Adpačynak dla biasstrašnych i biespryncypovych: što ciapier z turami ź Biełarusi ŭ Krym?
Turfirmy i pieravozčyki praciahvajuć vazić biełarusaŭ u Krym — niahledziačy na akupavany status paŭvostrava, vajnu i prablemy z palivam.
Nakolki Krym papularny kirunak?
Da anieksii Kryma Rasijaj u 2014 hodzie hramadzianie Biełarusi zajmali treciaje miesca siarod turystaŭ na paŭvostravie.
U 2013‑m Krym naviedali kala 6 miljonaŭ turystaŭ, ź jakich kala 250 tysiač byli hramadzianami Biełarusi. Takija danyja pryvodziła Ukraina.
Naturalna, što paśla 2014 hoda patok turystaŭ ź Biełarusi mocna źmienšyŭsia, choć całkam i nie spyniŭsia.
Pavodle zajavaŭ padkantrolnaj Rasii rady rehijanalnaj nacyjanalna-kulturnaj aŭtanomii «Biełarusy Kryma», letaś amal 150 tysiač hramadzian Biełarusi naviedali akupavany Krym.
Nie tolki ź Minska
Bolšaść turaŭ, naturalna, pradajecca z vyjezdam ź Minska. Aŭtobus jedzie praz Homiel, Rastoŭ-na-Donie i dalej praz Krymski most u Krym.
U niekatorych turfirmaŭ pieršy vyjezd zapłanavany tolki 18 červienia. U inšych prahrama pačałasia 13 červienia, tamu siezon, tak by mović, tolki ŭ samym pačatku.
Aproč Minska, tury ŭ Krym pradajuć, naprykład, ź Viciebska. Pieršy vyjezd — 16 červienia, druhi — 26 červienia. Adpačynak prapanujuć tolki na ŭschodnim bierazie — u Fieadosii abo Sudaku.
Adsutnaść varyjantaŭ adpačynku na paŭdniovym uźbiarežy (rajon Jałty) u turfirmie patłumačyli tym, što tudy niemahčyma dabracca.
Pajezdka aŭtobusam ź Viciebska zajmaje kala dvuch sutak. Prajezd u Krym adbyvajecca pa moście.
Praz deficyt paliva, kažuć, turbavacca nie varta, bo aŭtobus zapraŭlajecca napoŭnicu ŭ Rasii.
Popyt prasieŭ?
Pry hetym prynamsi ŭ adnoj z turfirm pryznalisia, što sioleta kolkaść vyjezdaŭ skaraciłasia.
Tym nie mienš, treba ŭličvać, što, aproč turystyčnych pajezdak ź Minska i niekatorych inšych bujnych haradoŭ Biełarusi, jość maršrutnyja rejsy Minsk-Jałta ad «Interkarsa» (pieravozčyk «BajerTrans»)
Ź Biełarusi ŭ «Biełoruśsiju»
I ŭ adroźnieńnie ad turfirm, mnohija ź jakich abmiažoŭvajucca tolki ŭschodnim uźbiarežžam, rehularny aŭtobus jedzie nie tolki ŭ Fieadosiju, ale i ŭ Jałtu, Ałuštu i Mischor, dzie znachodzicca sanatoryj «Biełoruśsija».
Pačatkova pieravozčyk zajaŭlaŭ pra namier vykonvać rejsy na akupavany paŭvostraŭ praź dzień, ale paźniej źjaviŭsia jašče adzin dadatkovy aŭtobus ź Minska.
Takim čynam, «Interkars» płanuje vykonvać pa piać rejsaŭ na tydzień.
Na bližejšyja dni bilety kaštujuć pa 418 rubloŭ (122 jeŭra).
Ź Minska da Jałty abiacajuć dastavić za 40 hadzin. Prajezd adbyvajecca praz Homiel, Bransk, Rastoŭ.
