Dva biełarusy abkradvali rasijskija kramy i pradavali zdabyču kala zapravak. Ciahnuli i śvininu, i kavu, i navat tviks
Paśla zatrymańnia biełarusaŭ adpuścili, i jany chucieńka źjechali z Rasii, paprasiŭšy asudzić ich zavočna.
Mažajski haradski sud Maskoŭskaj vobłaści zavočna pryznaŭ dvuch biełarusaŭ, Alaksandra Kudzieliča i Maksima Tatarynoviča, vinavatymi ŭ kradziažach ź sietkavych kramaŭ «Piacioračka» i pryznačyŭ kožnamu štraf pamieram prykładna $420. Prysud vyniesieny 26 lutaha 2026 hoda.
Pavodle materyjałaŭ spravy, mužčyny pryjechali ŭ Maskoŭskuju vobłaść na zarobki, ale potym, jak havorycca ŭ dakumiencie, «adpravilisia padarožničać» pa rehijonie. Kali hrošy stali zakančvacca, jany vyrašyli kraści pradukty ź sietkavych kramaŭ — i dziela ŭłasnaha charčavańnia, i na pieraprodaž.
Pieršy raz naparniki nabrali poŭnyja sumku i zaplečnik: dzieviać upakovak kavy Nescafe Gold, dva batončyki Twix, paštet, tušonka «Snoŭ» (vyrablenaja, darečy, u Biełarusi), piva i narezka italjanskaj salami. Roli vyznačyli zahadzia: adzin biare tavar i składaje ŭ sumku, druhi sumku niasie.
Druhi zachod byŭ užo čysta kamiercyjny. U inšaj «Piacioračcy» jany ŭziali tolki kavu — 16 upakovak Nescafe Gold, čatyry kiłahramovyja pački ziernievaj EGOISTE NOIR i piać upakovak rastvaralnaj «Arabiki». Skradzienaje, jak jany sami pryznali, potym pradavali roznym ludziam na zapraŭkach. Usiaho za dva razy biełarusy vynieśli tavaraŭ prykładna na 30 tysiač rasijskich rubloŭ (kala €330).
Na sud ni Kudzielič, ni Tatarynovič nie źjavilisia: pavodle źviestak suda, abodva ŭžo znachodziacca za miežami Rasii. Jany paprasili razhledzieć spravu bieź ich, vinu pryznali całkam i zajavili pra raskajańnie.
Sud pryznačyŭ kožnamu pa 30 tysiač rasijskich rubloŭ (kala €330) štrafu — ahułam atrymałasia ŭdvaja bolš za košt skradzienaha. Pytańnie tolki ŭ tym, ci ŭbačyć hetyja hrošy rasijskaja kazna — uličvajučy, što abodva asudžanyja ŭžo nie ŭ Rasii.
Ciapier čytajuć
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus trapiŭ bieśpiłotnik50
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus trapiŭ bieśpiłotnik
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu1515
Kamientary