Infancina vybačyŭsia za pamyłku, ale zastaŭsia prezidentam FIFA

Na ekstranym pasiadžeńni Praŭleńnia FIFA ŭ Maroka prezident suśvietnaj futbolnaj arhanizacyi Džani Infancina pryznaŭ, što dapuściŭ «pamyłki», prasoŭvajučy płan častkovaj pryvatyzacyi mižnarodnych turniraŭ. Takim čynam jon zaručyŭsia padtrymkaj kiraŭnictva arhanizacyi i zachavaŭ svaju pasadu, piša Bi-bi-si.

Zajava ab padtrymcy Infancina była apublikavana praz čatyry hadziny paśla zakančeńnia sustrečy ŭ afrykanskim ofisie FIFA ŭ Rabacie.

Prapanova Infancina rehijanalnym kanfiederacyjam pahadzicca na prodaž dolaŭ u turnirach u abmien na chutkuju vypłatu 40 miljonaŭ dalaraŭ vyklikała chvalu abureńnia, najpierš z boku UEFA. Sutyknuŭšysia z takoj rezkaj reakcyjaj, šviejcarac adklikaŭ svoj płan, adnak krytykaŭ heta nie zadavoliła, i jany praciahnuli patrabavać adstaŭki prezidenta FIFA.

Unutry samoj FIFA taksama było niamała niezadavolenych. Tak, va ŭnutranaj zapiscy, jakaja apynułasia ŭ rasparadžeńni Bi-bi-si, hienieralny sakratar arhanizacyi Macijas Hrafstrom nazvaŭ toje, što adbyłosia, «sumnym pavarotam padziej, jaki možna pastavić u vinu» Infancina. Hrafstrom taksama prysutničaŭ na pasiadžeńni ŭ Rabacie.

Pavodle vynikaŭ sustrečy byŭ padrychtavany list, ź jakim aznajomiłasia BBC. Jaho padpisali Infancina i Hrafstrom, adrasavaŭšy dakumient usim nacyjanalnym i rehijanalnym futbolnym arhanizacyjam. Jany prynieśli «ščyryja prabačeńni» za dapuščanyja pamyłki i «paabiacali nie dapuścić padobnaha ŭ budučyni».

Pry hetym aŭtary lista dali zrazumieć, što adnoj z pamyłak ličać i ŭciečku płana ŭ ŚMI. Pieršaj pra jaho paviedamiła hazieta The Times 28 lipienia. FIFA zajaviła, što bolš «nie budzie ciarpieć» napadak na jaje «pryncypy dobrasumlennaści, naležnaha kiravańnia i vykanańnia ŭstanoŭlenych pracedur» i budzie prymać usie nieabchodnyja miery dla abarony svajho imia i reputacyi.

Ci možna adchilić Infancina?

Krytyka na adras prezidenta FIFA sapraŭdy nie ścichaje. Tolki ŭ apošnija dni premjer-ministr Kanady Mark Karni, kraina jakoha razam sa ZŠA i Mieksikaj prymała apošni čempijanat śvietu, zajaviŭ, što straciŭ davier da Džani Infancina.

Były futbalist «Barsiełony», madrydskaha «Reała» i zbornaj Partuhalii Łuiš Fihu, jaki ŭ minułym taksama pretendavaŭ na pasadu kiraŭnika FIFA, zaklikaŭ Infancina nieadkładna syści ŭ adstaŭku.

«Infancina zhańbiŭ tuju pasadu, jakuju abiacaŭ prasłavić. Vyratavać svoj honar jamu ŭžo pozna, ale vyratavać futboł jašče nie pozna», — zajaviŭ Fihu.

Razam z tym Infancina maje namier zmahacca za apošni dazvoleny jamu prezidencki termin. Na hety raz u jaho mohuć źjavicca surjoznyja kankurenty.

Pretendenty na pasadu kiraŭnika FIFA pavinny vyłučyć svaje kandydatury nie paźniej za 18 listapada. Vybary adbuducca na kanhresie FIFA ŭ Maroka ŭ sakaviku 2027 hoda. Pieramožca pavinien atrymać nie mienš jak 106 hałasoŭ z 211 nacyjanalnych futbolnych fiederacyj.

Niekatoryja z hetych fiederacyj užo zajavili, što nie buduć hałasavać za Infancina. Takuju pazicyju ŭžo zaniała Fiederacyja futboła Uelsa, i čakajecca, što nieŭzabavie anałahičnaje rašeńnie prymie i Futbolnaja asacyjacyja Anhlii.

Adnak pa-za miežami Jeŭropy nieprymirymych praciŭnikaŭ Infancina značna mienš. Navat u apošnija dni, kali zdavałasia, što jahony los visić na vałasku, jaho kandydaturu publična padtrymali Jehipiet, Maroka, Nihier, Maŭrytanija, Demakratyčnaja Respublika Konha i Filipiny.

Płan Infancina adchilili nie tolki va UEFA, ale i kanfiederacyi Azii, a taksama Paŭnočnaj i Centralnaj Amieryki i krain Karybskaha basiejna (KANKAKAF). Adnak paśla taho, jak hety płan byŭ adklikany, jany adreahavali značna bolš strymana. KANKAKAF raskrytykavała kiraŭnictva FIFA, ale nie stała zaklikać da jaho adstaŭki. Azijackaja futbolnaja kanfiederacyja ŭvohule nie rabiła nijakich zajaŭ.

UEFA, niahledziačy na svoj upłyŭ, nie maje realistyčnych mahčymaściaŭ adchilić Infancina. Kab dasiahnuć hetaj mety, joj daviałosia b zaručycca padtrymkaj afrykanskich krain, dla jakich prezidenctva Infancina stała krynicaj davoli značnych finansavych pastupleńniaŭ.

• 1
• 0
• 0
• 6
• 0
• 1
• 2
• 0