Zapłaciŭ, ale ŭsio roŭna staŭ parušalnikam: jakija pamyłki robiać kiroŭcy na płatnych parkoŭkach u Minsku
Kali vy pakidajecie mašynu na płatnaj parkoŭcy, sam fakt śpisańnia hrošaj z kartki jašče nie harantuje, što vas nie aštrafujuć. Praz banalnuju niaŭvažlivaść minskija aŭtaamatary rehularna traplajuć u bazy dadzienych jak niepłacielščyki.
Śpiecyjalisty pradpryjemstva «Parkoŭki stalicy» nazvali «Minsk-navinam» hałoŭnyja pamyłki kiroŭcaŭ.
Pamyłki pry apłacie
Kantrol na adkrytych parkoŭkach Minska (pracujuć z 08:00 da 18:00) viadziecca ŭ ručnym režymie: inśpiektary chodziać z płanšetami i źviarajuć numary mašyn z bazaj apłaty.
Voś dzie kiroŭcy pamylajucca čaściej za ŭsio.
Pry ŭvodzie dziaržnumara mašyny kateharyčna nielha vykarystoŭvać prabieły i praciažniki. Numar treba pisać vyklučna sucelnym radkom. Kali pastavić prabieł, sistema nie znojdzie płaciož, i vam vypišuć štraf.
Kurjoznaja, ale častaja pamyłka — kiroŭcy ŭvodziać u dadatak abo praz SMS nie numar ułasnaj mašyny, a toj numar, jaki napisany na infarmacyjnym stendzie ŭ jakaści prykładu (uzoru). Hrošy sychodziać u pavietra.
Kali pamyłkova apłacić parkoŭku paśla 18:00, hrošy buduć zaličany na nastupnyja sutki z 08:00 ranicy.
Što rabić, kali pamyliŭsia? Kali vy zrazumieli, što zrabili pamyłku ŭ numary abo adpravili hrošy nie tudy, situacyju možna vypravić, terminova patelefanavaŭšy ŭ słužbu padtrymki pa karotkim numary 204.
Na vysadku pasažyraŭ dajecca roŭna 15 biaspłatnych chvilin. Kali bolš, treba płacić. Štraf za niapłatu składaje 1 bazavuju vieličyniu.
Kamiery bačać usio
Śpiecyjalisty «Parkovak stalicy» adsočvajuć situacyju na abjektach u režymie realnaha času z centralnaha ofisa. Na ekranach kampjutaraŭ jany bačać kožny ruch transpartu na parkoŭkach u luboj kropcy Minska. Tamu pry nieabchodnaści dyśpietčaram nie składzie ciažkaści dakładna daviedacca, kolki času mašyna znachodziłasia na placoŭcy, vyličyć kiroŭcu, jaki admaŭlajecca płacić, abo vyśvietlić, chto paškodziŭ abstalavańnie.
Raniej niekatoryja vadzicieli sprabavali chitravać: pryciskalisia «ŭ chvost» da papiaredniaj mašyny i sprabavali praskočyć pad adkrytym šłahbaumam razam ź joj. Zaraz dziakujučy sistemie videakantrolu i dadatkovym kamieram numary takich «pryčepaŭ» fiksujucca aŭtamatyčna — jak na ŭjeździe, tak i na vyjeździe.
Padniaŭ šłahbaum rukami? Štraf u 100‑razovym pamiery
Zhodna z haradskimi praviłami dabraŭparadkavańnia, za naŭmysnaje paškodžańnie majomaści straty ź vinavataha spahaniajucca ŭ starazovym pamiery.
Jaskravy vypadak zdaryŭsia sioleta 25 sakavika na vulicy Zybickaj. Pasažyr taksi, kab nie płacić za vyjezd, vyjšaŭ i rukami padniaŭ strełu aŭtamatyčnaha šłahbauma, paśla čaho mašyna źjechała. Miechanizm zakliniła, i 40 chvilin parkoŭka pracavała sa zbojami.
Kamiera zafiksavała tvar i numary parušalnika. Sam ramont kaštavaŭ kapiejki — 54 rubli. Ale z ulikam 100‑kratnaha multyplikatara, minčuku vystavili rachunak na 5 431 rubiel.
Kamientary