Infancina adstupiŭ: płan častkovaj pryvatyzacyi čempijanataŭ śvietu pa futbole adklikany

Prezident Mižnarodnaj fiederacyi futboła (FIFA) Džańni Infancina paśla rezkich pratestaŭ futbolnych kanfiederacyj Jeŭropy, Azii i Paŭnočnaj Amieryki adklikaŭ svaju prapanovu dapuścić pryvatnych inviestaraŭ da arhanizacyi čempijanataŭ śvietu, piša Bi-bi-si.

«Uvažliva vysłuchaŭšy ŭsie mierkavańni, ja vyrazna zrazumieŭ, što hety prajekt vyklikaŭ taki raskoł, što niezaležna ad uzroŭniu jaho padtrymki jon bolš nie adpaviadaje metam, dziela jakich byŭ prapanavany», — pieradaje zajavu šviejcarca Infanciny ahienctva Reuters.

Prajekt Infancina samym rašučym čynam asudzili futbolnyja kanfiederacyi Jeŭropy, Paŭnočnaj i Centralnaj Amieryki, a taksama Azii. Heta aznačała, što jaho prapanova, chutčej za ŭsio, usio roŭna nie nabrała b bolšaści hałasoŭ u FIFA: u hetyja try kanfiederacyi ŭvachodzić amal dźvie traciny nacyjanalnych futbolnych fiederacyj i sajuzaŭ śvietu.

«FIFA pavinna spynić vykarystoŭvać naš sport dziela ŭłasnaha ŭzbahačeńnia i ŭzbahačeńnia svaich siabroŭ», — zajaviŭ Sajuz jeŭrapiejskich futbolnych asacyjacyj (UEFA).

Płan z udziełam Kušniera

Płan Infancina, pra isnavańnie jakoha FIFA aficyjna paviedamiła 28 lipienia, praduhledžvaŭ stvareńnie pry Mižnarodnaj fiederacyi futbolnych asacyjacyj kamiercyjnaj daččynaj kampanii FIFA Forward Enterprise (FFE), jakaja zajmałasia b arhanizacyjaj spabornictvaŭ pad ehidaj FIFA.

Minarytarnyja doli ŭ hetaj kampanii, jakija nie davali b kantrolu nad joj, prapanoŭvałasia pradavać pryvatnym inviestaram.

Pavodle zadumy Infancina, hrupu pieršych inviestaraŭ pavinna była ŭznačalić vienčurnaja kampanija Thrive Eternal («Viečny roskvit»), stvoranaja Džošua Kušnieram — bratam Džareda Kušniera, ziacia prezidenta ZŠA Donalda Trampa. Firma była zasnavana pry vienčurnaj kampanii Džošua Kušniera Thrive Capital Management usiaho try miesiacy tamu, naprykancy krasavika.

U piatnicu Donald Tramp zajaviŭ, što nie abmiarkoŭvaŭ hetyja płany ź Infancinam. Padčas svajho druhoha prezidenckaha terminu Tramp padtrymlivaŭ vielmi ciesnyja adnosiny z kiraŭnikom FIFA, u tym liku tamu, što čempijanat śvietu ŭ hetym hodzie prachodziŭ hałoŭnym čynam u ZŠA. U śniežni, padčas žarabjoŭki turniru, Infancina ŭručyŭ Trampu śpiecyjalna zasnavanuju dla jaho «Premiju miru FIFA».

Adzin ultymatum i dva pratesty z troch častak śvietu

Na ekstranym pasiadžeńni ŭ čaćvier UEFA vyrašyŭ bajkatavać turniry pad ehidaj FIFA, u tym liku čempijanaty śvietu, kali Infancina nie admovicca ad svajho płana.

«My adnahałosna i biezumoŭna adchilajem prapanovu FIFA pieradać pravy ŭłasnaści na čempijanat śvietu i inšyja turniry pad ehidaj FIFA pryvatnym inviestaram […] Nivodnaja nacyjanalnaja zbornaja, jakaja ŭvachodzić u UEFA, nie budzie ŭdzielničać u jakich-niebudź spabornictvach FIFA, pakul hetaja prapanova zastajecca ŭ sile, pakul jana nie budzie poŭnaściu adklikana i pakul my nie atrymajem jurydyčna abaviazkovych harantyj, što FIFA bolš nikoli nie dapuścić pryvatnych ułaśnikaŭ da kiravańnia svaimi turnirami», — zajaviŭ UEFA.

Praź niekalki hadzin jeŭrapiejcaŭ padtrymała KANKAKAF — kanfiederacyja Paŭnočnaj i Centralnaj Amieryki i Karybskaha basiejna, a na nastupny dzień da ich dałučyłasia Azijackaja futbolnaja kanfiederacyja (AFK).

KANKAKAF i AFK, u adroźnieńnie ad UEFA, nie pahražali bajkotam, ale taksama vielmi rezka raskrytykavali Infancina.

Astatnija try kanfiederacyi — Paŭdniovaj Amieryki, Afryki i Akijanii — aficyjnych zajaŭ nie rabili i płanavali abmierkavać prapanovu Infanciny ŭ žniŭni.

Adstaŭka daradcy i zajava vykanaŭčaha dyrektara

U piatnicu ŭ znak pratestu padaŭ u adstaŭku Karłas Kardejra, jaki amal piać hadoŭ byŭ starejšym daradcam Infancina pa hłabalnaj stratehii i kiravańni, a taksama pradstaŭlaŭ FIFA ŭ rabočaj hrupie Biełaha doma pa padrychtoŭcy da čempijanatu śvietu 2026 hoda.

«Zadača FIFA — nie luboj canoj maksimalna pavialičvać kamiercyjny prybytak, a abaraniać i ŭmacoŭvać futboł dla budučych pakaleńniaŭ, — napisaŭ jon. — Kali hetyja pryncypy ŭstupajuć u supiarečnaść, futboł pavinien być na pieršym miescy».

«Bolš za ŭsio niepakoić adsutnaść adkazaŭ na fundamientalnyja pytańni, — dadaŭ jon. — Navošta patrebnaja hetaja ździełka? Čamu mienavita ciapier? Jakim budzie kantrol? Kamu heta vyhadna?»

U toj ža dzień z rezkaj zajavaj vystupiŭ vykanaŭčy dyrektar FIFA Kievin Łamur, abvinavaciŭšy Infancina ŭ tym, što toj padmanuŭ supracoŭnikaŭ arhanizacyi. Naprykancy svajoj zajavy jon napisaŭ, što, navat kali stracić praz heta pracu, zatoje zmoža spać spakojna.

«Toje, pra što było abvieščana dniami, i toje, što adbyvałasia za kulisami apošnija niekalki miesiacaŭ, nie ŭkładvajecca ŭ hałavie i zdajecca niejmaviernym», — havaryłasia ŭ pieradadzienaj presie zajavie Łamura.

«Administracyi FIFA stanovicca ŭsio ciažej pracavać u takich umovach i vykonvać svaju misiju, — pisaŭ jon. — Ja nie ŭpaŭnavažany vystupać ad imia svaich kaleh i, mahčyma, pamylajusia. Ale ŭ mianie skłałasia ŭražańnie, što ŭsie my chočam hanarycca tym, što pracujem u FIFA, a siońnia, na žal, mnohim z nas užo tak nie zdajecca».

Pra płan Infancina vykazaŭsia navat novy premjer-ministr Vialikabrytanii Endzi Bierniem, nazvaŭšy jaho aburalnym.

«Sam fakt taho, što hetaja ideja naohuł mahła być vyłučana, pakazvaje, što, na moj pohlad, jon — nie toj čałaviek, jaki pavinien uznačalvać hetuju arhanizacyju», — skazaŭ Bierniem.

Biednyja krainy mahli b padtrymać

Jak ličać ekśpierty, płan Infancina mahli b padtrymać futbolnyja čynoŭniki mnohich niebahatych krain, pakolki jon praduhledžvaŭ pavieličeńnie subsidyj ad FIFA.

U liście z tłumačeńniami, razasłanym nacyjanalnym fiederacyjam 29 lipienia, Infancina paabiacaŭ, što ŭ vypadku pryniaćcia prajekta ŭ nastupnym finansavym cykle, jaki pačniecca 1 studzienia 2027 hoda, kožnaja nacyjanalnaja asacyjacyja budzie atrymlivać da 40 miljonaŭ dołaraŭ.

Usiaho ŭ ramkach prajekta FFE płanavałasia pryciahnuć dadatkova 20 miljardaŭ dalaraŭ.

Rodžers Bjamukama ź Fiederacyi futboła Uhandy adznačyŭ, što, naprykład, jeŭrapiejskija asacyjacyi značna mienš zaležać ad finansavańnia FIFA, čym asacyjacyi ŭ inšych rehijonach śvietu.

«Naprykład, va Uhandzie FIFA prafinansavała šerah infrastrukturnych prajektaŭ za košt srodkaŭ, atrymanych ad prodažu biletaŭ na čempijanat śvietu i ad sponsaraŭ. Akramia taho, FIFA finansuje mnostva prahram na nizavym uzroŭni, u tym liku futbolnyja škoły», — rastłumačyŭ Bjamukama.

Tamu, na jaho dumku, luby sposab pryciahnuć dadatkovyja resursy možna ličyć karysnym.

• 3
• 0
• 0
• 1
• 0
• 0
• 0
• 0