Biełaruska znajšła italjanskuju siamju, jakaja pryniała jaje paśla Čarnobyla. Jana dumała, što italjancy jaje kinuli

Alena Zacharankava (Šaviardzienka), 38‑hadovaja aktrysa z Žodzina, dziciom dvojčy haściavała ŭ siamji ź italjanskaha Piezara — u miežach prahramy pryjomu dziaciej z paciarpiełych ad Čarnobyla rajonaŭ. Pryjomnaja maci skazała joj, što italjancy bolš nie chočuć jaje bačyć. Heta była chłuśnia, jakaja raskryłasia tolki praz tryccać hadoŭ. Pra heta Zacharankava raspaviała italjanskamu vydańniu Open i ŭ dopisie ŭ sacsietkach, jaki za sutki staŭ viralnym u Italii.

Zacharankava trapiła ŭ Piezara — horad u italjanskim rehijonie Marke na adryjatyčnym uźbiarežžy — u 1993 i 1994 hadach, kali joj było prykładna šeść-siem hadoŭ. Jana jeździła pa prahramie pryjomu, jakuju italjanskija siemji arhanizoŭvali dla dziaciej z terytoryj, zabrudžanych paśla avaryi na Čarnobylskaj AES, a taksama sirot.

Bijałahičnuju maci Aleny pazbavili baćkoŭskich pravoŭ, tamu dziaŭčynku raściła pryjomnaja maci. Na momant pajezdak u Italiju Alena vučyłasia ŭ škole №3 u Škłovie.

Prymała jaje ŭ Piezara biaździetnaja para prykładna 35—45 hadoŭ — Vivijana i Alfijo Buki (Viviana i Alfio Bucchi). Zacharankava zapomniła bieły dvuchpaviarchovy dom z haražom i čorny lehkavik.

Padziei dvuch pryjezdaŭ jana apisvaje padrabiazna. Pieršy raz jana pryjechała, kali ŭ domie byli tolki Vivijana i Alfijo, bieź pierakładčyka, a sama jana nie razmaŭlała pa-italjansku. Druhi raz — prylacieła samalotam na zimovych vakacyjach; tady, akramia «ciotki» i «dziadźki», była i babula, i Alena ŭžo mahła ich razumieć.

Pavodle jaje apoviedu, jana šmat biehała i śmiajałasia, Vivijana i Alfijo nasili jaje na rukach, dobra apranali i smačna karmili. Adzin z najiarčejšych uspaminaŭ — uźbityja z cukram jaječnyja žaŭtki, svojeasablivy italjanski hohal-mohal, jaki joj vielmi padabaŭsia.

U niejki momant Alena pačała zvać Vivijanu «mamaj»: u Biełarusi pryjomnaja maci jaje nie abdymała i nie kazała, što lubić, a sama Alena prasiłasia nazad u Italiju.

Kali Zacharankava viarnułasia ŭ Biełaruś, kantakt ź italjanskaj siamjoj pastupova zhas. Buki jašče niejki čas dasyłali pasyłki, ale suviaź słabieła.

Pavodle apoviedu Aleny, pryjomnaja maci kazała joj, što italjancy jaje nie lubiać, nie chočuć bolš bačyć i što jana «drennaja». Praz heta dziaŭčynka ŭ Italiju bolš nie jeździła. Jak jana kaža, doŭhi čas paśla hetaha joj było kiepska, jana sumavała, ale ŭrešcie źmiryłasia.

Praŭda raskryłasia tolki praz šmat hadoŭ.

U 2025 hodzie, pamirajučy, pryjomnaja maci pryznałasia, što chłusiła: Vivijana i Alfijo vielmi jaje lubili i chacieli ŭdačaryć. Pavodle taho ž apoviedu, pryjomnaja maci navat pieraviezła Alenu ŭ inšy horad, kab taja nie mahła čytać listy ad Vivijany.

Daviedaŭšysia, što italjanskaja siamja ad jaje nie admaŭlałasia, Zacharankava, pavodle jaje słoŭ, adrazu pačała pošuki. Spačatku jana źviarnułasia ŭ biełaruski dziciačy fond; joj paabiacali dapamahčy, ale supracoŭnica, jakaja zajmałasia spravaj, zvolniłasia, i Alena vyrašyła, što znajści svajakoŭ joj nie nakanavana.

Nastajaŭ na praciahu pošukaŭ jaje muž — kab jana znoŭ źviarnułasia ŭ fond i napisała ŭ sacsietkach. Ludzi ŭ Italii paraili joj apublikavać zvarot u hrupie «Pesaro è la mia città» («Piezara — moj horad») i dali veb-staronki i adrasy, kudy pisać.

15 červienia 2026 hoda Zacharankava apublikavała svoj pieršy dopis, dzie šukała Vivijanu i Alfijo «ci chacia b viestki pra ich». Zapis chutka razyšoŭsia: pad im adkazała Danieła Buki (Daniela Bucchi) — siastra Vivijany, jakaja napisała, što dobra pamiataje Alenu i źviaža jaje ź siastroj. Svajakoŭ «ciotki» znajšli litaralna za adzin dzień.

Ciapier Zacharankavaj 38 hadoŭ, jana žyvie ŭ Žodzinie, u jaje dvoje dziaciej, jana skončyła Akademiju mastactvaŭ i pracuje aktrysaj. Svaju prafiesiju jana źviazvaje ź italjanskaj «ciotkaj»: pavodle jaje słoŭ, Vivijana zaŭsiody słuchała, jak jana śpiavaje, i kazała, što ŭ dziaŭčynki pryhožy hołas.

Žančyny ŭžo abmianialisia numarami telefonaŭ, paviedamleńniami i fotazdymkami, ale pakul nie telefanavali — pieraškadžaje moŭny barjer. Zacharankava dva hady vučyć italjanskuju i zapisałasia na kursy. Jana kaža, što Vivijana zusim nie źmianiłasia i zastajecca pryhožaj.

Alena i siamja Buki spadziajucca sustrecca — abo Vivijana pryjedzie ŭ Biełaruś, abo Alena ŭ Italiju. Pavodle Zacharankavaj, dakumienty na vizu ŭžo padadzienyja.

• 32
• 1
• 2
• 1
• 0
• 12
• 0
• 9