Stała viadoma, chto atrymaŭ žyllo ŭ «sakretnym» domie pad Drazdami. Siarod ich — siłavik, jaki «vyznačyŭsia» ŭ 2020 hodzie

Pra jakoje žyllo havorka

Bolš za hod tamu na vulicy Cichaj, 54 dabudavali šmatpaviarchovy dom — uźviadzieńniem zajmałasia dziaržkampanija. Što heta za prajekt i chto tam budzie žyć, nie paviedamlałasia. Tolki adzin raz zabudoŭščyk zajaviŭ, što kvatery ŭ hetym domie ŭ adkryty prodaž nie pastupiać. Takaja «sakretnaść» naradziła dadatkovyja pytańni — źjavilisia zdahadki, što kvatery ŭ dziesiacipaviarchoviku pryznačanyja dla čynoŭnikaŭ i funkcyjanieraŭ, a sam dom pačali nazyvać «tajemnym».

Chto atrymaŭ kvatery

Jak vyśvietliła «Lusterka» z dapamohaj krynicy, znajomaj ź situacyjaj, u hetym «sakretnym» šmatpaviarchovym domie na vulicy Cichaj, 54, u lutym — sakaviku 2025 hoda svaich uładalnikaŭ nabyli bolš za 50 kvater.

Siarod tych, chto zasialiŭsia, — niekalki vysokapastaŭlenych čynoŭnikaŭ. Tak, adna z kvater naležyć pieršamu namieśniku kiraŭnika MUS Juryju Nazaranku, jaki trapiŭ pad sankcyi ZŠA, a taksama ES — bo niasie adkaznaść «za kampaniju represij i zapałochvańnia, jakaja pravodzicca MUS pad jaho kamandavańniem paśla prezidenckich vybaraŭ 2020 hoda». Jak raniej paviedamlałasia, paśla žorstkaha źbićcia zatrymanych u 2020 hodzie ŭ Frunzienskim RUUS Minska Nazaranka abiacaŭ pravieści pravierku, pa vynikach jakoj «buduć zroblenyja peŭnyja vysnovy». Ci byli pryciahnutyja da adkaznaści datyčnyja da hetaha siłaviki, nieviadoma.

Uładalnikam jašče adnoj kvatery ŭ «tajemnym» domie staŭ Juryj Jaraševič. Heta ambasadar Biełarusi ŭ Izraili, jaki zaniaŭ hetuju pasadu ŭ studzieni 2025 hoda. Da hetaha pracavaŭ u MZS i ambasadzie Biełarusi ŭ Rasii.

Siarod inšych uładalnikaŭ kvadratnych mietraŭ u hetym domie — Alaksiej Šapiećka. Jon pracuje dyrektaram sanatoryja «Biełaruś» u Sočy, jaki ŭvachodzić u Kiraŭnictva spravami Łukašenki. Hety sanatoryj prymaje na lačeńnie i reabilitacyju rasijskich vajskoŭcaŭ i dobraachvotnikaŭ, jakija ŭdzielničajuć u vajnie suprać Ukrainy, i kalektyvy pradpryjemstvaŭ rasijskaha vajskova-pramysłovaha kompleksu, paviedamlaŭ raniej Belpol.

Siarod navasiołaŭ taksama jość Alaksandr Rahožnik — eks-ambasadar Biełarusi ŭ Rasii, a ciapier staršynia Viciebskaha abłvykankama.

Akramia ich, kvatery ŭ hetym domie atrymali dziasiatki šarahovych čynoŭnikaŭ i funkcyjanieraŭ z roznych viedamstvaŭ. U dakumientach u ich napisana, što ciaham piaci hadoŭ z daty dziaržrehistracyi žyłoha pamiaškańnia jaho nielha pradać, padaryć ci inšym čynam pieradać inšamu ŭłaśniku. Taksama pamiaškańnie možna pieradavać u zakład tolki banku.

Darečy, u Biełarusi šmat hadoŭ vykarystoŭvajecca praktyka poŭnaściu abo častkova zasialać damy rabotnikami dziaržstruktur, ilhotnikami, siłavikami. Tamu nie zusim zrazumieła, čamu ŭ hetym vypadku dziaržaŭny zabudoŭščyk ci ŭłady stalicy adrazu nie patłumačyli hramadskaści mety budaŭnictva nieruchomaści.

Kolki kaštuje žyllo ŭ hetym rajonie

Jak i zajaŭlaŭ zabudoŭščyk, kvatery ŭ domie nie vystaŭlalisia na prodaž. Byli tolki niešmatlikija vyklučeńni: tak, u sakaviku minułaha hoda źjaviłasia abviestka pra prodaž dvuchpakajoŭki ŭ hetym domie płoščaj 57,3 kv. m. Košt byŭ kala 535 837 rubloŭ, abo 179 000 dalaraŭ. Heta 3124 dalary za kvadratny mietr. U hetym vypadku ŭłasnaść była paznačanaja jak pryvatnaja.

Kali pahladzieć na inšyja prapanovy ŭ hetym elitnym rajonie, to ich košt značna vyšejšy. Tak, praz darohu, na vulicy Pijanierskaj, pradajuć trochpakajoŭku płoščaj 80,2 kv. m za 1 038 750 rubloŭ, abo 375 tysiač dalaraŭ. U inšym susiednim domie — taksama na Pijanierskaj — jość dvuchuzroŭnievaja kvatera na 165,1 kv. m za 1,55 miljona rubloŭ, abo amal 560 tysiač dalaraŭ. Viadoma, charaktarystyki hetaha žylla mohuć istotna adroźnivacca ad tych, što ŭ domie na Cichaj, 54, — jak u lepšy, tak i ŭ horšy bok.

• 0
• 0
• 0
• 0
• 0
• 0
• 0
• 0