Fielčar Arsień z prablemami słychu ź minskaj balnicy chutkaj dapamohi śpiavaje na movie žestaŭ i skaraje sacsietki VIDEA
U siecivie zavirusiłasia videa, na jakim małady fielčar staličnaha kliničnaha špitala chutkaj miedycynskaj dapamohi Arsień Davidovič vykonvaje pieśniu na mihi. A jašče chłopiec paśla śmierci babuli-musulmanki, jakaja jaho mocna lubiła, pryniaŭ isłam.
Chłopiec naradziŭsia z hienietyčnaj chvarobaj i maje prablemy sa słycham, ale heta nie pieraškodziła jamu skončyć miedycynski kaledž, pracavać u dyjahnastyčnaj łabaratoryi i, akramia hetaha, vystupać u teatry.
Videa z vystupam Arsienia źniali jašče ŭ 2024 hodzie, ale jano znoŭ pryciahnuła ŭvahu, dziakujučy publikacyi ŭ Threads. Mnohim stała cikava daviedacca pra los hetaha simpatyčnaha chłopca.
Arsień naradziŭsia ŭ Hrodnie, pa babuli maje kazachskija karani. Vučyŭsia ŭ śpiecyjalnaj škole-internacie dla dziaciej z parušeńniem słychu. Niahledziačy na hetuju prablemu, užo ŭ piać hadoŭ chłopčyk umieŭ i čytać, i pisać, a taksama čytaŭ na pamiać vieršy. Pryčym nie tolki hołasam, ale i daktylem (z dapamohaj palcavaj azbuki).
Pieršapačatkova Arsienij maryŭ być kucharam, ale ŭ vyniku pastupiŭ u Minski miedycynski kaledž, pra što nie škaduje. Na pasadzie fielčara-łabaranta płanavaj klinika-dyjahnastyčnaj łabaratoryi Balnicy chutkaj dapamohi ŭ Minsku jon stabilna źbiraje padziaki i kamplimienty ad pacyjentaŭ.
«Samy pryjemny i ŭvažlivy małady śpiecyjalist», — vodhuki takoha charaktaru možna raz-poraz sustreć u siecivie.
Akramia miedycyny, u žyćci Arsienija zaŭsiody prysutničała tvorčaść — jon z małych hadoŭ vystupaje na scenie. U Minsku znajšoŭ siabie na placoŭcy respublikanskaha DK imia Šarko. Tam jon i śpiavaje, i hraje ŭ teatry jak aktor. Jaho pieršaj rollu byŭ Piton u pastanoŭcy pra Maŭhli.
Pieśniu «Usio ŭ tvaich rukach», jakuju biełarus vykonvaje na videa, jon abraŭ nie prosta tak — možna skazać, heta deviz Arsienia. Paśla śmierci babuli-musulmanki, ź jakoj jany byli vielmi blizkija, małady čałaviek pryniaŭ isłam.
«Moj deviz pa žyćci — heta piaty ajat z 94‑j sury Karana: «Za kožnym ciažaram nastaje palohka». Za kožnaj čornaj pałasoj idzie biełaja. Žyćcio samo pa sabie dobraje, ale ŭ im časta zdarajucca prablemy, jakija z časam minajuć. Ja zaŭsiody dziakuju Usiavyšniamu za ŭsio, što ŭ mianie jość, za toje, čaho ja zmoh dasiahnuć. I ŭsim žadaju mužna pieranosić usie ciažkaści hetaha žyćcia, nie zdavacca, vieryć u lepšaje, iści da kanca, niemahčymaje mahčyma. Usio ŭ vašych rukach!» — pieradaje Arsień praz žurnalistaŭ.
Časam svaje śpievy i tancy Arsień taksama vykładvaje ŭ instahram.
Ciapier čytajuć
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary