Prafiesija hetaha biełarusa — pužać ludziej. Jon raskazaŭ, što treba rabić i kolki za heta płaciać

— Kvesty — historyja siezonnaja. Samy pik pačynajecca ź siaredziny leta, kali studenty viartajucca ŭ horad, i doŭžycca da kanca kastryčnika. Dalej — jak pašancuje. Zarobak nie fiksavany, my atrymlivajem hrošy za kožnuju kankretnuju hulniu. Heta ŭsio ž taki padpracoŭka ci navat chobi. Dla asnoŭnaj pracy tut zarobak, jaki zanadta płavaje.

— I kolki kaštuje napałochać čałavieka?

— Pa maich nazirańniach, u siarednim pa Minsku akcior atrymlivaje ad 10 da 15 BYN za praviedzieny kvest. Ale ahułam usio zaležyć ad pracadaŭcy i tvaich abaviazkaŭ. Asabista ja pracavaŭ i za 12,5 BYN, i za 15, i za 25. Tam, dzie płaciać 25, u ciabie značna bolš funkcyjanału. Nie budu nazyvać kankretnych arhanizataraŭ, ale jość vielmi dobryja, składanyja kvesty, dzie akcioram płaciać usiaho 7 BYN. Kab zarabić bolš, im prapanujuć nadbaŭki za niejkuju samadziejnaść: prydumać aryhinalnaje źjaŭleńnie piersanaža, ukraści, naprykład, krosovak u hulca — atrymaješ nadbaŭku 3 BYN. Pieršyja dźvie-try hulni za źmienu ty jašče možaš kreatyvić, ale na siomy-vośmy raz novaje nie atrymajecca prydumać.

Pavialičyć

Pa słovach Maksima, kvest-industryja ŭ Minsku apošnija niekalki hadoŭ nabirała abaroty i razrastałasia. U mocnaj kankurencyi hulniaŭ na ŭsich nie chapaje.

Jak kaža Maksim, kali pracavać na adnoj łakacyi, vychodzić kala 600 rubloŭ na miesiac. Kab pavialičyć zarobak, jon biehaje pamiž dvuma kvestami tudy-siudy. U takim tempie za miesiac moža vyjści kala 1 200 BYN.

— U maje abaviazki ŭvachodzić: sabrać łakacyju pierad pačatkam, nanieści hrym, pieraapranucca, užycca ŭ rolu i trymać atmaśfieru da kanca. Kali kvest — pierformans, heta značyć pa knizie ci filmie, treba daskanała vyvučyć manieru movy i płastyku piersanaža. Plus treba adčuvać aŭdytoryju. Kali pryjšli dzieci — hulajem akuratna. Kali studenty — možna razhulacca na poŭnuju, jany dobra ŭsprymajuć žarty i skrymiery. Hulcy va ŭzroście — indyvidualny padychod. 

Pavialičyć

U siarednim hulnia doŭžycca 1 hadzinu, tamu apłata ŭ 15 BYN moža hučać niedrenna dla maładoha čałavieka. Ale na spravie ŭsio psuje niepradkazalnaść hrafiku. U svaju źmienu ty nie možaš pracavać dzieści jašče, ale hulniaŭ u tvoj dzień moža nie być. I atrymlivajecca, što ty siadziš biez hrošaj, choć nibyta pracoŭny dzień.

Pavialičyć

— Hrafik my bačym napiaredadni, ale broń moža «prylacieć» za paŭtary hadziny da pačatku hulni. Ty musiš być zaŭsiody napahatovie, kab sarvacca i vyjechać. Kamuści ščaścić: jon žyvie ŭ susiednim dvary, jamu 10 chvilin da pracy. A kali žyvieš na inšym kancy horada, to dziela adnoj hulni traciš hadzinu tudy, hadzinu nazad, hadzinu viadzieš kvest — i ŭsio heta dziela 15 BYN.

Kolki kaštuje zapuścić svoj kviest

Adkryvać svoj kvest — heta zaŭsiody ryzyka. Maksim pierakanany, što, kali ludziam nie zojdzie, jany napišuć siarednija vodhuki, jakija mocna ŭpłyvajuć na naviedvalnaść, i da ciabie buduć chadzić tolki tady, kali projduć usie astatnija kvesty ŭ horadzie. A ty ž ukłaŭ vielizarnyja hrošy ŭ arendu, ramont, dekaracyi, pravodku, kamiery.

— Jaki paroh uvachodu ŭ hety biznes?

