Abjavili zbor srodkaŭ na lačeńnie byłoha palitviaźnia Dźmitryja Hopty

«Zaraz Dzima znachodzicca ŭ reabilitacyjnym centry «Naujas Gyvenimas i dziakujučy dapamozie śpiecyjalistaŭ krok za krokam zmahajecca sa svajoj zaležnaściu. Heta składany i doŭhi šlach, ale ciapier jon prachodzić jaho nie adzin.

Mama Dźmitryja, Volha, vykazvaje vialikuju padziaku ŭsim, chto adhuknuŭsia i finansava padtrymaŭ siamju ŭ pačatku hoda. Dziakujučy vašaj dapamozie ŭdałosia apłacić 5 miesiacaŭ znachodžańnia Dźmitryja ŭ centry.

Śpiecyjalisty, jakija pracujuć ź Dźmitryjem, rekamiendujuć praciahnuć prahramu reabilitacyi da kanca hetaha hoda», — paviedamlaje Dapamoga.

Nieabchodnaja suma dla zboru raźličanaja takim čynam:

• Košt adnaho miesiaca znachodžańnia ŭ centry — 500 jeŭra.
• Dla praciahu lačeńnia nieabchodna apłacić jašče 7 miesiacaŭ (červień — śniežań).
• Ahulnaja nieabchodnaja suma — 3500 jeŭra.

«Kožny pieravod — heta nie prosta finansavaja padtrymka, — adznačaje «Dapamoha». — Heta šaniec dla čałavieka viarnucca da žyćcia, adnavić siabie i svaju budučyniu».

Padtrymać Dźmitryja Hoptu možna pa spasyłcy.

Dźmitryj Hopta i jaho los stali adnym z najiaskraviejšych simvaličnych uvasableńniaŭ vyklučnaj amaralnaści i biaźlitasnaści stvoranaha Alaksandram Łukašenkam režymu.

Hety čałaviek maje psichičnuju chvarobu, u jaho razumovaja adstałaść. U 2020 hodzie jaho, tady 21-hadovaha, zatrymali padčas pratestaŭ u rodnym Žłobinie i asudzili, niahledziačy na prablemy chłopca sa zdaroŭjem, da dvuch hadoŭ pazbaŭleńnia voli. Na paradu pryznačanaha dziaržaŭnaha advakata Hopta paćvierdziŭ, što kinuŭ kamieniem u bok milicyi, praŭładnyja miedekśpierty dali zaklučeńnie pra toje, što jon viedaŭ, što rabiŭ, sudździa Iryna Pradun prysudziła bieź nijakich źnižak na mientalnyja asablivaści dva hady źniavoleńnia. 

Paśla maci Dźmitryja dva hady zmahałasia za toje, kab syna vyzvalili daterminova. Jana źviartałasia z prośbaj ab pamiłavańni na imia Łukašenki, pad pietycyjaj z prośbaj ab jaho vyzvaleńni padpisałasia 7000 čałaviek, byli spadziavańni na toje, što niaščasny chłopiec trapić pad amnistyju.

Ale ŭsie namahańni i spadziavańni byli marnymi — Dźmitryj Hopta adsiadzieŭ uvieś termin ad zvanka da zvanka i vyjšaŭ na volu tolki 31 śniežnia 2022 hoda. Bolš za toje — u vieraśni 2022‑ha jaho ŭklučyli ŭ śpis MUS «asob, jakija majuć dačynieńnie da ekstremisckaj dziejnaści», što aznačała dadatkovyja ździeki. Prytym, jak śviedčyła jaho maci, da samaha kanca źniavoleńnia jon tołkam tak i nie ŭśviadomiŭ, za što jaho karajuć.

U krasaviku 2023 hoda stała viadoma, što Dźmitryj Hopta razam z maci vyjechali ź Biełarusi ŭ Vilniu.

• 2
• 0
• 1
• 1
• 0
• 5
• 1
• 4