U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami
Baćka Fryskie ŭ adkaz pahražaje pazbavić unuka spadčyny. Kaža, što kali nie sustreniecca z Płatonam, dyk zaviaščaje kvateru svajoj inšaj unučcy.
15 červienia była hadavina śmierci znakamitaj rasijskaj śpiavački Žanny Fryskie. Z hetaj nahody jaje ŭdaviec Dźmitryj Šepieleŭ napisaŭ vialiki dopis u svaich sacsietkach — pryśviaciŭ jaho biełaruski šoŭmien ich ahulnamu synu Płatonu i jaho svajakam pa maci.
Jon raspavioŭ, što na stale 13‑hadovaha chłopčyka staić vialikaje fota mamy.
«Siońnia my z Płatonam kupim kvietki, jak zaŭsiody ŭ hety dzień, i mocna abdymiem adzin adnaho. «Nie zabyvaj, mama zaŭsiody pobač», — paŭtaraju jamu adny i tyja ž słovy. Ja baču jaje praciah u Płatonie: uśmiešku, žesty, jany navat maŭčać padobna. Žanna zaŭsiody pobač. Jana zastajecca z nami cicha, kožny dzień, biez daty ŭ kalendary. Jak moža być inakš? Pamiać pra jaje naležyć našamu synu, našaj siamji i miljonam ludziej, jakija jaje lubili i dla jakich jana stała vobrazam svajho času — jarkaja, talenavitaja, takaja pryhožaja».
Dźmitryj padkreśliŭ, što jamu samomu ŭžo 43 hady — bolš, čym było Fryskie, kali jana pamierła. I dadaŭ, što z kožnym hodam jon usio bolš spačuvaje baćkam Žanny, jakija rana zhubili dačku.
Viadučy pryznaŭsia, što za hety čas atrymaŭ ad ich dziasiatki prośbaŭ sustrecca z unukam — ale kožny raz admaŭlaŭ.
Dźmitryj ahučyŭ i pryčynu takoha žorstkaha rašeńnia. Maŭlaŭ, babula i dziadula chacieli pabačyć Płatona ŭ televizijnaj studyi pad kamierami i na publicy. Šepieleŭ zapeŭnivaje, što inšych varyjantaŭ, akramia sustreč u efiry, jamu nie prapanoŭvali.
«Mnie vielmi horka ad taho, što samyja blizkija ludzi dla Płatona niezvarotna ŭpuścili jaho dziacinstva, nie byli pobač u zvyčajnyja dni, biez kamier i nahod. Heta toje, što nielha viarnuć i nielha pieraźniać. Ja płaču, kali dumaju pra heta. Heta ich vybar, ich bol, i ja nie mahu heta źmianić».
Šepieleŭ padkreśliŭ: jak baćka jon maje prava vyrašać, z kim budzie bačycca jaho syn. Ale sustrečy Płatona z kimści nie pavinny pieraŭtvaracca ŭ materyjał dla efiru, bo siamja — heta nie kantent: «Ja kažu heta spakojna i biez kryŭdy: toje, što adbyvajecca pamiž blizkimi ludźmi, nie maje patreby ŭ zdymkach i mantažy».
Pra Płatona viadučy raspavioŭ, što toj raście ŭ lubovi i spakoi — i heta ŭsio, što pra jaho treba viedać inšym ludziam.
Treba adznačyć, što ŭžo šmat hadoŭ Šepieleŭ žyvie z dyzajnierkaj Kaciarynaj Tułupavaj. Paznajomilisia jany ŭ 2016 hodzie (syn Dźmitryja i dačka Kaciaryny chadzili ŭ adzin sadok), u 2021 hodzie ŭ ich naradziŭsia ahulny syn Cichan. Ale aficyjna para zarehistravała šlub tolki letaś.
U kamientary da dopisu Dźmitryja pryjšła i chrosnaja Płatona — televiadučaja i śpiavačka Volha Arłova, jakaja była blizkaj siabroŭkaj Žanny Fryskie. Raniej u intervju Arłova raspaviadała, što apošni raz bačyła chłopčyka, kali tamu było dva hady. Paśla jana nieadnojčy prasiła ŭ Dźmitryja pra sustreču z chreśnikam, ale toj admaŭlaŭ. Volha vykazvała zdahadku: imavierna, pryčyna ŭ tym, što jana asacyjujecca ŭ Šepieleva z tym časam, jaki toj nie choča ŭspaminać.
U kamientarach Arłova napisała: «Dzima, dazvol mnie, kali łaska, sustrecca z Płatonam. Biez kamier, telestudyj i kantentu». Šepieleŭ adkazaŭ łakanična: «Volha, napisaŭ tabie ŭ dyrekt».
Dopis Šepieleva aburyŭ 73‑hadovaha baćku Žanny Fryskie. Uładzimir prakamientavaŭ žurnalistam abvinavačvańnie baćki svajho ŭnuka: «Jon schavaŭ Płatona i niedzie napisaŭ, što my chočam tolki praz kamieru bačycca. My jaho 12 hadoŭ nie bačyli! Što my chočam? Praź jakija kamiery? Chto pra što damaŭlajecca? U nas navat jaho kantaktaŭ niama, nie zrazumieju, da čaho jon heta. My ź im nie razmaŭlajem šmat hadoŭ».
Uładzimir Fryskie zajaviŭ, što jaho siamja sprabavała vyjści na suviaź z Płatonam: pisali chłopcu ŭ sacsietkach, źviartalisia ŭ škołu i da novaj kachanaj Dźmitryja. Ale ž taja nie zachacieła być pasrednicaj u hetym pytańni. Samoha Šepieleva baćka Žanny Fryskie bačyć nie choča.
Uładzimir Fryskie pahražaje: kali im nie dazvolać pabačyć unuka, dyk babula ź dziadulam mohuć pakinuć jaho biez spadčyny. Havorka idzie pra maskoŭskuju kvateru Žanny Fryskie, jakuju paśla śmierci dački atrymali jaje baćki. Elitnuju nieruchomaść ryełtary aceńvajuć pryblizna ŭ 830‑970 tysiač dalaraŭ.
Baćka Žanny kaža, što, kali nie sustreniecca z Płatonam, moža pakinuć kvateru ŭnučcy ad svajoj inšaj dački Natalli:
«Treba razumieć, što ja ŭžo nie małady čałaviek i kali kryj boža zdarycca… Dyk usie zastanucca bieź ničoha, treba vyrašyć hetyja pytańni. My nie bačym unuka, niezrazumieła, jak dalej. Ja vyrašyŭ, što kali nie źmienicca, to chutka pierapišu ŭsio na małodšuju ŭnučku, na Łuniašu, tady Płatoša zastaniecca bieź ničoha».
Biełarus Dźmitryj Šepieleŭ raskazaŭ padrabiaznaści chvaroby, lačeńnia i śmierci Žanny Fryskie
Biełarus Dźmitryj Šepieleŭ straciŭ pracu na rasijskim telebačańni
Biełarus Šepieleŭ, jaki niadaŭna staŭ viadoŭcam prahramy na «Rośsija 1», naviedaŭ Maryupal. Raniej jon vybačaŭsia pierad ukraincami
«Tak nie pavinna, tak nie moža praciahvacca». Dźmitryj Šepieleŭ prakamientavaŭ źbićcio Maksima Charošyna
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami11
Kamientary