«Hetyja abjekty byli asudžanyja». Čamu nastupstvy balistyki pa łahistyčnych centrach pad Kijevam takija ciažkija
Za apošni miesiac Ukraina paniesła ciažkija straty cyvilnaj łahistyčnaj infrastruktury. Balistyčnaja ataka ŭ noč na 5 žniŭnia stała najbolš razburalnaj. Pa stanie na pačatak žniŭnia straty ad udaraŭ Rasii pa składach, vytvorčych mahutnaściach i inšaj nieruchomaści, jakuju vykarystoŭvaje biznes, składali, pavodle danych ekśpiertaŭ, kala 350 miljonaŭ dalaraŭ. Padziei minułaj nočy ŭ Kijevie i vobłaści hetyja straty istotna pahłybiać, piša Ukrainskaja słužba Bi-bi-si.
Premjer-ministr Ukrainy Siarhiej Karecki zapeŭniŭ, što ŭrad
«raspracuje nieabchodnyja rašeńni dla zabieśpiačeńnia bieśpierapynnaj pracy łahistyčnych kampanij i handlovych pradpryjemstvaŭ u adkaz na rasijski rakietny teror».
Hetaj nočču nivodnuju z 28 balistyčnych rakiet ukrainskaj SPA źbić nie ŭdałosia. Ukraina nie maje nieabchodnych rakiet, zdatnych źbivać balistyku.
U toj ža čas u apošnija miesiacy Ukraina nanosić udary dronami pa rasijskaj łahistycy. Nie stała vyklučeńniem i noč 5 žniŭnia.
Ciapierašni abmien udarami pa łahistycy zmusiŭ ukrainskija kampanii i ŭrad dumać pra toje, jak abaranić biznes i zrabić niedasiahalnymi dla balistyki składy i inšuju łahistyčnuju infrastrukturu.
«Epicentr». Adnaŭleńniu nie padlahaje
Pavodle danych kampanii «Epicentr», hetaj nočču rasijanie «adnačasova parazili dva klučavyja łahistyčnyja kompleksy kampanii»: u Kijevie całkam zhareŭ łahistyčny centr, jaki byŭ adnym z klučavych abjektaŭ, u Kalinaŭcy Bravarskaha rajona — łahistyčna-vytvorčy kompleks. Tam zahinuŭ adzin supracoŭnik kampanii, jašče troje paranienyja i trapili ŭ balnicu.
Akramia taho, u vyniku pramych rakietnych udaraŭ źniščanyja dva vialikija składskija kompleksy. Jašče adna rakieta trapiła ŭ zavod Epicentr Ceramic Corporation, jaki vyrablaje kieramičnuju plitku.
«Mahutny vybuch faktyčna zrujnavaŭ zavod, zrabiŭšy dalejšuju pracu pradpryjemstva niemahčymaj. Vytvorčaść na zavodzie całkam prypynienaja», — havorycca ŭ zajavie «Epicentra».
Pavodle papiarednich acenak, poŭnaje adnaŭleńnie zrujnavanaj vytvorčaści zapatrabuje kala dvuch hadoŭ.
«Novaja Pošta». Źniščany sartavalny centr
«U noč na 5 žniŭnia ŭ vyniku masavanaj varožaj ataki źniščany sartavalny centr «Novaj pošty» ŭ Kijevie. Troje ludziej zahinuli, 8 paranienyja», — zajavili ŭ kampanii.
Hety paštovy apieratar zaznavaŭ ataki dziasiatki razoŭ, asabliva ŭ 2026 hodzie. Adnak «Novaja pošta» nie prypyniała pracu.
«Ciapier praciahvajecca acenka nastupstvaŭ varožaj ataki. «Novaja pošta» kampiensuje klijentam poŭnuju abvieščanuju kaštoŭnaść paškodžanych adpraŭleńniaŭ i źviažacca z kožnym, kab paviedamić detali kampiensacyi», — zapeŭnivajuć u kampanii.
Aktualny status adpraŭleńniaŭ i ich trekinh paštovy apieratar raić šukać u mabilnym dadatku abo na aficyjnym sajcie kampanii.
