U ahraharadku pad Słonimam začynilisia pošta, Dom bytu i apteka. Jašče niadaŭna ŭłady chvalilisia kłopatam pra žycharoŭ
Žychary ahraharadka Dzieraŭnaja Słonimskaha rajona raspaviali pra prablemy, jakija pastupova pazbaŭlajuć nasieleny punkt zvykłaj infrastruktury. Za apošni čas tut začynilisia adździaleńnie pošty i Dom bytu, pierastała pracavać adzinaja apteka. Miascovyja žychary dadajuć da hetaha śpisu ambułatoryju i dziciačy sad, piša BGmedia.
Pra situacyju raspavioŭ u haradskim pabliku adzin ź miascovych žycharoŭ. Pavodle jaho słoŭ, mahčymaściej atrymlivać elemientarnyja pasłuhi niepasredna ŭ ahraharadku stanovicca ŭsio mienš.
Čarhovaj prablemaj stała niepahadź 18 lipienia. Praz mocny doždž i viecier sarvała dach z budynka miascovaj kramy, dzie taksama znachodziłasia adzinaja apteka. Prajšoŭ užo miesiac, ale jana dahetul nie pracuje.
Paśla zvarotu žycharoŭ Słonimski rajvykankam paviedamiŭ, što zaraz budynak adnaŭlajuć. Tam ramantujuć i ŭmacoŭvajuć dach, a supracoŭniki Słonimskaha filijała Hrodzienskaha abłspažyŭtavarystva paralelna pryvodziać u paradak unutranyja pamiaškańni. Zaviaršyć pracy čynoŭniki abiacajuć da 1 vieraśnia.
Adnak u kamientarach žychary źviarnuli ŭvahu, što śpis prablem Dzieraŭnoj značna šyrejšy: «Štości vy ścipła pieraličyli», «A taksama zakryćcio ambułatoryi, dziciačaha sada».
Inšyja ŭspaminajuć, jakoj infrastrukturaj ahraharadok vałodaŭ raniej: «Takaja vioska kaliści była — balnica była, a ciapier? Navat apteki niama. Kudy hladzić staršynia sielsavieta?»
U mai ŭ ahraharadku Dzieraŭnaja ŭračysta adkryli spartyŭnuju placoŭku
Pry hetym u apošnija miesiacy Słonimski rajvykankam i rajonnaja hazieta praktyčna nie raspaviadali pra nazapašanyja prablemy Dzieraŭnoj. Apošniaja zamietnaja publikacyja pra ahraharadok źjaviłasia 8 maja — i vyhladała jana zusim inakš.
Tady tut uračysta adkryvali novuju spartyŭnuju placoŭku. Na mierapryjemstva pryjechaŭ staršynia rajonnaha Savieta deputataŭ Aleh Tarhonski, pierarezali simvaličnuju stužku, a rajonnaja hazieta nazvała źjaŭleńnie trenažoraŭ «jaskravym śviedčańniem kłopatu i padtrymki nasielnictva ahraharadka» i prykładam uzajemadziejańnia biźniesu, ułady i žycharoŭ.
Praz try miesiacy karcina vyhladaje kudy mienš śviatočna. Spartyŭnaja placoŭka ŭ Dzieraŭnoj sapraŭdy źjaviłasia, ale adnačasova žychary kažuć pra zakrytuju poštu, Dom bytu, ambułatoryju i dziciačy sad, a adzinaja apteka ŭžo miesiac nie pracuje paśla paškodžańnia dachu. Pra hetyja prablemy ŭ aficyjnaj karcinie žyćcia ahraharadka da zvarotu samich ludziej praktyčna ničoha nie było.
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary