Pamier ziamielnaha padatku dla niekatorych biełarusaŭ moža źmianicca. Pryčyna — abnaŭleńnie kadastravaj vartaści ŭčastkaŭ.
Novyja danyja buduć prymianiacca z 1 studzienia 2026 hoda. Pra samyja darahija ziemli ŭ Minsku i jaho navakolli paviedamlaje aficyjny kanał Dziaržaŭnaha kamiteta pa majomaści.
Lidaram pa košcie ziamli ŭ krainie zastajecca Minsk — 230,3 BYN za kv. m (+40,6% u paraŭnańni z 2020 hodam). U top-10 taksama ŭvajšli Zasłaŭje, Fanipal, Brest, Salihorsk, Hrodna, Mačuliščy, Dziaržynsk, Homiel i Łahojsk.
Samaj darahoj acenačnaj zonaj Minska staŭ rajon vulicy Cichaj (Drazdy) i praśpiekta Pieramožcaŭ. Učastak u 10 sotak tut kaštuje 683 tysiačy rubloŭ.
Siarod sielskich nasielenych punktaŭ vyłučajecca Minski rajon. Tut ziamla kaštuje 53,2 BYN za kv. m (što ŭ 3,4 raza vyšej, čym u nastupnaha za im Smalavickaha rajona). U top-10 taksama ŭvajšli Dziaržynski, Brescki, Puchavicki, Uździenski i inšyja rajony.
Siarod viosak pieršaje miesca pa košcie zajmaje Baravaja (137,3 BYN za kv. m). A siarod sadavodčych tavarystvaŭ vyłučajecca dačny kaapieratyŭ «Kryničny» ŭ Ždanovičach. Tut kvadratny mietr ziamli kaštuje 131,9 BYN. U cełym, vosiem ź dziesiaci lidaraŭ pa košcie raźmieščany ŭ Minskaj vobłaści.
Kadastravaja vartaść — heta asnova dla raźliku ziamielnaha padatku, vyznačeńnia pamieru arendnaj płaty za ziamielnyja ŭčastki, jakija znachodziacca ŭ dziaržaŭnaj ułasnaści, vyznačeńnia pamieru płaty za ziamielnyja ŭčastki, pieradadzienyja ŭ pryvatnuju ŭłasnaść, płaty za prava arendy ziamielnych učastkaŭ, płaty za ŭčastak, što vykuplajecca va ŭłaśnika pry jaho adabrańni dla dziaržaŭnych patreb, lehalizacyi ziamielnych učastkaŭ i inš.
Aznajomicca z kadastravaj vartaściu i padatkovaj bazaj možna na sajcie Nacyjanalnaha kadastravaha ahienctva.
Kamientary