«Razietka». Try rakiety pa raźmierkavalnym centry
Try balistyčnyja rakiety źniščyli najbolšy raźmierkavalny składski kompleks «Razietki» ŭ Bravarskim rajonie. Pra heta ŭ fejsbuku paviedamiła suzasnavalnica kampanii Iryna Čačotkina.
«Tut my apracoŭvali bolš za 100 tysiač zakazaŭ na dzień. Jon nie padlahaje adnaŭleńniu», — napisała jana.
Łahistyčny kompleks adkryli ŭ pačatku 2017 hoda. Jon byŭ najbolšym i najbolš aŭtamatyzavanym składam kampanii, kaža Iryna.
Najbolšy łahistyčny centr i inšyja abjekty
U vioscy Čajki Bučanskaha rajona byŭ źniščany adzin z najbolšych składskich łahistyčnych kompleksaŭ va Ukrainie — «Čajka», jaki naležyć kampanii Alfa Development Group (ADG).
Pavodle danych «Forbes-Ukraina», ADG źjaŭlajecca lidaram rynku Ukrainy, majučy bolš za 500 tysiač kvadratnych mietraŭ składskoj nieruchomaści.
Jaho klijentami źjaŭlajucca dziasiatki viadomych kampanij, tamu možna vykazać zdahadku, što źniščeńnie vielizarnaha chaba aznačaje i stratu tavaru dziasiatkaŭ kampanij, jakija arandavali tam składy.
Kiraŭnik Bravarskaj rajonnaj administracyi Vital Biahun u efiry telemarafonu paviedamiŭ, što ŭ Bravarskim rajonie uvohule atrymali paškodžańni kala piaci łahistyčnych abjektaŭ, u tym liku składy kampanij Fozzy i Fozzy Food.
U Kijevie na Barščahoŭcy hareli i byli mocna paškodžanyja składy sietki supiermarkietaŭ Novus.
Ciarpieli taksama ad pažaraŭ dva raźmierkavalnyja centry sietki «Silpo» ŭ Kijeŭskaj vobłaści.
U «Silpo» paviedamlajuć pra šaściora zahinułych rabotnikaŭ.
Centralny skład pradukcyi niamieckaj kampanii LIQUI MOLY va Ukrainie hetaj nočču byŭ całkam źniščany ahniom. Kampanija vyrablaje alivy, zmazku i aŭtachimiju.
Nazyvajucca tolki tyja abjekty, adnosna jakich udałosia znajści aficyjnyja paćviardžeńni. Kružać nazvy taksama inšych łahistyčnych centraŭ, raźmieščanych u stalicy i vakoł jaje, ale aficyjnych zajaŭ pra zrujnavańni pakul niama. Ich taksama nazyvaje ŭ svajoj spravazdačy ministerstva abarony RF.
Zajavy minabarony Rasii
Rasijskaje vajskovaje viedamstva nazyvaje dva surjoznyja transpartna-łahistyčnyja centry — «Rabien Ukraina» i «Trans-łahistyk», nazvy jakich nie fihurujuć u inšych spravazdačach.
Akramia taho, DSNS paviedamlaje pra maštabnyja pažary na łahistyčnych abjektach u Bravarskim rajonie, dzie — siarod inšych — raźmieščanyja i hetyja dźvie kampanii.
«Trans-łahistyk» źjaŭlajecca adnym z najbolšych va Ukrainie pryvatnych apierataraŭ mižnarodnych i mižharodnich aŭtamabilnych hruzavych pieravozak.
«Rabien Ukraina» — vialiki łahistyčny vuzieł i raźmierkavalny kompleks jeŭrapiejskaha apieratara, jaki ŭvachodzić u skład niderłandskaj Raben Group. Va Ukrainie kampanija pracuje z 2003 hoda.
Minabarony RF śćviardžaje, što na ŭsich hetych abjektach nibyta zachoŭvalisia kamplektujučyja dla dronaŭ, tavary padvojnaha pryznačeńnia abo vyrablalisia bieśpiłotniki.
Vialiki skład — vialiki pažar
U apošnija miesiacy Ukraina i Rasija nanosiać udary pa łahistyčnaj infrastruktury adna adnoj.
Na praciahu apošnich dvuch tydniaŭ USU nanieśli ŭdary pa kala 20 łahistyčnych kompleksach pa ŭsioj Rasii. Ź ich pałova źniščanaja, śćviardžaje ŭkrainskaja ŭłada.