— Raniej usie rabili banalna: abšyli ścieny hipsakartonam, kinuli paru dekaracyj, papyrskali farbaj — voś tabie i łohava mańjaka. Ciapier industryja vyrasła, ludzi zamaročvajucca. Jość u Minsku kłasnyja ludzi, naprykład kampanija «Kłaŭstrafobija». Jany robiać takija kvesty, dzie ty prosta baišsia niešta čapać, bo heta vyhladaje jak realnyja artefakty, toj ža «Kod da Vinčy».

Stvareńnie kłasičnaha jakasnaha kvestu moža abyścisia ŭ $30 000. Ceny mohuć być značna nižejšymi. Naš novy kvest «Terapija», jaki my rabili amal try hady, naŭskidku abyšoŭsia prykładna ŭ $5 000 — 7 000. Ale košt kvestu nie kaža pra jaho jakaść. U nas, naprykład, vielizarnaja ekanomija, bo my budaŭničyja raboty svaimi siłami pravodzili.

— I za kolki času heta akuplajecca?

— Sakret akupnaści — u kolkaści kvestaŭ na adnoj łakacyi. Siaredni košt hulni dla kamandy ŭ Minsku — 100—120 BYN. Kali ŭ ciabie adzin kvest, ty možaš pravieści tolki adnu hulniu ŭ hadzinu. U nas na adnym punkcie znachodzicca adrazu čatyry kvesty. To-bok u hadzinu moža iści paralelna čatyry hulni. Hałoŭnaje — piśmienna vybudavać hukaizalacyju, kab kamandy nie pierasiakalisia i nie čuli kryki adzin adnaho praź ścianu.

Pry hetym kvesty vielmi časta traplajuć u pastku arendadaŭcy. Kali ŭ ciabie zabiaruć pamiaškańnie — tvoj kvest prosta pryjdziecca zrujnavać. Ty nie možaš zabrać z saboj pafarbavanyja ścieny, zadekaravanuju padłohu i prakładzienuju pravodku. Tamu imknucca zaklučać doŭhaterminovyja damovy arendy.

Štrafy, traŭmy i čajavyja ŭ $100

Usia praca zaviazanaja na dvuch ludziach, tamu štrafy ŭ industryi — raspaŭsiudžany sposab dyscypliny. Kali akcior spaźniŭsia chvilin na 20 i ludziam pryjšłosia jaho čakać, jon pravodzić hetuju hulniu biaspłatna. Kali jon uvohule nie vyjšaŭ na pracu biez uvažlivaj pryčyny, jon spłačvaje štraf u pamiery koštu samaj hulni.

Viadoma, kali čałaviek realna zachvareŭ, z tempieraturaj, to ničoha nie budzie. Adnak važna, kab byŭ źmienščyk, jaki moža ciabie padmianić. Kali zamieny niama — pryjdziecca pracavać biez vychadnych.

— Ciapier papularnyja kantaktnyja chorary. Byvaje, što akcior pierabolšvaje ź siłaj i kalečyć hulcoŭ?

— U nas, dziakuj bohu, takoha nie było, ale ŭ industryi heta častaja historyja. Usio zaležyć ad akciora: kali jon nie adčuvaje miažu, kali čałavieku ŭžo realna baluča, zdarajucca prablemy. U ludziej mohuć zastacca hiematomy, siniaki i navat parezy.

Kali čałaviek abraŭ režym «łajt» ci «miedyum», a akcior pierastaraŭsia i nabiŭ paru siniakoŭ, arhanizacyja prynosić prabačeńni. Adnak kali praź dziejańni akciora hulec atrymaŭ surjoznuju traŭmu — parvaŭ ciahlicu, złamaŭ kość, to lačeńnie całkam apłačvaje sam akcior.

— Ci pakidajuć vam čajavyja paśla strašnych hulniaŭ?

— Čajavyja zaležać ad taho, jak ty kamunikuješ ź ludźmi paśla kvestu. Kali vychodziš z kisłym tvaram — ničoha nie daduć. Kali ŭśmichaješsia, adkazvaješ na ich pytańni, abmiarkoŭvaješ prachodžańnie — mohuć padziakavać. Mnie pakidali i 1 kapiejku na čaj, i navat 100 dalaraŭ! Choć čaściej za ŭsio, viadoma, ničoha nie pakidajuć.

Niahledziačy na ciažkaści, Maksim vielmi lubić svaju pracu i navat dumaje nad adkryćciom ułasnaha kvestu, choć da hetaha, jak pryznajecca chłopiec, jašče daloka.

• 2
• 0
• 1
• 2
• 1
• 0
• 0
• 0