U Paŭnočnaj Karei abvierhli infarmacyju pra komu Kim Čen Yna na fonie čutak pra jaje
Paŭnočnakarejskaje ahienctva CTAK 20 kastryčnika paviedamiła, što Kim Čen Yn naviedaŭ Ahulnadziaržaŭnuju vystavu adzieńnia i abutku.
Napiaredadni źjavilisia čutki, što nibyta Kim Čen Yn trapiŭ u komu paśla krovaźlićcia ŭ mozh.
«U internecie raspaŭsiudžvajucca čutki pra toje, što lidar KNDR Kim Čen Yn upaŭ u komu paśla krovaźlićcia ŭ mozh. Karystalniki sacyjalnych sietak śćviardžajuć, što paŭnočnakarejskaha lidara ekstranna dastavili ŭ balnicu ŭ Kitai paśla ciažkaha krovaźlićcia, kab akazać jamu terminovuju miedycynskuju dapamohu», — apisaŭ čutki prakramloŭski telehram-kanał «Puł №3».
Pavodle niepaćvierdžanych źviestak, Kim Čen Yna vyvieźli z krainy praź nizki ŭzrovień miedycynskaha absłuhoŭvańnia ŭ Pchieńjanie, a zhodna z čutkami, jakija raspaŭsiudžvajucca ŭ internecie, jaho dastavili ŭ Piekinski abjadnany miedycynski kaledž, dzie jamu nibyta akazali ekstrannuju dapamohu.
Apošni raz Kim Čen Yna nibyta bačyli na publicy 11 kastryčnika padčas naviedvańnia muzieja vajennaj techniki ŭ Pchieńjanie.
U 2020 hodzie ŭ sacyjalnych sietkach taksama aktyŭna raspaŭsiudžvalisia paviedamleńni pra śmierć Kim Čen Yna paśla taho, jak jon na niekalki miesiacaŭ źnik z publičnaj prastory, nahadvaje Puł №3.
Na dumku ekśpiertaŭ, u vypadku śmierci Kim Čen Yna mienavita jaho siastra Kim Jo Čžon, dyrektar Adździeła prapahandy i ahitacyi CK Pracoŭnaj partyi Paŭnočnaj Karei, moža časova ŭznačalić krainu. Jana ŭžo maje značny ŭpłyŭ u paŭnočnakarejskim kiraŭnictvie.
Razam z tym siońnia Centralnaje paŭnočnakarejskaje ahienctva apublikavała navinu, što ŭčora Kim razam z dačkoj, ź jakoj jon apošnim časam rehularna źjaŭlajecca na ŭsich mierapryjemstvach, ahledzieŭ ekspazicyju ŭ supravadžeńni viadučych partyjnych i ŭradavych čynoŭnikaŭ.
«Kim vykazaŭ zadavalnieńnie maštabam vystavy i jakaściu pradukcyi. Jon zaklikaŭ nadavać bolš uvahi dyzajnu, vypuskać vyraby z elemientami dziaržaŭnaha ściaha, a taksama zabiaśpiečvać jakaść školnaj i studenckaj formy, partfielaŭ i abutku», — piša CTAK.
Kamientary