Tady, kali balistyčnyja rakiety lacieli ŭnačy na infrastrukturu Kijeŭščyny, ukrainskija drony niščyli adzin z najbolšych łahistyčnych chabaŭ u Tulskaj vobłaści.
Uładzimir Zialenski nieadnarazova zajaŭlaŭ pra ataki na łahistyčnyja centry, u tym liku sietki Wildberries. Prezident Ukrainy śćviardžaŭ, što hetyja centry «zadziejničanyja ŭ zabieśpiačeńni rasijskaj armii kamplektujučymi dla dronaŭ, navihacyjnaha abstalavańnia».
Biasprecedentnyja ŭdary minułaj nočy zmusili ŭkrainskija kampanii i ŭrad dumać pra toje, jak abaranić biznes i zrabić niedasiahalnymi dla balistyki składy i inšuju łahistyčnuju infrastrukturu.
«Vialiki skład — vialiki pažar. Inšych varyjantaŭ niama. Nie chočacie vialikaha pažaru — razvoźcie pa sotniach maleńkich składoŭ i rabicie padziemnyja schoviščy. Chłopcy nie mahli nie razumieć, što hetyja abjekty asudžanyja», — tak kamientuje ŭ fejsbuku apošnija ŭdary pa ŭkrainskich łahistyčnych centrach vajskovy błohier ź psieŭdanimam Paała Lumjere.
Pavodle jaho słoŭ, niekatoryja biznesy ŭžo «demantujuć kaštoŭnaje abstalavańnie i razvoziać tavar sa svaich vielizarnych anharaŭ».
«Epicentr» paabiacaŭ, što dziela bieśpierapynnaści pastavak źniščanaha zavoda kieramiki «vytvorčaść budzie pieraniesienaja na dva pradpryjemstvy kampanii za miažoj».
Adnak takija miery vyhladajuć jak paasobnyja. Kiraŭnik urada Karecki paabiacaŭ padumać pra supolnyja ź biznesam miery dla bieśpierapynnaj pracy łahistyčnych kampanij i handlovych pradpryjemstvaŭ, niahledziačy na surjoznyja straty.
«Vorah pakazaŭ, što jamu niama roźnicy, što atakavać. Atakujucca składy z praduktami, z budaŭničymi materyjałami, rytejł, vytvorčaść. I tak budzie i nadalej, na žal, pakul u voraha jość balistyka», — kaža daradca prezidenta Ukrainy Siarhiej «Fłeš» Biaskrestnaŭ.
Pavodle jaho acenak, moža iści havorka pra 100 balistyčnych rakiet štomiesiac, jakija USU nie mohuć źbivać praź niedachop nieabchodnych srodkaŭ.
«Fłeš» pierakanany, što vorah budzie šukać takija składy i nadalej, kab stvaryć deficyt tavaraŭ i ŭpłyvać na ekanomiku Ukrainy.
Jon zaklikaŭ biznesmienaŭ «dyviersifikavać ryzyki» — nie pryciahvać uvahu voraha i zdradnikaŭ va Ukrainie da vialikaha trafiku, pierabudavać kanały łahistyki.
«Vialikich składoŭ časova nie pavinna być. Heta pytańnie vyžyvańnia. Atak budzie bolš», — padsumoŭvaje Siarhiej Biaskrestnaŭ.
Zialenski: Rakiety dla Patriot mohuć nie davać, kab Ukraina była bolš sastuplivaja
Zialenski: Tempy pieradačy Ukrainie rakiet da Patriot sioleta skaracilisia ŭ try razy
«Ja trymaŭ dźvie hałoŭki časnaku, a jon lacieŭ za mnoj». Pradaviec z Chiersona raskazaŭ, jak za im haniaŭsia rasijski dron
Wildberries paskaraje budaŭnictva chaba ŭ «Vialikim kamieni» na fonie atak na składy ŭ Rasii
U vyniku ŭdaru pa Kijevie zahinuli 17 čałaviek, 44 paranienyja. Najbolš achviar — ludzi, jakija čakali ciahnik
Unačy Rasija ŭdaryła pa Kijeŭščynie: 15 zahinułych
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im13
Kamientary
[Zredahavana]