (pa 5 rasijskich rubloŭ z kožnaj banki tušonki, usiaho na sumu kala 120 tysiač dalaraŭ).
Mizhiru pahražaje da 10 hadoŭ pazbaŭleńnia voli pa artykule pra machlarstva (i da 15 hadoŭ, kali abvinavačańnie pierakvalifikujuć na chabarnictva). Sam jon viny nie pryznaje.
U vyšuku pa hetaj spravie zastajucca jašče dva čałavieki — hiendyrektar kambinata «Sialacina» Arciom Baryškoŭ i technołah Zinaida Hryščuk.
Kamientary