«Hałoŭnaja krynica vydatkaŭ — heta časta adnosiny». Ajcišnik raskazaŭ, jak za try hady kupiŭ kvateru ŭ Tbilisi z zarobku

«U mianie ŭžo była kvatera ŭ Minsku. Taksama kupiŭ całkam za ŭłasnyja srodki, biez kredytu. Ciapier ja jaje zdaju, a hrošy baćki składajuć u asobnuju skarbonku.

Kvateru ŭ Tbilisi ja kupiŭ nie za košt hetaj arendy, a za košt zarobku za try hady.

Častka finansaŭ prosta lažała ŭ dalarach i jeŭra. Ale bolšuju častku ja inviestavaŭ u niekalki amierykanskich ETF-fondaŭ. Potym u niejki momant vyvieŭ hrošy i vyrašyŭ kupić nieruchomaść. Vybiraŭ ETF na S&P 500, Nasdaq i jašče niekalki asobna padabranych z akcyjami rostu i doŭhaterminovymi ablihacyjami ZŠA. Usio heta było praz brokiera, dastupnaha z našym pašpartam.

Pieršapačatkova ŭ mianie nie było kankretnaj mety: «kupić kvateru za najaŭnyja». Metaj było prosta kapić hrošy.

U mianie kvatera ŭ centry horada z dvuma spalniami. Heta druhasnaje žyllo, užo hatovaje da pražyvańnia, kaštavała 145 tysiač dalaraŭ.

Ja šmat tarhavaŭsia, u mianie nie było bolš hrošaj na rukach. Kali b haspadynia nie pahadziłasia, ja b albo ŭziaŭ inšy varyjant, albo ŭvohule nie kuplaŭ kvateru.

Ja vielmi niervavaŭsia, pakul my rychtavalisia da ździełki i zaklučali jaje. Heta vielmi adkaznaje rašeńnie. Ja šmat sumniavaŭsia i dumaŭ, nakolki pravilny vybar rablu: ci nie lepš pakinuć hrošy jak jość, ci nie lepš praciahvać trymać ich u inviestycyjach, ci nie zanadta ryzykoŭna kuplać nieruchomaść mienavita ciapier.

Udałosia znajści varyjant, jaki nie patrabavaŭ uvohule nijakich układańniaŭ. Heta było važna: ja nie chacieŭ paśla pakupki jašče rabić ramont, šukać rabočych, ličyć dadatkovyja vydatki i žyć u viečnych dapracoŭkach.

My tam žyviom. I, spadziajusia, budziem žyć i dalej. Kali daviadziecca źjechać z Tbilisi, pastarajemsia zdać kvateru kamuści sa znajomych. Na ščaście, ich tut šmat.

«Mnie nie treba siabie kantralavać»

Časta kažuć: čym bolš dachody, tym bolš vydatki. Ale heta nie zusim pra mianie. Mnie nie treba siabie śpiecyjalna kantralavać. Usio zapisvaju ŭžo bolš za 10 hadoŭ.

Karystajusia krychu madyfikavanym padychodam z knihi Daniela Kaniemana «Dumaj pavolna, vyrašaj chutka».

U momancie ja zvyčajna nie zadumvajusia pra vydatki. A ŭ kancy miesiaca, kali vydatki pačynajuć raści, analizuju, adkul uziaŭsia rost i ci možna jaho skaracić. I nijakich impulsiŭnych pakupak.

Kali nabližajecca płanavanaje abnaŭleńnie techniki, ja paŭhoda čytaju ahlady i dumaju, ci sapraŭdy mnie heta treba. Mahčyma, jašče dapamahaje ekanomić maja pryncypovaja ćviarozaść: ałkahol nie ŭžyvaju navat pa śviatach, chacia lublu biezałkaholnaje piva.

«Hałoŭnaja krynica vydatkaŭ — heta časta adnosiny»

Hledziačy na znajomych, ja baču, što ŭ bolšaści vypadkaŭ hałoŭnaja krynica vydatkaŭ — heta žančyna. Naprykład, u majho siabra na žonku-fieministku sychodzić bolš hrošaj, čym na siabie i na ŭsie ahulnyja abaviazkovyja vydatki nakštałt praduktaŭ abo arendy. Tamu jon usio nijak nie moža pačać nazapašvać.

Mnie pašancavała bolš — maja žonka zdolnaja sama siabie zabiaśpiečvać. U jaje jość pastajanny dachod. Usie svaje žadańni jana ŭ asnoŭnym zakryvaje sama. Tamu ja mahu kancentravacca na budučyni siamji.

Siarod maich znajomych-ajcišnikaŭ, jakija sustrakajucca ź dziaŭčatami ź psichałahičnym uzrostam starejšym za try hady, prablema kupli žylla nie staić — prynamsi va Uschodniaj Jeŭropie. Niekatoryja, jak ja, navat vyrašyli žyllovaje pytańnie dvojčy: spačatku ŭ Minsku, a potym jašče ŭ emihracyi.

Jość u mianie siabar-raspracoŭščyk, u paraŭnańni ź jakim ja vyhladaju biezadkazna marnatraŭnym. Jon vielmi rezka reahuje na lubyja prapanovy žonki patracić hrošy.

U jaho ŭ 35 jość kvatera ŭ Minsku i dom u haradskoj miažy — usio biez dapamohi baćkoŭ. Niadaŭna ŭ ich naradziłasia dzicia, tamu apošni hod my mała majem znosiny, i ja ŭsio nijak nie dabiarusia spytać, jak jany ciapier arhanizujuć biudžet.

Doŭhija hady baču ŭ znajomych dziaŭčat zapyt na «ščodraha mužčynu». Apošnim časam mienavita ad takich par hučniej za ŭsio čujucca skarhi na nibyta «niedastupnuju nieruchomaść». Tyja, chto vybraŭ «skupych», naradžajuć i vychoŭvajuć dziaciej u kamfortnych umovach, i ich hetyja prablemy nie chvalujuć», — kaža Siarhiej.

Dumka raskazčyka moža nie adlustroŭvać pazicyju Devby.io ci «Našaj Nivy»

• 4
• 0
• 4
• 7
• 1
• 0
• 0
• 0