Rasijskija vajskoŭcy amal hod źlivali sakretnyja dakumienty i paroli ŭ adkryty čat u Telegram
Žurnalisty vydańnia ASTRA vyjavili ŭ Telegram publičnuju hrupu z krasamoŭnaj nazvaj «Bł*dskaja orhanizacija». Na praciahu amal cełaha hoda tam štodnia vykładvalisia spasyłki na zakrytyja narady kamandavańnia, a taksama sakretnyja rasparadžeńni štaba 5‑j armii RF.
U adkrytym dostupie apynulisia spasyłki na videakanfierencyi dla načalnikaŭ štaboŭ, zampalitaŭ i aficeraŭ kiravańnia 143‑ha hvardziejskaha motastrałkovaha pałka. Akramia hetaha, u čat skidvali śpisy asabovaha składu, tablicy raźmiaščeńnia kompleksaŭ videanazirańnia, zajaŭki na bojeprypasy i navat łahiny, paroli i klučy dvuchfaktarnaj aŭtentyfikacyi dla prahladu tranślacyj ź bieśpiłotnikaŭ.
Siarod uciečak znajšlisia i sakretnyja zahady štaba 5‑j armii. Tak, rasparadžeńnie ad 7 śniežnia 2025 hoda zahadvała kankretnym čaściam (uklučajučy 127‑iu motastrałkovuju dyviziju i 218‑y tankavy połk) stvarać falšyvyja pazicyi. Vajskoŭcy pavinny byli imitavać ruch techniki i palić vohniščy, a taksama zdymać heta na videa pad vyhladam «praŭkrainskich miascovych žycharoŭ», kab dezynfarmavać ukrainskuju raźviedku. U dakumientach byli prapisany dakładnyja kaardynaty hetych abjektaŭ.
Zahad ad žniŭnia 2025 hoda śviedčyŭ, što rasijskija šturmaviki niasuć surjoznyja straty praz drennaje zabieśpiačeńnie i nizkuju efiektyŭnaść robataŭ. Kamandavańnie patrabavała terminova abstalavać aŭtamatyzavanyja važki terminałami Starlink.
U sietku patrapili pachvilinnyja płany fiktyŭnych radyjoabmienaŭ dla padmanu srodkaŭ radyjoraźviedki, a taksama śpiecyjalnyja kodavyja nazvy rek u Zaparožskaj i Danieckaj abłaściach (naprykład, raka «Hajčur» nazyvałasia «Vołhaj»), jakija aficery vykarystoŭvali ŭ razmovach.
Čat abnaŭlaŭsia rehularna, pakul u kancy krasavika adzin z administrataraŭ nie zaŭvažyŭ, što ŭ hrupu pačali masava dadavacca staronnija ludzi.
«Chto dadajucca, chto takija? Ź jakoj metaj tut? Potym pačynajucca niezrazumiełyja historyi z uciečkaj dadzienych, uzłamanymi akaŭntami. Biaśpieka — pa-nad usim», — napisaŭ uładalnik adkrytaj hrupy.
4 maja kanał pierastali vieści, adnak usia historyja zastałasia adkrytaj.
Publikacyja ASTRA vyklikała šok u Z-asiarodździ. Rasijski vajenny błohier «Uholnyj iz doma» paćvierdziŭ, što ŭ suviazi sa źlivam pryjechała pravierka, i ŭ šalenstvie zaklikaŭ «padnimać žurnalistaŭ na nažy».
Pry hetym jon pryznaŭ, što vykarystańnie cyvilnych miesiendžaraŭ u armii — heta «prykry fakt», i dadaŭ, što nazvu dla čatu kamandavańnie vybrała idealnuju, bo lepš stan spraŭ u štabie i nie apišaš.
Ciapier čytajuć
«Spasibo, Lena! Prodołžajtie viesti nabludienije». Aficer, jaki pisaŭ Charysavaj, paśviŭsia ŭ čatach palitemihracyi, a niekatorym dziaŭčatam navat prapanoŭvaŭ abmianiacca niudsami9191
Kamientary
Poka sierdca dla čiesti živy,
Moj druh, otčiźnie pośviatim
Duši priekrasnyje poryvy!