«U nas usio spakojna». Biełaruski sanatoryj u Krymie nie papiaredžvaje haściej pra niebiaśpieku
U sanatoryi «Biełoruśsija» ŭ akupavanym Krymie zajavili, što praciahvajuć pracu, što ŭ ich «usio spakojna, stabilna i biaśpiečna». Takija zapeŭnivańni prahučali na fonie ŭsio bolš častych atak USU na paŭvostraŭ i prablem ź bienzinam i elektryčnaściu, piša telekanał «Biełsat».
«Tak, pracujem, usio pracuje, ludzi jość», — skazali karespandentu «Biełsata» jak pryvatnaj asobie ŭ sanatoryi «Biełoruśsija» ŭ Kareizie. Hetaja ŭstanova naležyć Kiraŭnictvu spravami Łukašenki.
Apošnim časam USU ŭzmacnili ŭdary pa paŭvostravie, namahajučysia zrabić ź jaho vostraŭ. Byli atakavanyja masty, što złučajuć Krym z Chiersonskaj vobłaściu, paromy, jakija kursujuć u Kierčanskim pralivie, naftavyja terminały, enierhietyčnaja infrastruktura. Pad stałymi abstrełami zastajecca suchaputny maršrut z Rasii ŭ Krym praz akupavanyja Maryupal i Mielitopal.
Akramia taho, tam pačalisia prablemy sa śviatłom, a praz adklučeńni elektryčnaści ŭźnikajuć pieraboi ŭ vodazabieśpiačeńni.
Na hetym fonie akupacyjnyja ŭłady paŭvostrava abviaścili, što prypyniajecca prodaž paliva na ŭsich AZS. A nadoječy ŭ Krymie zakryli ŭsie dziciačyja letniki «dziela harantavańnia hramadskaj biaśpieki». Hetyja zachady buduć dziejničać da 1 vieraśnia.
Zatoje ŭ biełaruskim sanatoryi zapeŭnivajuć, što ŭ ich usio dobra:
«U nas usio pracuje, istotnych źmien niama. U nas usio spakojna i stabilna, u pryncypie. Nas pakul nie zakranuli prablemy. Abiacajuć viejernyja adklučeńni śviatła (3 hadziny nie budzie, potym 3 hadziny budzie śviatło), ale sanatoryj maje hienieratar, tamu chiba što i nie pavinna nas zakranuć».
Na pytańni pra toje, ci biaśpiečna adpačyvać u Krymie, surazmoŭca adkazała, što nijakich pahroz niama:
«U nas, u pryncypie, usio spakojna, nibyta. Niama niejkich, jak vy kažacie, pahrozaŭ žyćciu. To bok usio, u pryncypie, stabilna».
Pry hetym USU atakujuć Krym ledź nie štodnia, a da taho ž sama pajezdka ź Biełarusi ŭ akupavany rehijon moža być niebiaśpiečnaju: šlach idzie praz Bransk (ci Kałuhu), Varoniež, Rastoŭ-na-Donie i Krasnadar. Akurat u Varoniežy 22 červienia ŭkraincy abstralali zavod, dzie vyrablajuć mikraschiemy dla rakiet, za čas vajny šmatkroć byli atakavanyja i Rastoŭ z Krasnadaram.
Akramia taho, aŭtobusy jeduć na paŭvostraŭ pa Krymskim moście, jaki źjaŭlajecca vierahodnaj cellu USU.
U Krymie zdaryłasia maštabnaje adklučeńnie śviatła
Ukraincy zajavili pra źniščeńnie čyhunačnaha mosta cieraz Paŭnočna-Krymski kanał
Ministr abarony Ukrainy: Najbližejšym časam Krym pieratvorycca ŭ vostraŭ
Adpačynak dla biasstrašnych i biespryncypovych: što ciapier z turami ź Biełarusi ŭ Krym?
«Adhetul ličycie jaho vostravam». Chto i jak pravodzić apieracyju «adsiačeńnia» Kryma
U Krymie na ŭsio leta zabaranili prymać hrupy dziaciej
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary