Kupili zaniadbany dom, u jaki nie chaciełasia zachodzić, i pieratvaryli ŭ cukierku
Ivan pradaŭ dom u vioscy, kab kupić nievialikuju chatu ŭ sadovym tavarystvie niedaloka ad Minska. Amal uvieś ramont mužčyna vykanaŭ svaimi rukami ŭsiaho za paŭtara hoda: abšyŭ budynak karelskaj jełkaj, pierabraŭ pieč, zrabiŭ pierapłaniroŭku i stvaryŭ novy byt dla ŭsioj siamji, raspaviadaje Onliner.
— Naša dačnaja historyja pačałasia paŭtara hoda tamu. My z žonkaj piensijaniery: jana ŭ minułym miedycynski rabotnik, a ja — nastaŭnik pracy z 17‑hadovym stažam. Rodam ja ź vioski ŭ Hrodzienskaj vobłaści, a žonka — minčanka, i razam my ŭžo bolš za 40 hadoŭ. Pačynali svoj žyćciovy šlach u Minsku, tut u nas naradzilisia dačka i syn. U 1994 hodzie kupili dom u vioscy na majoj radzimie i pierajechali tudy. Kali dzieci vyraśli, my viarnulisia nazad u stalicu, a ŭ vioscy zastalisia ŭžo našy baćki. Z časam dahladać vialikuju haspadarku i vielizarny nadzieł stanaviłasia ŭsio składaniej.
U 2024 hodzie paŭstała pytańnie pra prodaž viaskovaha doma i kuplu nievialikaha placu bližej da Minska. My raźličvali znajści hatovy varyjant, kab nie ŭkładvać siły ŭ budoŭlu. Abjeździli mnostva miescaŭ i adnojčy pryjechali ŭ sadovaje tavarystva «Sosny-sad» — tam pradavałasia lecišča sa ŭsimi vyhodami i dyzajnierskim ramontam. Ale jano było zanadta małym: usiaho adzin pakoj, kuchnia i sanvuzieł. Zatoje nas skaryła samo miesca: dastatkova šyrokija vulicy, navokał les, pobač niekalki sanatoryjaŭ, a za dziesiać chvilin — Minskaje mora.
Ad miascovych my daviedalisia, što na vulicy Soniečnaj pradajecca jašče adzin dom na 4 sotkach. Zajšli na ŭčastak i ŭbačyli poŭnuju zaniadbanaść. Babuli-haspadyni było ŭžo ciažka ŭtrymlivać žytło, i jana źbirałasia da syna. Ja pahladzieŭ na hetuju chatu i zrazumieŭ, jakich hihanckich zatrat i pracy jana zapatrabuje, tamu ŭ mianie navat nie ŭźnikła žadańnia zajści ŭnutr. Ale ŭžo na nastupny dzień my viarnulisia. I ŭ hety momant u mianie ŭnutry nibyta ščoŭknuła: ja zrazumieŭ, što heta «naš» dom. Raptoŭna pryjšli spakoj i ŭpeŭnienaść, što z usim ramontam ja zmahu spravicca sam.
Paśla kupli my ŭsioj siamjoj prystupili da rujnavańnia starych haspadarčych pabudoŭ i naviadzieńnia paradku vakoł asnoŭnaha budynka. Prybrali razburanyja aharodžy, vykarčavali staryja drevy i kusty, vyraŭniali ŭvieś plac.
Paralelna vynosili z doma staruju meblu, raźbivali pieraharodki, vyłomlivali ŭsie mižpakojnyja i ŭvachodnyja dźviery, vokny, zryvali azdableńnie ścien i stolaŭ, demantavali elektrapravodku. Dla aciapleńnia lecišča była praduhledžana kampaktnaja cahlanaja pieč, ale jana była niaspraŭnaja, tamu pryjšłosia praktyčna da pałovy jaje razabrać, kab u dalejšym adnavić.
