Na «Kamunarcy» raskazali, kali viernuć na cukierki smačnuju hłazuru
Biełarusy apošnim časam niaredka krytykavali «Kamunarku» za smak hłazury na cukierkach. Niekatoryja navat prasili pradpryjemstva viarnuć raniejšy varyjant, jaki ličać bolš smačnym, piša vydańnie Office Life.
Jak paviedamili na fabrycy, skład hłazury ŭžo źmianili. Ciapier vytvorčaść pastupova pieravodziać z hłazury na asnovie zamieńnika kakavavaha masła na hłazuru z ekvivalentam kakavavaha masła.
Pa słovach namieśnicy hienieralnaha dyrektara «Kamunarki» ŭ vytvorčaści Julii Haściejevaj, takija papularnyja cukierki, jak «Čarnamoročka», «Čaromuška» i «Ramonak» užo vypuskajucca z novym vidam hłazury. A cukierki najvyšejšaha hatunku — «Lubimaja Alonka», «Miška na palanie», «Vavioračka», «Kamunarka», «Staličnyja» — pa-raniejšamu tradycyjna pakryvajucca šakaładam.
Staršynia Dziaržaŭnaha kamiteta standartyzacyi Alena Marhunova adznačyła, što ŭ Biełarusi pamiž šakaładam i šakaładnaj hłazuraj faktyčna možna stavić znak roŭnaści. Pavodle jaje słoŭ, biełaruskaja kandytarskaja hłazura pa jakaści adpaviadaje rasijskaj šakaładnaj hłazury.
Pry hetym pry vytvorčaści ŭłasna šakaładu «Kamunarka» nie vykarystoŭvaje ekvivalenty kakavavaha masła, choć biełaruskija normy dazvalajuć ich dadavać u kolkaści nie bolš za 5%.
Bolš za 95% pradukcyi fabryki ŭtrymlivaje kakava-pradukty. Kakava-baby pradpryjemstva pieravažna zakuplaje ŭ Afrycy, a častka pastavak pastupaje z krain Łacinskaj Amieryki. Košt syraviny niepasredna ŭpłyvaje na sabiekošt i canu hatovaj pradukcyi.
Na suśvietnych biržach košt kakava-baboŭ letaś dasiahaŭ prykładna 11,5 tysiačy jeŭra za tonu. Ciapier biržavaja cana składaje kala 4—4,5 tysiačy jeŭra. Adnak heta nie aznačaje, što «Kamunarka» nabyvaje syravinu mienavita pa takoj canie: zakupki pravodziacca praz tendary ŭ adpaviednaści ź biełaruskim zakanadaŭstvam.
Kala 45% asartymientu fabryki siońnia składaje impartazamiaščalnaja pradukcyja.
«Kamunarka» taksama praciahvaje pašyrać ekspart. U hetym hodzie jaje pradukcyja pastaŭlałasia ŭ 14 krain. Bolš za 90% ekspartu prypadaje na Rasiju. U piaciorku najbujniejšych zamiežnych rynkaŭ taksama ŭvachodziać Kitaj, Izrail, Uźbiekistan i Kazachstan.
Nievialikija abjomy pradukcyi pradpryjemstva traplajuć i ŭ krainy Jeŭrasajuza — u Łatviju i Estoniju. Akramia taho, fabryka płanuje pavialičvać pastaŭki na Blizki Uschod. Pry hetym u Łatvii ciapier abmiarkoŭvajecca mahčymaść zabarony impartu sałodkaj pradukcyi ź Biełarusi i Rasii.
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary