«Pahroza biaśpiecy kaleh». Zazulinskaja patłumačyła, čamu ŭ «Jeŭrapiejskim vybary» pierastali daviarać Mamajevaj

Śpis «Jeŭrapiejski vybar» prakamientavaŭ rašeńnie ab vyniasieńni votumu niedavieru delehatcy Kaardynacyjnaj rady Alaksandry Mamajevaj.

Nahadajem, na minułym tydni frakcyja pierasvaryłasia — Mamajevu pasprabavali vystavić za dźviery, a jana sama nazvała hetaje rašeńnie niespraviadlivym i nieprazrystym. Pavodle jaje, pastanova prymałasia bieź jaje ŭdziełu, biez dostupu da materyjałaŭ, na jakich hruntavalisia abvinavačvańni, i biez mahčymaści dać tłumačeńni. Jana taksama zajaviła, što bačyć u hetaj historyi prykmiety palityčnaj baraćby ŭnutry śpisa.

U kamientary «Našaj Nivie» inšaja delehatka KR ad «Jeŭrapiejskaha vybaru» Volha Zazulinskaja ahučyła viersiju druhoha boku.

«Niesankcyjanavanaje kapijavańnie i pieradača kanfidencyjnaj infarmacyi trecim asobam»

Pavodle Volhi Zazulinskaj, asnoŭnaj pryčynaj votumu niedavieru stali pytańni biaśpieki.

«Padstavaj stała šmatrazovaje parušeńnie kanfidencyjalnaści z boku Alaksandry: niesankcyjanavanaje kapijavańnie i pieradača kanfidencyjalnaj infarmacyi trecim asobam, uklučajučy materyjały inicyjatyŭ i pracoŭnych hrup, a taksama piersanalnyja danyja asob, jakija prasili nie vykarystoŭvać ich imiony i danyja ŭ publičnych ci inšych materyjałach, jakija mohuć być raspaŭsiudžanyja. Pry hetym Alaksandra Mamajeva sama paćvierdziła namier raspaŭsiudžvać hetuju infarmacyju ŭsim, kamu jana paličyć nieabchodnym. Heta stvaryła pramuju pahrozu biaśpiecy nie tolki kaleh, ale i inšych asob, jakija nie datyčacca dziejnaści frakcyi i śpisu «Jeŭrapiejski vybar», — śćviardžaje jana ŭ piśmovym kamientary.

Pavodle słoŭ Zazulinskaj, padčas abmierkavańnia hetaha pytańnia ŭdzielniki pasiadžeńnia damovilisia ab poŭnaj kanfidencyjalnaści razmovy:

«Važna paznačyć, što na pačatku apošniaha pasiadžeńnia, dzie Alaksandry byli ahučany fakty, na padstavie jakich byŭ vyniesieny votum niedavieru, absalutna ŭsie ŭdzielniki byli papiaredžanyja ab tym, što pasiadžeńnie adbyvajecca na ŭmovach absalutnaj kanfidencyjalnaści, i ŭsie pahadzilisia, heta zaniesiena ŭ pratakoł pasiadžeńnia. Ale Alaksandra nastupnym rankam pačała vynosić na publiku kanfidencyjalnuju infarmacyju, tym samym parušyła ŭmovy, jakija nichto bolš nie parušyŭ».

Na pytańnie pra dokazy pieradačy ŭnutranaj infarmacyi trecim asobam u «Jeŭrapiejskim vybary» Zazulinskaja adkazvaje, što takija paćviardžeńni jość, ale ahučvać ich publična jana nie źbirajecca:

«Alaksandry byli ahučanyja kankretnyja prakłady, u tym liku tyja, što tyčacca čalcoŭ śpisa «Jeŭrapiejski vybar». My nie budziem ni ahučvać publična, ni publikavać dadzienyja materyjały, bo jany tyčacca biaśpieki tych ludziej, jakija nam davieryli svaje materyjały. Ale da ŭsich čalcoŭ śpisa byli daviedzienyja kankretnyja fakty. Vy pavinny razumieć, što my žyviom u toj čas, kali biaśpieka na pieršym płanie. Ja zaŭždy kažu: my na vajnie, sami pavinny dbać pra siabie i svaju biaśpieku».

«Kalektyŭnaja praca padavałasia jak asabistaja»

Jašče adna hrupa pretenzij datyčyć aŭtarstva dakumientaŭ i spravazdač.

