«Uciakali ad mihrantaŭ i hiendarnaj ideałohii». Prapahanda pakazała jašče adnu siamju kovid-dysidentaŭ, jakaja pierabrałasia z Hiermanii ŭ Biełaruś

Jak piša rajonnaja hazieta «Prystaličča», pierajezd siamji nie byŭ spantannym rašeńniem, choć da hetaha siamja nikoli nie byvała ŭ Biełarusi.

Siamja Ojełkie internacyjanalnaja: Maryna maje rasijskaje pachodžańnie, jana naradziłasia ŭ Čačni, adkul jaje siamja niekali ŭciakała ad vajny. Ronald — karenny niemiec. Jany paznajomilisia ŭ 2006 hodzie, kali Ronald pryjechaŭ u Rasiju z dabračynnaj misijaj dla dziaciej Biesłana. Paśla viasiella Maryna pierajechała da muža ŭ Saksoniju, dzie ŭ ich naradziłasia troje dziaciej.

Cikava, što razhladajučy varyjanty dla emihracyi, siamja čamuści nie abrała Rasiju, dzie naradziłasia i vyrasła Maryna, a spyniła svoj vybar na Biełarusi.

Ad čaho «źbiehli» z Hiermanii

Nabor pryčyn, jakija, pa słovach siamji, padšturchnuli ich da pierajezdu, całkam adpaviadaje kłasičnym prapahandysckim naratyvam pra «zahnivajučy Zachad». Pieršaj pryčynaj stała źmiena sacyjalnaha asiarodździa ŭ ich nievialikaj vioscy pad Drezdenam paśla chvali mihracyi. Jany śćviardžajuć, što z dvaroŭ pačali źnikać dziciačyja rovary, a ŭ baćkoŭskich čatach źjavilisia papiaredžańni nie pakidać dziaciej adnych na aŭtobusnych prypynkach.

Druhim faktaram stała školnaja adukacyja. Zaniepakojenaść siamji vyklikali «aśvietnickija prajekty», jakija pravodzilisia dla dziesiacihadovych dziaciej.

Ronald śćviardžaje, što pad vyhladam «dnia demakratyi» dzieciam raspaviadali, što «sieks — heta viesieła» i treba šukać svaju hiendarnuju identyčnaść.

Maryna dadaje, što dačce nibyta ŭnušali, što «być prosta narmalnaj dziaŭčynkaj — heta ŭžo sumna i niapravilna». Akramia taho, siamja rasčaravałasia ŭ niamieckich ŚMI, ličačy, što jany skažali infarmacyju pra padziei va Ukrainie i na Danbasie.

Vybar na karyść Biełarusi i kovid-dysidenctva

Biełaruś siamja abrała, vyvučajučy infarmacyju ŭ internecie. I tut raskryvajecca jašče adzin važny aśpiekt ich śvietapohladu. Jak raspaviadaje Maryna, padčas pandemii COVID-19 ich uraziła, što kraina nie ŭvodziła tatalny łakdaŭn i nie prymušała ludziej da vakcynacyi.

«My hladzieli i radavalisia: Baćka — małajčyna, nikoha nie staŭ zahaniać pad łaŭku», — cytuje vydańnie słovy žančyny.

Pavialičyć

Pryjechaŭšy na raźviedku, siamja abjechała niekalki rehijonaŭ, ale spyniła svoj vybar na ŭčastku ŭ vioscy Staroje Siało Minskaha rajona. Ich nie spałochaŭ navat niedabudavany dom, jaki jany nabyli i paźniej daviali da ładu. Ciapier budynak pafarbavany ŭ jarka-aranžavy koler. Asablivuju ŭvahu nadali aciapleńniu: u domie pastavili piečku, bo ŭ Hiermanii, jak śćviardžaje siamja, zimoj byvali pieraboi z elektryčnaściu.

Prafiesijnyja ciažkaści i płany

Ramont doma viali na hrošy ad prodažu žylla ŭ Hiermanii. Pierajezd na adnoj mašynie dazvoliŭ zabrać tolki minimum rečaŭ, a asnoŭnaja častka majomaści, uklučajučy prafiesijnaje abstalavańnie, zatrymałasia na mytni.

Ronald pa prafiesii stolar-restaŭratar, jaho niamiecki dypłom majstra pryraŭniany da inžyniernaha. Adnak biez svaich instrumientaŭ jon pakul nie moža pačać pracu.

«Duša balić. Plintus prybić — i toje niama čym, uvieś instrumient tam», — kaža jon.

Maryna — miedyk pa adukacyi, pracavała ŭ mabilnaj słužbie donarstva kryvi. Kab viarnucca ŭ prafiesiju, joj nieabchodna paćvierdzić svaju kvalifikacyju reanimatołaha.

Pavialičyć

Dzieci, pa słovach baćkoŭ, adaptavalisia. Starejšy syn užo vyvučyŭ biełaruskuju movu, a dačka pačała pisać knihu i zajmacca malavańniem. U płanach siamji — pasadzić sad, pabudavać majsterniu i vieści spakojnaje žyćcio.

«Tut my adpuścili dziaciej i pierastali tuzacca kožnyja piać chvilin. Ja viedaju, što ź imi ničoha nie zdarycca», — cytuje vydańnie słovy Maryny. Ronald, ahladajučy dom, pahadžajecca: «Usio spaznajecca ŭ paraŭnańni. My zrabili pravilny vybar».

• 5
• 1
• 8
• 22
• 1
• 1
• 1
• 0