Most cieraz čyhunku miž Kaleśnikava i Cimirazieva ŭ Minsku ŭzvodziać dzień i noč

Zbudavańnie ŭzvodzicca sa zborna-manalitnych apor i žalezabietonnych zbornych belek. Płanujecca ŭładkavać 11 pralotaŭ z belkami pa 33 m i jašče adzin pralot daŭžynioj 18 m. Usiaho spatrebicca 13 apor.

Pierš čym prystupić da budaŭnictva, była praviedziena maštabnaja padrychtoŭčaja rabota.

— Na hetym učastku prysutničajuć praktyčna ŭsie vidy inžyniernych kamunikacyj, tamu praciahvajecca pieranos elektryčnych sietak, vadapravoda, liŭnievaj kanalizacyi i inšych abjektaŭ. Akramia taho, paralelna viaducca raboty pa ŭładkavańni svajnaha pola i apor puciepravoda, — adznačyŭ namieśnik dyrektara pradpryjemstva «Hardarbud» Michaił Bieraścievič.

— Siońnia z boku vulicy Kaleśnikava ŭzvodziacca apory, na fundamientnyja słupy ŭstaloŭvajucca stojki. Raboty vykonvajucca paetapna, pa miery pieranosu inžyniernych sietak. U mai pačaŭsia mantaž pieršaha pralotnaha zbudavańnia. Z boku vulicy Cimirazieva taksama ŭstaloŭvajucca apory, praciahvajecca ŭźviadzieńnie buranabiŭnych słupoŭ padmurkaŭ. U płanach — da kanca červienia pačać mantaž pralotnych zbudavańniaŭ i na hetym učastku.

Pavialičyć

Pastaŭlena zadača całkam zaviaršyć budaŭnictva ŭ maksimalna ścisłyja terminy. Dla hetaha tam, dzie nie pravodziacca šumnyja raboty, śpiecyjalisty pracujuć kruhłasutačna vachtavym mietadam.

— Kali raspačniom uładkavańnie darožnaha pakryćcia, z boku vulicy Cimirazieva taksama piarojdziem na kruhłasutačny režym pracy, — dadaŭ namieśnik dyrektara «Hardarbuda».

Novy puciepravod uvojdzie ŭ piaciorku samych praciahłych u horadzie — daŭžynia hatovaha zbudavańnia składzie kala 380 m.

Šyrynia budzie varjiravacca ad 41,3 da 47,8 m. Pašyreńnie praduhledžana z boku vulicy Cimirazieva. Takoje rašeńnie pryniata nievypadkova: nieabchodna arhanizavać dadatkovyja pałosy dla prava– i levapavarotnych źjezdaŭ, pakolki pobač z puciepravodam z hetaha boku budzie znachodzicca skryžavańnie. Ruch budzie šaścipałosnym — pa try pałasy ŭ kožnym kirunku.

Abapał praduhledžany chodniki, pryčym adzin ź ich budzie sumieščany z ravarovaj darožkaj. Kab adździalić prajeznuju častku ad piešachodnych zon, ustalujuć parapietnuju žalezabietonnuju aharodžu.

Nahadajem, što prajekt realizujecca ŭ dźvie čarhi. Pieršaja ŭklučaje padrychtoŭčyja raboty, druhaja — niepasredna budaŭnictva puciepravoda. Paśla zaviaršeńnia pieršaj čarhi źmienicca schiema ruchu hramadskaha transpartu: ciapier aŭtobusy pavaročvajuć u zavułak Kaleśnikava, a ŭ budučyni buduć ruchacca prama i pavaročvać na vulicu Lucynskuju.

Što datyčycca prastory pad zbudavańniem, razhladajecca mahčymaść arhanizacyi tam parkovačnych miescaŭ.

Pavialičyć

Puciepravod praz čyhunku ŭ rajonie vulic Kaleśnikava — Cimirazieva źjaŭlajecca častkaj maštabnaha prajekta pa raźvićci transpartnaj infrastruktury stalicy.

Nastupnyja etapy praduhledžvajuć:

praciah vulicy z puciepravodam nad čyhunkaj u rajonie vulic Čurlonisa — Karžanieŭskaha;

budaŭnictva novaj vulicy ad vulicy Ćvirki da 1‑ha zavułka Kalcova.

Akramia taho, płanujecca:

— budaŭnictva novaha ŭčastka vulicy pamiž vulicami Malinina i Stanisłava Maniuški z mostam praź Śvisłač;

— uźviadzieńnie ŭčastka vulicy ad vulicy Sierova da vulicy Špileŭskaha z puciepravodam nad čyhunkaj.

• 0
• 0
• 0
• 0
• 1
• 0
• 0
• 0