Jeździli letam da babuli ŭ viosku? Konkurs «Viki lubić vioski» źbiraje lubyja zdymki 23 tysiač miastečak, viosak i chutaroŭ Biełarusi
Biełaruś stała placoŭkaj dla testavaha zapusku novaha mižnarodnaha fotakonkursu, jaki stavić za metu sabrać jakasnyja vyjavy tysiač i tysiač sielskich nasielenych punktaŭ, jakija zastajucca bieź ilustracyj u Vikipiedyi.
Prajekt pad nazvaj «Viki lubić vioski 2026» (Wiki Loves Villages 2026) prachodzić z 15 pa 31 žniŭnia.
Aŭtary inicyjatyvy źviarnuli ŭvahu na vidavočnuju dyspraporcyju: kali harady i miastečki zvyčajna majuć dastatkovuju kolkaść vyjaŭ u schoviščach, to artykuły pra nievialikija pasieliščy časta nie majuć nivodnaha fotazdymka.
U jakaści piłotnych krain dla vypraŭleńnia situacyi sioleta abranyja Biełaruś i Kazachstan.
Što i jak fatahrafavać
Arhanizatary adznačajuć, što najbolš zapatrabavanymi źjaŭlajucca ahulnyja panaramy pasieliščaŭ, dla jakich idealna padychodzić zdymka z kvadrakoptaraŭ. Praŭda, u biełaruskich realijach takija zdymki prablematyčnyja.
Ale ŭ Vikipiedyi buduć radyja i zvyčajnym vidam centralnych vulic, płoščaŭ, zroblenym ź ziamli, a taksama bolš śpiecyfičnym kadram. Dapuskajecca publikacyja fotazdymkaŭ sielskaj haspadarki, techniki, transpartnaj infrastruktury, hramadskich i relihijnych budynkaŭ, tradycyjnaj i sučasnaj zabudovy.
Taksama abjektam zdymki mohuć stać miascovyja žychary pry najaŭnaści ich papiaredniaj zhody, publičnyja mierapryjemstvy, kirmašy i spartyŭnyja spabornictvy.
Pry hetym fatohrafam nahadvajuć pra nieabchodnaść vykonvać praviły svabody panaramy, kab paźbiehnuć parušeńnia aŭtarskich pravoŭ pry zdymcy peŭnych architekturnych abo mastackich abjektaŭ. Zhodna z amierykanskim zakanadaŭstvam, jakim kirujecca Fond Vikimiedyja, zarehistravany ŭ ZŠA, termin achovy aŭtarskich pravoŭ składaje 70+1 hod z momantu śmierci aŭtara.
Praz adsutnaść svabody panaramy ŭ Biełarusi, fotazdymki jakich-niebudź pomnikaŭ Leninu i savieckich damoŭ kultury mohuć być vydalenyja praz parušeńnie aŭtarskich pravoŭ, a voś tradycyjnaje dojlidstva možna zahružać biez apaski.
Jak heta zrabić
Uličvajučy, što ŭ Biełarusi naličvajecca kala 23 tysiač sielskich nasielenych punktaŭ, arhanizatary stvaryli śpiecyjalnuju interaktyŭnuju kartu dla strohaha sartavańnia kantentu. Udzielnikam nieabchodna vybrać na joj adpaviednuju vobłaść i rajon, paśla čaho znajści patrebnuju viosku ŭ śpisie i nacisnuć indyvidualnuju knopku zahruzki dla kankretnaha pasielišča.
Karystalnikaŭ papiaredžvajuć, što vykarystańnie standartnaha majstra zahruzki Vikischovišča pryviadzie da taho, što vyjavy nie trapiać u konkursny zalik biez dadatkovych techničnych manipulacyj, a fajły mohuć pamyłkova prailustravać inšyja artykuły.
Vynikam prajekta pavinna stać istotnaje pašyreńnie svabodnaj bazy vizualnych dadzienych pra rehijony, što dazvolić dapoŭnić tysiačy isnych encykłapiedyčnych artykułaŭ aktualnymi ilustracyjami i nadziejna zachavać pamiać pra biełaruskuju viosku.
«Naša Niva» — bastyjon biełaruščyny
PADTRYMAĆCiapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»7
Kamientary