«Kali Rasija pieramoža. Adzin sa scenaroŭ». Pra što hety biestseler?
«Hetaja kniha zusim nievialikaja. I ŭ hetym sensie jana idealnaja», — piša Andruś Chrapavicki.
Siužet knihi «Kali Rasija pieramoža» (If Russia wins. A Scenario) niamieckaha palitołaha Karła Masały (Carlo Masala) nie pra toje, jak Rasija zavajoŭvaje ŭsiu Jeŭropu. Heta chutčej hieapalityčny razumovy ekśpierymient pra toje, jak rasijskaja pieramoha va Ukrainie mahła b spravakavać kryzis suśvietnaha maštabu.
Usio pačynajecca z taho, što Rasija zachoplivaje Narvu i astravok Chijumaa ŭ Estonii. Hetaja ataka naŭmysna abmiežavanaja. Rasija nie zachoplivaje ŭsioj terytoryi niezaležnaj dziaržavy. Zamiest hetaha jana adhryzaje łapik.
U hetym i zaklučajecca klučavaja ideja knihi: Maskva vypraboŭvaje NATA, Zachad, jeŭrapiejcaŭ, ukraincaŭ, biełarusaŭ na tryvałaść, a nie sprabuje zdabyć vialikuju pieramohu ŭ adnoj kampanii, adnym ryŭkom.
Jak možna zdahadacca, NATA akazvajecca nie hatovym da surjoznaha adkazu. Dalej padziei raźvivajucca nastupnym čynam: Złučanyja Štaty ŭsio bolš kancentrujucca na ŭnutranych prablemach i ŭsio mienš schilnyja brać na siabie rolu lidara. Adnačasova Kitaj stvaraje napružanaść u Azii, adciahvajučy ŭvahu Vašynhtona. Rasija karystajecca hetymi supiarečnaściami, zapuskajučy kropkavuju pravierku rašučaści NATA.
Što tut možna skazać? Taki prahnoz zanadta zmročny, kab ja pačuvaŭsia spakojna. Krainy Bałtyi šmat hadoŭ papiaredžvali Jeŭropu i Amieryku pra impierskija zamaški Rasii. Na Zachadzie nichto nie źviartaŭ na heta asablivaj uvahi. Ciapier źviarnuli. Ci aznačaje heta, što ŭ Jeŭropy ci ZŠA źjaviłasia bolš rašučaści dla adporu? Miarkujcie sami.
Viersija Masały — heta toje, što mnohija analityki ličać realistyčnym scenarom. I ŭsio ž mnie zdajecca, što ŭsio adbudziecca nie tak. Prynamsi nie ŭ takim vyhladzie. Rasija zahrazła ŭ svajoj ahresiŭnaj vajnie. Nadzieja na choć niejkaje padabienstva pieramohi vyhladaje iluzornaj, chiba, kali tolki Kreml zmusić Łukašenku kinuć na dapamohu i biełaruskich siłavikoŭ. Navat u takim vypadku pośpiech zusim nie harantavany. Ukraina pieratvaryłasia ŭ mahutnuju vajskovuju siłu, a Jeŭropa na siońnia maje i palityčnuju volu, i resursy dla padtrymki Ukrainy. Z ZŠA ŭsio krychu składaniej… Ale lepš źmienim temu.
Maja hałoŭnaja prablema nie z samoj knihaj, a z maim libieralnym śvietapohladam. Ja dahetul nie mahu pavieryć, jak tak stałasia, što my žyviom u hety pieryjad niespaścihalnaj duraści. Va Uschodniaj Jeŭropie pralita ŭžo zašmat kryvi. Para heta spynić. Para viarnucca chacia b da niejkaj narmalnaści. Chiba nie tak?
Kamientary