«Bitłz-łend». U Livierpuli adkryjecca vielizarny muziej «Bitłz», prajekt błasłavili Poł Makartni i Rynha Star

Vizualizacyja prajekta atrakcyjona Yellow Submarine u viežy St John's Beacon

U 2028 hodzie ŭ centry Livierpula adkryjecca novy maštabny muziej, pryśviečany historyi hurta The Beatles. Jon budzie stvorany ŭ pierabudavanym budynku najbujniejšaha ŭ horadzie krytaha rynku, a ŭ znakamitaj televiežy St Johns Beacon, jakaja nad im uzvyšajecca, źjavicca prastora, pryśviečanaja multfilmu i pieśni «Žoŭtaja padvodnaja łodka», piša Bi-bi-si.

Prajekt realizuje kampanija Apple Corps, jakaja naležyć «livierpulskaj čaćviorcy», i jaho ŭžo padtrymali Poł Makartni i Rynha Star.

Ciapier paŭaficyjny muziej The Beatles pad nazvaj «The Beatles Story» znachodzicca ŭ livierpulskim Albiert-doku, jon adkryŭsia tam u 1990 hodzie. Novy muziej raźmieścicca na płoščy 9,3 tys. kv mietraŭ, heta značyć prykładna ŭ čatyry razy bolšaj, čym ciapier.

Apple Corps abiacaje, što imiersiŭnyja technałohii dazvolać naviedvalnikam muzieja litaralna paprysutničać na niekatorych hałoŭnych padziejach u historyi Beatles. U kompleksie taksama buduć vystaŭleny aryhinalnyja artefakty i ŭznoŭleny najvažniejšyja dla hurta miescy.

U tym liku naviedvalniki zmohuć pahladzieć na paślavajenny Livierpul, dzie vyraśli členy «livierpulskaj čaćviorki», razam ź imi prarabić šlach u Hamburh, apynucca ŭ kłubie Cavern, pieražyć źjaŭleńnie bitłamanii, trapić u studyju na Ebi-Roŭd, pahladzieć lehiendarny vystup na amierykanskim stadyjonie Šy i prajścisia pa pavierchach ofisa The Beatles na fiešeniebielnaj łondanskaj vulicy Sevił-Rou.

«Nieadjemnaja častka The Beatles»

«Padobna Hrejślendu [asabniak i muziej Ełvisa Preśli] abo «Dolivudu» [muziej amierykanskaj śpiavački Doli Partan], novy muziej The Beatles stanie vartym hurta słavutaściu suśvietnaha ŭzroŭniu ŭ horadzie, dzie pačałasia jaje historyja», — kaža kiraŭnik Apple Corps Tom Hryn.

Raniej Apple Corps taksama abviaściła, što ŭ 2027 hodzie adkryvaje novy muziej u Łondanie, u budynku na vulicy Sevił-Roŭ, dzie ŭ kancy 1960‑ch raźmiaščaŭsia ofis hetaj kampanii; na dachu hetaha asabniaka adbyŭsia apošni kancert The Beatles.

Poł Makartni adreahavaŭ na naviny ab źjaŭleńni novaha muzieja ŭ centry jaho rodnaha horada tak: «Ja lublu Livierpul. Jon — nieadjemnaja častka mianie i častka The Beatles. Heta prosta nievierahodna, i dla mianie vialiki honar, što ludziej pa-raniejšamu cikavić naša historyja. Budu vielmi rady ŭbačyć, jak «The Beatles Story» i «Sent-Džons-Bikan» pieraŭtvoracca takim cudoŭnym čynam u samym sercy Livierpula».

Bieź Livierpula ničoha b nie było, tak što ź nieciarpieńniem čakaju, kali ludzi zmohuć ubačyć našu historyju i pieražyć jaje razam z nami», — dadaŭ Makartni.

«Najlepšy prykład taho, što Brytanija zdolnaja dać śvietu»

Častka vyručki ad biletaŭ u novy muziej The Beatles budzie nakiravana dabračynnaj arhanizacyi, stvoranaj Apple Corps dla padtrymki livierpulskich muzykaŭ-pačatkoŭcaŭ i inšych ludziej mastactva.

Pavialičyć

U interaktyŭnaj prastory budzie pakazany šlach The Beatles ad vulic Livierpula da suśvietnaj sceny

«Livierpul byŭ i zastajecca muzyčnym horadam, — skazaŭ Rynha Star. — I ciapier my pašyrajem livierpulskuju «The Beatles Story» — jak heta kruta! Rytm praciahvajecca».

Novy muziej stvarajecca ŭ supracoŭnictvie z meryjaj Livierpula — i pry padtrymcy ŭrada Vialikabrytanii.

Jaho źjaŭleńnie prakamientavaŭ i premjer-ministr krainy Endzi Biornem: «The Beatles — heta adzin z najlepšych prykładaŭ taho, što Brytanija zdolnaja dać śvietu. Čatyry chłopcy ź Livierpula nazaŭždy źmianili muzyku i papularnuju kulturu, i bolš za 60 hadoŭ praź ich historyja ŭsio jašče daje horadu i ŭsioj krainie padstavu dla vializnaha honaru».

«Kali b nam chtości skazaŭ, što takoje zdarycca ŭ tyja časy, kali my tusavalisia i tolki pačynali, my b nikoli ŭ heta nie pavieryli», — zaklučaje Makartni.

• 1
• 0
• 0
• 0
• 0
• 0
• 0
• 0