Što da ahulnych ryzyk i ryzyki admieny rejsaŭ, to ŭ «Interkarsie» adkazali, što jany nie mohuć pradkazać i acanić ryzyki pa tym ci inšym kirunku.
«Usio, što my viedajem, — pieravozčyk nie pieranosić i nie admianiaje rejsy, usio vykonvajecca pa raskładzie», — adkazali ŭ «Interkarsie» nakont zaściaroh pry kupli biletaŭ u Jałtu.
Što kažuć ludzi?
Tema adpačynku ŭ akupavanym Krymie davoli aktyŭna abmiarkoŭvajecca na anłajnieraŭskim forumie.
Tam navat jość dźvie asobnyja temy: ahulnaja pra adpačynak u Krymie i pra pajezdki tudy na ŭłasnym aŭto.
Čakana — samyja papularnyja pytańni tyčacca prablem z palivam i biaśpiekaj.
Što da prablem z palivam, to mnohija schilajucca da taho, što dastatkova zapravić poŭny bak u Krasnadarskim krai i na tym ža palivie viarnucca nazad.
«Ahułam kažučy: kali ŭ aŭto bak litraŭ 70 i ŭ adpačynku nie raźjazdžać pa Krymie, to pra zapraŭki tam možna zabycca naohuł», — napisaŭ adzin z farumčan.
Inšy napisaŭ, što, maŭlaŭ, pierad kožnym siezonam pišuć pra prablemy z mazutam, palivam, biaśpiekaj, a nasamreč hałoŭnaj prablemaj źjaŭlajecca čarha na pravierku pry ŭjeździe.
Danieckaja vobłaść zamiest mosta
Ale jość i tyja, chto ŭžo nie raz jeździŭ u Krym padčas vajny i znoŭ płanuje jechać tudy, pryčym pa akupavanaj častcy macierykovaj Ukrainy.
«Taksama dumaju jechać, ale nie praz most, a pa novych terytoryjach, dva hady zapar jezdžu — palot narmalny», — napisaŭ adzin z farumčan.
Jość i tyja, chto amataraŭ adpačynku na paŭvostravie nazyvaje avanturystami-suicydnikami, jakim pierad pajezdkaj varta pakidać zaviaščańnie.
Niekatoryja adpisvajuć, što paśla «niezabyŭnaha adpačynku» letaś u Krym ich bolš nie ciahnie.
«Vierahodnaść sustrecca z dronami ŭ Krymie vyšejšaja, čym vy sabie ŭjaŭlajecie. Niekalki hadoŭ tamu takaja vierahodnaść vypała mnie i majoj siamji. My čuli i bačyli, jak spracavała SPA, i adbyłosia heta praktyčna nad našymi hałovami.
Bolš adčuvać takoje nie chočam. Tamu svaje pajezdki ŭ Krym adkłali da lepšych časoŭ», — napisała adna z karystalnic forumu.
Inšy kamientatar, jaki taksama ŭžo najeŭsia adpačynku ŭ Krymie, dadaŭ, što kali ŭdzień usio nibyta narmalna, to ŭ načny čas tam zusim nie spakojna praz drony.
Pry hetym siarod udzielnikaŭ forumu adhuknułasia žančyna, jakaja ŭžo 18 červienia vyjazdžaje aŭtobusam praz turfirmu.
A adzin z kamientataraŭ naohuł płanuje pajezdku na pačatak lipienia ŭ badaj samuju niebiaśpiečnuju častku ŭźbiarežža — u Jeŭpatoryju. Dy jašče i šukaje spadarožnikaŭ.
Ahułam ža mnohija schilajucca da taho, što sioleta adpačyvać tam bolš niebiaśpiečna, čym kali-niebudź raniej, tamu ad pajezdki ŭ Krym u hetym hodzie, chutčej za ŭsio, admoviacca.
Ciapier čytajuć
Adpačynak dla biasstrašnych i biespryncypovych: što ciapier z turami ź Biełarusi ŭ Krym?9
Kamientary