Pašynian publična nazvaŭ adnaho sa svaich apanientaŭ «prabiełaruskim aliharcham»

Nie ŭ pieršy ŭžo raz śćviardžajučy, što hetyja palityki nabrali bolš za 500 tysiač hałasoŭ šlacham podkupu vybarščykaŭ, Pašynian zaklikaŭ tych, chto nie zhodny ź jahonym padychodam, vychodzić na vulicu.

«Kačaran, kałužski aliharch [Samvieł Karapiecian] i prabiełaruski aliharch [Hahik Carukian] pavinny być źniščanyja ŭ svaim ža łohavie. Pakul ja źjaŭlajusia premjer-ministram, ja budu źniščać ich adrasna, ja źnišču ich adrasna! Tych hramadzian, jakija nie zhodnyja z hetaj linijaj, ja zaklikaju zrabić revalucyju ŭ Armienii i źmianić urad. Jak ja i kazaŭ u 24‑m hodzie, što Karabachski ruch nie budzie praciahnuty, — chto nie zhodny, zaklikaju vychodzić na vulicu. Spynić hety praces inšymi srodkami niemahčyma», — zajaviŭ Pašynian.

Zajavy Pašyniana prahučali na fonie praciahłaha supraćstajańnia pamiž uładami i apazicyjaj, jakoje abvastryłasia paśla padziej vakoł Nahornaha Karabacha i sprečak nakont budučaha raźvićcia armianskaj dziaržavy. Apazicyjnyja siły rehularna krytykujuć urad za jaho palityku ŭ śfiery biaśpieki i źniešnich adnosin, a pradstaŭniki ŭłady abvinavačvajuć apanientaŭ u karupcyi i vykarystańni starych aliharchičnych schiem upłyvu.

Niadaŭna ŭ Armienii prajšli parłamienckija vybary, na jakich upeŭnienuju pieramohu atrymała partyja Pašyniana «Hramadzianski dahavor», jakaja atrymała ŭ novym parłamiencie bolš za 60% hałasoŭ. Palityčnaja siła nazvanaha «prabiełaruskim aliharcham» Hahika Carukiana zusim krychu nie pieraadoleła vybarčy barjer i nie trapiła ŭ parłamient.

Suviazi Hahika Carukiana z Alaksandram Łukašenkam — daŭnija i publičnyja. U mai 2026 hoda biznesmien skazaŭ: «Łukašenka — moj siabar, rodny mnie čałaviek». Pasolstva Biełarusi ŭ Armienii znachodzicca nie ŭ stalicy, a ŭ siale Aryndž pobač z majontkam Carukiana. Biznesmienu naležyć dola ŭ biełaruska-armianskim kańjačnym pradpryjemstvie, a ŭ studzieni 2024 hoda da jaho pryjazdžaŭ Viktar Łukašenka.

Adzin z padarunkaŭ Carukiana źviazany niepasredna z synam biełaruskaha kiraŭnika. Padčas aficyjnaha vizitu Łukašenki ŭ Jerevan u 2010 hodzie biznesmien padaryŭ jahonaj siamji 400‑litrovuju bočku kańjaku «Ararat». Jaje zachoŭvajuć u padvałach Jerevanskaha kańjačnaha zavoda i, pavodle paviedamleńniaŭ, płanujuć adkarkavać u dzień viasiella Koli Łukašenki, jakoje pakul nie adbyłosia.

10 červienia, praz try dni paśla vybaraŭ, suprać Carukiana zaviali kryminalnuju spravu pa padazreńni va ŭchileńni ad vypłaty padatkaŭ u asabliva vialikaj sumie i zabaranili jamu vyjazdžać z krainy. Advakat palityka ličyć pieraśled niezakonnym i nieabhruntavanym.

• 3
• 0
• 0
• 1
• 0
• 0
• 0
• 0