Lidara kienijskaj siekty pryznali vinavatym u śmierci 190 dziaciej. Jon prymušaŭ baćkoŭ maryć ich hoładam

Padčas suda abvinavačanyja admaŭlali, što zabivali ludziej abo prymušali ich pamirać. Adnak śledstva i sud pryjšli da vysnovy, što ŭ siektantskim łahiery ludziej nie tolki maryli hoładam, ale i dušyli, a taksama zabivali da śmierci.

Usiaho try hady tamu ŭ lesie Šakachoła, niedaloka ad uźbiarežža Indyjskaha akijana, dzie znachodziŭsia łahier siekty, znajšli bolš za 400 ciełaŭ. Častka zahinułych dahetul nie identyfikavanaja, bo pareštki mocna raskłalisia. U sudovych dakumientach ich paznačajuć, naprykład, jak «nieviadomaje dzicia mužčynskaha połu», paznačajučy kaardynaty mahiły i datu znachodki.

Poł Makienzi zasnavaŭ jevanhielisckuju siektu «Mižnarodnaje słužeńnie Dobraj viestki» ŭ 2003 hodzie. Raniej jon pracavaŭ taksistam u Najrobi. Za nastupnyja 16 hadoŭ kolkaść jaho paśladoŭnikaŭ vyrasła da tysiač, a adździaleńni siekty źjavilisia ŭ roznych častkach Kienii. U arhanizacyi byŭ navat ułasny telekanał Times TV, jaki viaščaŭ z horada Malindzi na ŭźbiarežžy Indyjskaha akijana i pieradavaŭ propaviedzi Makienzi.

U 2019 hodzie prapaviednik zakryŭ hałoŭnaje adździaleńnie siekty i razam sa svaimi paśladoŭnikami pierabraŭsia ŭ les Šakachoła, prykładna za 70 kiłamietraŭ ad Malindzi.

Makienzi pierakonvaŭ viernikaŭ, što sučasnaja adukacyja i miedycyna — zło. Pavodle pakazańniaŭ adnaho ź jaho paplečnikaŭ, prapaviednik zajaŭlaŭ, što tych, chto supraciŭlajecca zahadu paścicca, treba «adpravić na niabiosy šturškami i ŭdarami». Pachavańnie ŭ niehłybokich mahiłach u lesie ŭ siekcie nazyvali «šlubam z Chrystom».

Akramia zabojstvaŭ, Makienzi i inšych kiraŭnikoŭ siekty abvinavačvajuć u teraryźmie, radykalizacyi paśladoŭnikaŭ i pazbaŭleńni dziaciej mahčymaści atrymlivać adukacyju. Ich aryštavali ŭ 2023 hodzie paśla vyjaŭleńnia masavych pachavańniaŭ u Šakachole.

Dla ekshumacyi i vyvazu ciełaŭ naniali 17 miascovych žycharoŭ. Adzin ź ich, Džejms, raskazaŭ Bi-bi-si, što ŭ kožnaj mahile znachodzili nie mienš za try cieły. Pavodle jaho słoŭ, siarod reštkaŭ byli cieły niemaŭlataŭ va ŭzroście ŭsiaho niekalki tydniaŭ. U adnoj mahile znajšli adrazu 12 dziciačych ciełaŭ.

Niahledziačy na maštab trahiedyi, niekatoryja paśladoŭniki Makienzi praciahvajuć jamu vieryć. Małady kienijski viernik Piter Šukrani ledź nie zahinuŭ u lesie Šakachoła, kali jahonaja maci vykinuła nieabchodnyja jamu leki, pavieryŭšy, što jany supiarečać Božaj voli. Pitera vynieśli ź lesu na nasiłkach, paśla čaho jon jašče niekalki tydniaŭ pralažaŭ u balnicy.

Adnak i paśla hetaha Šukrani praciahvaŭ ličyć Makienzi dobrym čałaviekam, jaki kłapaciŭsia pra jaho. Pierad abviaščeńniem sudovaha vierdyktu jon zajaviŭ žurnalistam, što Makienzi nikoha nie prymušaŭ paścicca, a ludzi sami rabili taki vybar, bo vieryli ŭ jaho. Jon taksama skazaŭ, što pa-raniejšamu lubić prapaviednika i ličyć jaho svaim pastyram.

• 0
• 0
• 0
• 5
• 0
• 0
• 2
• 0