Siamiejnaj pary rabotnikaŭ dziciačaha sadka dali za «zdradu dziaržavie» i «kantrabandu zbroi» 12 i 14 hadoŭ. Voś što kažuć siabry siamji
Dźmitryja i Taćcianu Korsakavych, rabotnikaŭ minskaha dziciačaha sadka, asudzili za zdradu dziaržavie i kantrabandu zbroi. Ukrainskaja siabroŭka Piełahii, dački Korsakavych, raskazała «Našaj Nivie», što jana viedaje pra hetuju historyju.
57‑hadovaja Taćciana Korsakava šmat hadoŭ adpracavała vychavacielkaj u dziciačym sadku №518, što ŭ minskim mikrarajonie Sokał. Pracavała jana i ź dziećmi ź inkluziŭnaj hrupy, u tym liku ź dziećmi, jakija mieli aŭtyzm. Jaje muž, 56‑hadovy Dźmitryj, zajmajecca ramontami, pracavaŭ rabočym u adnym sadku z žonkaj.
Siabroŭka Piełahii kaža, što siłaviki aryštavali Korsakavych 26 vieraśnia 2025-ha. Da Korsakavych pryjšli pad viečar, u ich zładzili vobšuk. Taksama siłaviki pazvanili Piełahii, dačce Dźmitryja i Taćciany, jakaja ciapier žyvie va Ukrainie, i prymusili Dźmitryja Korsakava skazać joj, što maci znachodzicca ŭ balnicy.
Paźniej akazałasia, što heta niapraŭda. Siabroŭka Piełahii ličyć, što na dziaŭčynu cisnuli, kab prymusić jaje viarnucca ŭ Biełaruś:
«Jany kazali joj, što jana pavinna pryjechać, kab baćkoŭ adpuścili. Maŭlaŭ, vy pavinny razumieć, što heta palepšyć situacyju», — raskazvaje surazmoŭca.
Z taho času Korsakavy znachodziacca za kratami. Dźmitryja i Taćcianu abvinavacili ŭ zdradzie dziaržavie (č.1 art. 356 KK), niezakonnych dziejańniach sa zbrojaj i bojeprypasami (č. 4 art. 295 KK) i niezakonnym pieramiaščeńni takich rečaŭ praź miažu (č.3 art. 333‑1 KK).
Dačka Korsakavych Piełahija da 2020‑ha pracavała ŭ tym ža dziciačym sadku №518, udzielničała ŭ pratestach, a ŭ vieraśni 2021‑ha pierajechała va Ukrainu.
Z pačatkam poŭnamaštabnaj vajny dziaŭčyna vyrašyła nie vyjazdžać u bolš biaśpiečnuju krainu, a vałancioryć. Akramia asnoŭnaj pracy esememščycaj, Piełahija, naprykład, zajmajecca evakuacyjaj cyvilnych asobaŭ i kaardynuje pracu vałancioraŭ u vypadkach prylotaŭ rakiet. Jana pryjazdžaje na miesca, kudy zdaryŭsia prylot, dapamahaje ludziam paśla abstrełaŭ pryvieści kvatery ŭ paradak, nakolki heta mahčyma.
Siabroŭka Piełahii kaža, što dziaŭčyna časam mahła dasłać baćkam videa, źniatyja va Ukrainie — naprykład, videa z pralotam rakiety. Mahčyma, ličyć surazmoŭca, niešta z tych videa mahło być vykarystanaje siłavikami ŭ spravie.
«Jany va Ukrainu za čas z 2022‑ha nie jeździli, tolki vyjazdžali da niejkich rodzičaŭ u Rasiju», — raskazvaje surazmoŭca.
Siłaviki sprabavali vyjści na suviaź ź Piełahijaj jašče da zatrymańnia jaje baćkoŭ. Dziaŭčynie zvanili i chłusili, što jaje maci ŭ balnicy — maŭlaŭ, tamu terminova treba, kab jana pryjechała ŭ Biełaruś i da maci.
Pra toje, u jakim stanie ciapier Korsakavy, infarmacyi niama.
«Piełahii ciažka ad toj niespraviadlivaści, što [łukašenkaŭcy] dziejničajuć fašysckimi mietadami. Heta žudasna, takoha nie pavinna być. My žyviom u XXI stahodździ, kali heta prosta nie źmiaščajecca ŭ hałavie», — kaža siabroŭka dziaŭčyny.
Dźmitryju Korsakavu prysudzili 14 hadoŭ źniavoleńnia, Taćcianie Korsakavaj — 12 hadoŭ, a taksama patrabavańnie pakryć štraf u pamiery 50 tysiač rubloŭ. Piełahii — zavočnyja 11 hadoŭ.
«Naša Niva» nie moža pravieryć ani infarmacyju, atrymanuju ad siabroŭki Piełahii Korsakavaj, ani abvinavačvańni, vystaŭlenyja ŭładami.
«Naša Niva» — bastyjon biełaruščyny
PADTRYMAĆSiamju ź Minska buduć sudzić za zdradu dziaržavie i kantrabandu zbroi. Ich, padobna, zatrymali na miažy — voś što viadoma
62‑hadovuju hramadzianku Ukrainy amal hod utrymlivajuć na Akreścina biez abvinavačvańnia
Jak mazyrski chłopiec za hrošy chadziŭ na łukašenkaŭskija mitynhi, a ŭ Šviejcaryi adkryŭ u sabie biełaruskaść
Ciapier čytajuć
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ99
Kamientary