Demantaž i vyvaz śmiećcia zaniali niekalki miesiacaŭ. Mnohija rašeńni prymalisia na chadu — naprykład, nakidy budučych pakojaŭ malavali krejdaj prosta na padłozie. Kab nie marnavać čas, adrazu źniali mierki i zamovili novyja akonnyja błoki i ŭvachodnyja dźviery.
Užo zimoj 2024 hoda rodnyja ŭhavorvali mianie zrabić pierapynak da viasny, ale praces užo całkam mianie zachapiŭ. Da taho ž treba było pieravozić rečy z pradadzienaha viaskovaha doma. Dy i nadvorje było spryjalnym — zima była miakkaj. U pieršuju čarhu ja vykapaŭ i abstalavaŭ haspadarčy błok dla zachavańnia instrumientaŭ, padvioŭ da doma vadu i zmantažavaŭ unutranuju kanalizacyju.
Dla ŭnutranaha azdableńnia vybirali tolki naturalnyja materyjały: ścieny i stoli abšyli sasnovaj vahonkaj, na padłohu ŭ pakojach pakłali doški, a na kuchni i ŭ sanvuźle — kieramičnuju plitku. Za zimova-viesnavy pieryjad ja samastojna z nula ŭźvioŭ novyja pieraharodki, ustalavaŭ vokny i dźviery, zanava abkłaŭ i zapuściŭ pieč, sabraŭ sanvuzieł z dušavoj kabinaj, całkam raźvioŭ novuju elektryku, a na druhim paviersie ŭciapliŭ i abšyŭ ścieny.
Z nadychodam viasny da ramontu padklučyłasia ŭsia siamja. Vielizarnaja dapamoha była ad 86‑hadovaj cieščy — jana razam z nami raŭniała ŭčastak i prybirała śmiećcie. Da leta my pasiejali hazon, pasadzili małady sad ź jabłyń, hruš, višań, śliŭ i jahadnych kustoŭ, vysadzili tui pa pierymietry i pastavili nievialiki parnik. Častku haspadarčaha błoka adviali pad letniuju kuchniu.
Dla fasadnych rabot zaprasili śpiecyjalistaŭ: dom jakasna ŭciaplili dla kruhłahadovaha pražyvańnia i abšyli hatovaj vahonkaj z karelskaj jełki, a taksama pierakryli dach. Da vosieni 2025 hoda ŭ domie stajała ŭsia mebla, i my pieravieźli asnoŭnyja rečy.
Da viasny my pastupova likvidavali drobnyja niedarobki, dakupili meblu. Da poŭnaha zakančeńnia zastavałasia zrabić litaralna niekalki rečaŭ: płot z bramaj, uciapleńnie cokala, schody na druhi pavierch i dva hanki. Ja pastaviŭ metu skončyć usio da kanca leta.
Z usiaho vielizarnaha kompleksu rabot majstry zboku dałučalisia tolki dla bureńnia śvidraviny, ukopvańnia kanalizacyjnych kolcaŭ, układki plitki i azdableńnia fasada z dacham. Usie padklučeńni, razvodku i ŭnutrany ramont ja rabiŭ sam.
My vydatkavali šmat sił, ale vynik prynosić zadavalnieńnie. Dla nas hety prajekt staŭ dokazam: hałoŭnaje — nie bajacca zrabić pieršy krok i ŭparta iści da mety, tady lubyja ciažkaści pierakryvajucca radaściu ad hatovaha vyniku.
Ciapier čytajuć
Syn ministra Kubrakova staŭ načalnikam Centralnaha RUUS Minska. Major, ale budzie kiravać pałkoŭnikami4
Syn ministra Kubrakova staŭ načalnikam Centralnaha RUUS Minska. Major, ale budzie kiravać pałkoŭnikami
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary
vypołniť
1) (ispołniť) vykanać ździejśnić <------
(sdiełať — jeŝio) zrabić
vypołniť svoj dołh — vykanać svoj abaviazak <-- ABAVIAZAK
vypołniť rabotu — vykanać (zrabić) rabotu <---- pa faktu - abaviazak
2) (napołniť) napoŭnić