U Lepielskim rajonie siłaviki zatrymali 43‑hadovaha miascovaha žychara, jakoha padazrajuć u niezakonnym vyłavie ryby padčas dziejańnia siezonnaj zabarony na rybałku. Vyśviatleńniem usich abstavin hetaj spravy zajmajecca Lepielski rajonny adździeł Śledčaha kamiteta.
Pavodle materyjałaŭ śledstva, u noč z 6 na 7 červienia mužčyna vyjšaŭ na voziera Doŭhaje, dzie z vykarystańniem łodki i zabaronienych łoŭčych pryład — loskavych sietak — niezakonna zdabyvaŭ rybu. U hety pieryjad na terytoryi Viciebskaj vobłaści dziejničała zabarona na łoŭlu ryby, tamu lubaja takaja dziejnaść ličyłasia parušeńniem pryrodaachoŭnaha zakanadaŭstva.
Kali mužčyna viarnuŭsia da bieraha sa svaim ułovam, jaho zatrymali supracoŭniki Dziaržaŭnaj inśpiekcyi achovy žyviolnaha i raślinnaha śvietu. Na miesca zdareńnia była vyklikana śledča-apieratyŭnaja hrupa.
Padčas ahladu śledčyja kanfiskavali łodku, rybałoŭnyja sietki i niezakonna zdabytuju rybu. Usiaho było vyjaŭlena 16 ryb roznych vidaŭ, u tym liku laščy, karasi, lini i akuni. Dla dakładnaha vyznačeńnia škody, naniesienaj vodnym bijałahičnym resursam, była pryznačana śpiecyjalnaja ichtyjałahičnaja ekśpiertyza.
Pavodle papiarednich padlikaŭ, škoda, naniesienaja navakolnamu asiarodździu, užo acenienaja bolš jak na 5,2 tysiačy biełaruskich rubloŭ.
Padčas pravierki vyśvietliłasia, što zatrymany mužčyna maje aficyjnaje miesca pracy, adnak raniej užo pryciahvaŭsia da kryminalnaj adkaznaści za padobnaje pravaparušeńnie — niezakonnuju zdabyču ryby. Akramia hetaha, u jaho bijahrafii byŭ vypadak pryciahnieńnia da adkaznaści za prymianieńnie hvałtu ŭ dačynieńni da supracoŭnika pryrodaachoŭnaj inśpiekcyi.
Z ulikam taho, što mužčyna raniej byŭ asudžany za anałahičnaje złačynstva, suprać jaho zaviali kryminalnuju spravu pa častcy 3 artykuła 281 Kryminalnaha kodeksa Respubliki Biełaruś — niezakonnaja zdabyča ryby, ździejśnienaja asobaj, jakaja raniej była asudžanaja za takoje samaje pravaparušeńnie.
Pa sankcyi prakurora abvinavačany źmieščany pad vartu. Ciapier śledčyja praciahvajuć rasśledavańnie, vyśviatlajuć usie detali zdareńnia i pravodziać nieabchodnyja pracesualnyja dziejańni.
Kamientary