Talenavitaha biełaruskaha chareohrafa złavili ŭ Pieciarburhu z narkotykami
30‑hadovy Mikita Borys abyšoŭsia społacham — kali kinie durnoje, to nie atrymaje nijakaha pakarańnia.
Prymorski rajonny sud Sankt-Pieciarburha 10 sakavika 2026 hoda pryznaŭ 30‑hadovaha biełarusa, chareohrafa Mikitu Borysa, vinavatym u niezakonnym zachoŭvańni narkotykaŭ u bujnym pamiery i pryznačyŭ jamu try hady pazbaŭleńnia voli ŭmoŭna.
Borys naradziŭsia ŭ 1995 hodzie ŭ Dziaržynsku. U 2020‑m z adznakaj skončyŭ Akademiju ruskaha baleta imia Vahanavaj pa śpiecyjalizacyi «mastactva baletmajstra», a ŭ 2024‑m staŭ łaŭreatam rasijskaj Nacyjanalnaj teatralnaj premii «Muzyčnaje serca teatra» ŭ naminacyi «najlepšaje płastyčnaje rašeńnie» za śpiektakl «Miadźviedź» u pieciarburhskim Teatry junaha hledača. Z 2021 hoda jon supracoŭničaje z teatram estrady imia Arkadzia Rajkina jak režysior pa płastycy i chareohraf-pastanoŭščyk.
Pavodle materyjałaŭ spravy, chareohrafa zatrymała palicyja pozna ŭviečary kala žyłoha doma — jon sam skazaŭ supracoŭnikam, što ŭ zaplečniku ŭ jaho miefiedron. Znajšli dva pakieciki: 5,04 h u adnym adździaleńni i 0,25 h u druhim, razam 5,29 h. Heta «bujny pamier», jaki prykładna ŭ piać razoŭ pieravyšaje nižniuju miažu.
U SIZA chareohrafa nie adpravili, adpuścili dadomu čakać sud.
Sam Borys raskazaŭ, što ŭžyvaje miefiedron ź leta 2025 hoda i zachoŭvaŭ jaho doma. U dzień zatrymańnia ŭziaŭ narkotyk z saboj, sustreŭsia sa znajomym, razam zajšli ŭ hości, dzie ŭžyli rečyva, a pa darozie ŭ kramu jaho i spynili. Na momant zatrymańnia jon byŭ u stanie ałkaholnaha i narkatyčnaha apjanieńnia — sud, adnak, nie paličyŭ heta abciažvajučaj akaličnaściu. U telefonie (iPhone 16) śladoŭ handlu narkotykami nie vyjavili.
Siarod źmiakčalnych akaličnaściaŭ sud uličyŭ pryznańnie viny, raskajańnie i stan zdaroŭja maci. Kiraŭnictva teatra charaktaryzuje chareohrafa stanoŭča. Paśla zatrymańnia Borys samastojna staŭ na ŭlik u narkołaha.
Artykuł, pa jakim jaho asudzili (č. 2 st. 228 KK RF), dapuskaje da 10 hadoŭ pazbaŭleńnia voli. Sud pryznačyŭ nižniuju miažu — try hady — dy jašče i ŭmoŭna, z vyprabavalnym terminam dva hady.
Kali za dva hady Borys nie ŭlapajecca ŭ niejki inšy kryminał, pakarańnie nie budzie vykonvacca, a sudzimaść pahasicca.
Kamientary
Niejki teatr miniaciur