Prapahandysty pakazali na niekalki siekund papierku ź imionami raniej vyzvalenych palitviaźniaŭ. Što za ludzi ŭ hetym śpisie?

Prapahandysty zapeŭnivajuć, što 196 palitviaźniaŭ sa śpisu «Viasny» ŭžo vyjšli na svabodu. Poŭnaha pieraliku imionaŭ niama, ale z toj papierki, jakuju pakazaŭ u efiry ANT Ihar Tur, možna identyfikavać kala paŭtara dziasiatka čałaviek. Pra vyzvaleńnie niekatorych ź ich pravaabaroncam było viadoma i raniej, ale pra toje, što vosiem palitviaźniaŭ užo daŭno doma, adbyŭšy termin, hramadskaść nie viedała.

Voś hetyja ludzi:

Alena Rybak

Alenu Rybak zatrymali ŭ kancy kastryčnika 2024 hoda. Joj vystavili abvinavačańnie pavodle č. 3 art. 361‑1 Kryminalnaha kodeksa (stvareńnie ekstremisckaha farmavańnia albo ŭdzieł u im).

Mierkavana, sprava źviazanaja z «dvarovymi čatami»: vosieńniu 2024 hoda pa ŭsioj Biełarusi prakaciłasia chvala zatrymańniaŭ fihurantaŭ susiedskich čataŭ, jakija, pavodle viersii śledstva, nibyta sprabavali abjadnacca ŭ arhanizacyju, a KDB pryznaŭ «ekstremisckimi farmavańniami» ceły šerah takich čataŭ.

Uładzisłaŭ Fiedarovič

Uładzisłava Fiedaroviča zatrymali ŭ śniežni 2023 hoda. Na «pakajalnym videa», apublikavanym praŭładnym telehram-kanałam, jon kaža, što ŭdzielničaŭ u mitynhach i nie vydaliŭ fotazdymki ŭ sacsietkach. Utrymlivaŭsia pad vartaj pa art. 342 Kryminalnaha kodeksa (arhanizacyja abo aktyŭny ŭdzieł u dziejańniach, što hruba parušajuć hramadski paradak). Sud nad im adbyŭsia 30 studzienia 2024 hoda.

Vadzim Saskaviec

Vadzima Saskaŭca zatrymali 19 studzienia 2023 hoda. Minski haradski sud asudziŭ jaho pavodle č. 1 art. 130 Kryminalnaha kodeksa (raspalvańnie varožaści) da 1 hoda i 6 miesiacaŭ kałonii.

Taćciana Trafimčyk

Taćcianu Trafimčyk asudzili adrazu pa čatyroch artykułach: art. 130 (raspalvańnie varožaści), č. 2 art. 366 (hvałt abo pahroza słužbovaj asobie), č. 2 art. 367 (paklop na Łukašenku) i art. 368 (abraza Łukašenki). Jaje ŭklučyli ŭ śpis «terarystaŭ» i adpravili ŭ kałoniju ŭ Homieli.

Valancin Samasiuk

Valancin Samasiuk — žychar Baranavičaŭ, pracavaŭ na čyhuncy. Jaho zatrymali 31 sakavika 2022 hoda. Pavodle abvinavačańnia, z 15 pa 22 sakavika 2022 hoda jon adpraviŭ u telehram-čacie niekalki fotazdymkaŭ čyhunačnaj techniki z kamientarami. Čat pryznali «ekstremisckim farmavańniem», i dziejańni Samasiuka kvalifikavali jak sadziejničańnie ekstremisckaj dziejnaści (art. 361‑4 Kryminalnaha kodeksa).

Andrej Kraśnik

Andrej Kraśnik — terapieŭt pryjomnaha pakoja Lidskaj haradskoj balnicy. Jaho zatrymali 20 lipienia 2022 hoda za kamientary i łajki ŭ sacsietkach, pakinutyja jašče ŭ 2020 hodzie, adnak abvinavačańnie ŭ vyniku vystavili pa čatyroch artykułach: č. 2 art. 366 (hvałt abo pahroza słužbovaj asobie), č. 1 art. 342 (aktyŭny ŭdzieł u dziejańniach, što hruba parušajuć paradak), č. 1 art. 368 (abraza Łukašenki) i art. 369 (abraza pradstaŭnika ŭłady).

Kraśniku prysudzili 3 hady i 6 miesiacaŭ kałonii, jakija jon adbyvaŭ u kałonii pad Viciebskam.

Alaksandr Syryca

Alaksandra Syrycu 1 sakavika 2022 hoda sud Baranavickaha rajona i horada Baranavičy nakiravaŭ na prymusovaje lačeńnie ŭ psichijatryčnym stacyjanary sa zvyčajnym nazirańniem — pavodle art. 369 Kryminalnaha kodeksa (abraza pradstaŭnika ŭłady). 29 krasavika 2024 hoda adbyŭsia sud «ab źmienie prymusovych mier biaśpieki i lačeńnia», paśla čaho Syrycu, pavodle «Viasny», nakiravali ŭ papraŭčuju kałoniju №1. Dakładny prysud i data vyzvaleńnia nieviadomyja.

Siarhiej Safronaŭ

Siarhieja Safronava ŭ krasaviku 2023 hoda asudzili ŭ Žodzinie pa č. 1 art. 368 (abraza Łukašenki) i art. 369 (abraza pradstaŭnika ŭłady) Kryminalnaha kodeksa.

• 2
• 0
• 0
• 1
• 1
• 0
• 1
• 0