Partyi siabra Łukašenki nie chapiła kala 160 hałasoŭ z usioj Armienii, kab trapić u parłamient
Hahik Carukian kančatkova ŭ pralocie. I pad śledstvam.
Partyja «Kvitniejučaja Armienija» Hahika Carukiana — biźniesmiena, jaki publična nazyvaje Alaksandra Łukašenku svaim siabram, — nie prajšła ŭ Nacyjanalny schod Armienii pa vynikach vybaraŭ 7 červienia. Joj nie chapiła kala 160 hałasoŭ.
Pavodle kančatkovych dadzienych Centralnaj vybarčaj kamisii, «Kvitniejučaja Armienija» nabrała 3,989% — pry nieabchodnych dla partyj 4%. Pry jaŭcy 1 476 769 vybarščykaŭ atrymlivajecca, što Carukianu nie chapiła prykładna 160 hałasoŭ.
Pieramohu na vybarach atrymała partyja premjer-ministra Nikoła Pašyniana «Hramadzianskaja damova» — 49,745%. Dalej iduć błok «Mocnaja Armienija» Samvieła Karapieciana (23,271%) i błok «Armienija» Robierta Kačarana (9,923%). Usiaho minimalny paroh nie pieraadoleli 15 z 18 palityčnych sił, jakija ŭdzielničali ŭ vybarach.
Suviazi Carukiana z Łukašenkam — daŭnija i publičnyja. U mai 2026 hoda biznesmien skazaŭ: «Łukašenka — moj siabar, rodny mnie čałaviek». Pasolstva Biełarusi ŭ Armienii znachodzicca nie ŭ stalicy, a ŭ siale Aryndž pobač z majontkam Carukiana. Biznesmienu naležyć dola ŭ biełaruska-armianskim kańjačnym pradpryjemstvie, a ŭ studzieni 2024 hoda da jaho pryjazdžaŭ Viktar Łukašenka.
Adzin z padarunkaŭ Carukiana źviazany niepasredna z synam biełaruskaha kiraŭnika. Padčas aficyjnaha vizitu Łukašenki ŭ Jerevan u 2010 hodzie biznesmien padaryŭ jahonaj siamji 400‑litrovuju bočku kańjaku «Ararat». Jaje zachoŭvajuć u padvałach Jerevanskaha kańjačnaha zavoda i, pavodle paviedamleńniaŭ, płanujuć adkarkavać u dzień viasiella Koli Łukašenki, jakoje pakul nie adbyłosia.
10 červienia, praz try dni paśla vybaraŭ, suprać Carukiana zaviali kryminalnuju spravu pa padazreńni va ŭchileńni ad vypłaty padatkaŭ u asabliva bujnym pamiery i zabaranili jamu vyjazdžać z krainy. Advakat palityka ličyć pieraśled niezakonnym i nieabhruntavanym.
Kamientary