Vučebka ŭ Pskovie, abiacańnie anulavać kredyty i sudzimaści, ale ni słova pra samaje važnaje. Jak biełarusaŭ viarbujuć na vajnu
U miascovych čatach u vajbiery rassyłajuć prapanovy padpisać kantrakt ź Ministerstvam abarony Rasii — za heta aŭtamatam abiacajuć 35 tysiač dalaraŭ na ruki, a taksama anulavańnie kredytaŭ i sudzimaściaŭ.
Prapanovy rassyłajuć ź biełaruskaha numara, padpisanaha «Michaiłam». Da zhadanaha ŭ «vakansii» telefona pryviazany profil va UKantakcie žychara Viciebskaj vobłaści Anatola Bahdanava. Na jaho staroncy numar dahetul paznačany jak kantakt dla suviazi. Raniej ža jon byŭ zarehistravany na hramadzianku Hannu V.
Pa infarmacyi, jakuju «Naša Niva» atrymała ad «Biełpoła», uradženiec Połacka Bahdanaŭ mieŭ sudzimaść pa artykule 380 KK (padrobka dakumientaŭ).
U pierapiscy z žurnalistam «Našaj Nivy» tak zvany «Michaił» raskazaŭ, što pradstaŭlaje sajt easykontrakt.com i što Ministerstva abarony Rasii maje patrebu ŭ cełym bukiecie śpiecyjalistaŭ — pa jaho słovach, «ad strałkoŭ, snajpieraŭ, sapioraŭ, miechanikaŭ, kiroŭcaŭ, radyjotelefanistaŭ da kładaŭščykoŭ, sanitaraŭ i tych, chto budzie kidać hranaty». Dla ŭsich hetych kirunkaŭ praduhledžvajecca navučańnie, jakoje adbyvajecca ŭ Pskovie.
«Pačać prachodzić miedkamisiju možna choć siońnia. Pražyvańnie, charčavańnie, transpart i supracoŭnika (supravadžajučaha — NN) my vydzialajem, — udakładniŭ surazmoŭca. — Kantrakt vy padpišacie ŭ punkcie adboru».
Na prośbu pakazać uzor kantrakta «Michaił» admoviŭ.
Kali my mužčynu pazvanili hołasam, jon znoŭ pradstaviŭsia Michaiłam, abaznačyŭšy, što jon a-la mieniedžar u spravie pastaŭki biełarusaŭ u Rasiju. Praca hetaja była raspačataja im «paŭhoda tamu».
«Heta nie niejki Vasia ci Valera z Ukrainy, heta dziaržaŭny kantrakt, usio surjozna».
Na pytańnie pra ŭśviedamleńnie adkaznaści patencyjnaha adpraŭleńnia biełarusaŭ na vajnu, surazmoŭca adprečyŭ, što «nichto ž nikoha nie prymušaje, usio dobraachvotna». A taksama dadaŭ, što «nie choča palityčnych razmovaŭ». Na hetym dyjałoh skončyŭsia.
U abjavie pišuć, što prapanova «nie źjaŭlajecca najomnictvam». Adnak u kryminalnym kodeksie Biełarusi pakarańnie za ŭdzieł u bajavych dziejańniach za miažoj rehulujecca dvuma asnoŭnymi artykułami — 133 i 361‑3 — i praduhledžvaje da siami hadoŭ pazbaŭleńnia voli, kali metaj miełasia finansavaja ŭznaharoda.
Analiz adkrytych źviestak pakazvaje, što termin žyćcia ŭ rasijskich šturmavych padraździaleńniach składaje ad dvuch tydniaŭ da pary miesiacaŭ. Straty rasijskaj armii vielmi vialikija. Pa stanie na 5 červienia byli viadomyja imiony 225 019 rasijskich vajskoŭcaŭ, jakija zahinuli. Statystyka spraŭ ab spadčynie daje padstavy mierkavać, što ahulnaja kolkaść zabitych pieravysiła 352 tysiačy čałaviek. Pra heta viarboŭščyki, u tym liku i Michaił, nie kažuć.
Voś niadaŭnija realnyja historyi biełarusaŭ, jakija zavierbavalisia na vajnu va Ukrainu:
Na vajnie va Ukrainie zahinuŭ minski amapaviec
19‑hadovy kursant Akademii MUS nabiŭ sabie na łbie mišeń i pajechaŭ šturmavać Zaparožža
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć
Małady smarhonski ščypač zvolniŭsia z «Kranaspana» i pajechaŭ šturmavać Kupiansk — ciapier maci šukaje, jak atrymać mahilnyja
Pamiatajecie biełarusa-niebaraku, jakoha armianie pradali na front? Ukraincy vymieniali jaho
Cichanoŭskaja ŭ Kijevie parazmaŭlała z pałonnymi biełarusami, jakija vajavali na baku Rasii
23‑hadovy Rusłan z Žabinki zakachaŭsia ŭ rasijanku i pierajechaŭ da jaje. A tam i na front — i pražyŭ dva tydni
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna
Kamientary