U centry kiravańnia pieravozkami Biełaruskaj čyhunki ceły pavierch adviali vajskoŭcam
Pavodle infarmacyi, jakuju apublikavała Supolnaść čyhunačnikaŭ Biełarusi sa spasyłkaj na ŭłasnyja krynicy, u budynku Centra kiravańnia pieravozkami Biełaruskaj čyhunki ŭ Minsku kala hoda na pastajannaj asnovie znachodzicca hrupa pradstaŭnikoŭ vajskovych struktur.
Paviedamlajecca, što asnoŭnuju častku hrupy składajuć orhany Upraŭleńnia vajskovych znosin Ministerstva abarony Biełarusi, jakija zajmajucca arhanizacyjaj i supravadžeńniem vajskovych pieravozak. Taksama, pavodle hetych źviestak, u jaje ŭvachodziać śpiecyjalisty pa suviazi, abaronie sakretnaj infarmacyi i inšyja vajskovyja padraździaleńni.
Kali raniej vajskoŭcy mieli ŭ Centry niekalki pracoŭnych miescaŭ dla kaardynacyi asobnych pieravozak, to ciapier, jak śćviardžajecca, im pieradali ŭvieś 8‑y pavierch budynka płoščaj kala 600 kvadratnych mietraŭ. Raniej tam znachodzilisia padraździaleńni Kanstruktarska-techničnaha centra BČ, jakija paśla byli pieramieščanyja na 9‑ty pavierch.
Pavodle śviedčańnia krynic Supolnaści čyhunačnikaŭ Biełarusi, pavierch byŭ pierapłanavany, dostup da jaho abmiežavali, ustanavili asobny prapuskny režym i arhanizavali kruhłasutačny ŭzbrojeny post. Prostyja supracoŭniki čyhunki bieź śpiecyjalnaha dazvołu trapić tudy nie mohuć.
Kolkaść raźmieščanych vajskoŭcaŭ aficyjna nie raskryvajecca. Pavodle acenak krynic, ich moža być kala 20—30 čałaviek. Supolnaść čyhunačnikaŭ Biełarusi miarkuje, što taki farmat śviedčyć pra bolš ciesnuju intehracyju vajskovych struktur u sistemu apieratyŭnaha kiravańnia čyhunačnymi pieravozkami.
Pavodle aŭtaraŭ materyjału, stvareńnie hetaj struktury pačałosia prykładna za hod da hetaha — u pieryjad padrychtoŭki da vučeńniaŭ «Zachad-2025». Jany źviazvajuć heta z pavyšanaj uvahaj da arhanizacyi vajskovych pieravozak i vykarystańniem biełaruskaj čyhunačnaj infrastruktury ŭ intaresach vajskovych struktur.
Aficyjnych paviedamleńniaŭ ad Biełaruskaj čyhunki abo Ministerstva abarony Biełarusi, jakija b paćviardžali abo abviarhali hetuju infarmacyju, na momant publikacyi nie było.
Most cieraz čyhunku miž Kaleśnikava i Cimirazieva ŭ Minsku ŭzvodziać dzień i noč
Biełčyhunka pryznačyła na lipieńskija padoŭžanyja vychodnyja dadatkovyja ciahniki
Biełaruś jašče bolš pavialičyła pastaŭki bienzinu i dyzielnaha paliva ŭ Rasiju
65‑hadovaha hamielčuka asudzili za sprobu dyviersii na čyhuncy i zdradu dziaržavie. Što viadoma?
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy11
Kamientary