Pavodle Volhi Zazulinskaj, unutry śpisa nieadnarazova ŭźnikali pretenzii da taho, što vyniki supolnaj pracy padavalisia jak asabistyja dasiahnieńni Mamajevaj.

«Šmatlikija dakumienty, spravazdačy, jakija rychtavała Alaksandra i padavała jak svaje, choć nasamreč jany źjaŭlajucca vynikam kalektyŭnaj pracy. Ale pa vynikach kalektyŭnaja praca padajecca jak asabistaja, kalehi nie zhadvajucca ni na adnym z uzroŭniaŭ kamunikacyi», — śćviardžaje Zazulinskaja.

«Jana sama pakinuła pasiadžeńnie»

Adkazała jana i na abvinavačvańni nakont pracedury.

Alaksandra Mamajeva śćviardžaje, što nie mieła mahčymaści aznajomicca z materyjałami i adkazać na pretenzii. Adnak Zazulinskaja davodzić, što situacyja vyhladała inakš.

Pavodle jaje słoŭ, Mamajeva prysutničała na pasiadžeńni i aktyŭna ŭdzielničała ŭ jaho pieršaj častcy.

«Na pačatku pasiadžeńnia ŭ Alaksandry niekalki razoŭ zapytvalisia, ci maje jana mahčymaść prysutničać na pasiadžeńni i brać udzieł. Jana paćvierdziła, što tak. Tym bolš, u pieršaj pałovie pasiadžeńnia, kali abmiarkoŭvałasia inšaja tema, jana aktyŭna brała ŭdzieł u abmierkavańni.

Alaksandry byli začytanyja ŭsie materyjały, bolš za toje: joj dali słova, kab jana mieła mahčymaść spakojna i abhruntavana adkazać na kožny z punktaŭ. Alaksandra admoviłasia kamientavać, sama pakinuła pasiadžeńnie. Usio zanatavana ŭ pratakole», — kaža Volha Zazulinskaja.

Što budzie dalej z mandatam Mamajevaj

Paśla vyniasieńnia votumu niedavieru ŭźnikła pytańnie, ci budzie «Jeŭrapiejski vybar» damahacca pazbaŭleńnia Mamajevaj mandata ŭ Kaardynacyjnaj radzie.

Volha Zazulinskaja adkazvaje admoŭna. Razam z tym u śpisie adznačajuć, što nie bačać mahčymaści dla pradstaŭnictva Mamajevaj ad imia «Jeŭrapiejskaha vybaru» ŭ Kaardynacyjnaj radzie čaćviortaha sklikańnia.

«Hetaje rašeńnie tyčycca śpisa «Jeŭrapiejski vybar». Alaksandra źjaŭlajecca delehatkaj Kaardynacyjnaj rady 3‑ha sklikańnia, my nie źbirajemsia i nie možam pazbaŭlać jaje hetaha mandata. Ale jaje pradstaŭnictva ŭ śpisie «Jeŭrapiejski vybar» u Kaardynacyjnaj radzie 4‑ha sklikańnia nie pradstaŭlajecca mahčymym. Adznaču, što da pieršaha pasiadžeńnia niama dziejnych delehataŭ KR-4, jak niama i frakcyj u statutnym sensie, jość śpisy. Nichto nie moža źmianić vynikaŭ vybaraŭ, ale mandat uźnikaje paśla pieršaha ahulnaha pasiadžeńnia», — adznačyła Volha Zazulinskaja. 

Alaksandra Mamajeva była delehatkaj KR treciaha sklikańnia i kiraŭnicaj Mižnarodnaj kamisii KR, udzielničała ŭ stvareńni Narodnych ambasad Biełarusi. Z 2015 hoda žyvie ŭ Słavienii. U listapadzie 2025 hoda jana zajaŭlała pra sproby viarboŭki z boku KDB.

Na vybarach u KR apošniaha sklikańnia Alaksandra Mamajeva išła ŭ śpisie «Jeŭrapiejskaha vybaru» na piataj pazicyi. Na šostaj pazicyi ŭ śpisie była Alina Charysava, jakaja, jak vyjaviłasia, pieradavała infarmacyju ahientam łukašenkaŭskich śpiecsłužbaŭ, jakija vydavali siabie za supracoŭnikaŭ Słužby biaśpieki Ukrainy.

• 0
• 0
• 1
• 1
• 0
• 0
• 0
• 0