У Расіі арыштавалі дэпартаванага беларуса. Ён цішком вярнуўся, але спаліўся, калі пайшоў у паліцыю па даведку
43‑гадовага Васіля Карпіцкага ўжо двойчы выганялі з Расіі — і, відаць, рыхтуецца трэцяя спроба. Але яму там як мёдам намазана.
Ламаносаўскі раённы суд Архангельска 18 сакавіка 2026 года асудзіў грамадзяніна Беларусі Васіля Карпіцкага за тое, што ён двойчы незаконна перасек расійскую мяжу, нягледзячы на забарону ўезду.
Ураджэнец вёскі Стайкі Аршанскага раёна Віцебскай вобласці ўпершыню трапіў пад расійскае правасуддзе ў 2022 годзе: яго асудзілі ў Нар'ян-Мары (гэта цэнтр Ненецкай аўтаномнай акругі Архангельскай вобласці Расіі) за п'янае кіраванне. Пакаранне Карпіцкі адбыў у калоніі-пасяленні, пасля чаго ўлады дэпартавалі яго ў Беларусь і забаранілі ўезд у Расію на пяць гадоў.
Але забарона яго не спыніла. Ужо 15 верасня 2023 года Карпіцкі сеў на цягнік Орша—Смаленск і зноў паехаў у Расію. Яго затрымалі і зноў дэпартавалі — на гэты раз праз Дамадзедава. І паўторна аб'явілі пяцігадовую забарону ўезду.
Зрэшты, не падзейнічала і гэта. Карпіцкі неяк праслізнуў у Расію ў канцы 2024 года ці пачатку 2025 года і дабраўся да свайго Нар'ян-Мара. Так бы і жыў ціхенька, але беларус асабіста прыйшоў у крымінальна-выканаўчую інспекцыю па даведку — так паліцэйскія і даведаліся, што ён знаходзіцца на тэрыторыі Расіі.
Суд прызнаў Карпіцкага вінаватым па двух эпізодах ч. 2 арт. 322 Крымінальнага кодэкса Расіі (незаконнае перасячэнне мяжы) і прызначыў 1 год 3 месяцы прымусовых работ з утрыманнем 10% заробку ў дзяржаўны прыбытак. Час, праведзены пад вартай, залічылі з разліку дзень за два, і вызвалілі.
Пяцігадовая забарона ўезду, якую Карпіцкаму абвяшчалі двойчы, працягвае дзейнічаць — так што пасля адбыцця прымусовых работ яго, відаць, чакае чарговая дэпартацыя.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень11
Каментары