Cichanoŭskaja: Pieramieny ŭ Biełarusi — heta pytańnie času. Voś asnoŭnyja tezisy jaje vystupu na kanfierencyi «Novaja Biełaruś»
Kiraŭnica Abjadnanaha pierachodnaha kabinieta Śviatłana Cichanoŭskaja vystupiła z ustupnym słovam na adkryćci Kanfierencyi «Novaja Biełaruś». Jana padkreśliła, što padziei 2020 hoda źmianili biełaruskaje hramadstva i zapuścili pracesy, jakija niemahčyma admianić. Kanfierencyja pačałasia z avacyi prysutnym u zale byłym palitviaźniam.
Pra 2020 hod
«Heta byŭ momant, kali abudziłasia našaja nacyja. Kali my ŭśviadomili svaju siłu. I stali inšymi. 2020‑y zapuściŭ pracesy, jakija niemahčyma admianić».
Pa słovach Śviatłany Cichanoŭskaj, za hetyja šeść hadoŭ biełarusy navučylisia samaarhanizacyi, salidarnaści i dypłamatyčnaj pracy, stvaryli ŭłasnyja struktury, miedyja i kulturnyja prajekty, znajšli mižnarodnych sajuźnikaŭ. Niahledziačy na represii i vymušanuju emihracyju, biełaruskaje hramadstva praciahvaje ŭpłyvać na budučyniu krainy.
Pra siońniašniaje stanovišča
«Heta faktyčna stan hibrydnaj akupacyi».
Pra palityčnaje zmahańnie
«Majučy mizernuju prastoru dla palityčnaj pracy, my vyciskajem z kožnaha jaje milimietra maksimum. Dziakujučy hetaj pracy siońnia śviet viedaje dźvie prostyja rečy: Biełarusy — heta nie režym. A Biełaruś — heta nie Rasija».
Pra novuju dynamiku vakoł Biełarusi za apošni hod
Vyzvaleńnie častki palitviaźniaŭ, źmieny ŭ pazicyi Ukrainy i rasśledavańnie złačynstvaŭ režymu ŭ Haazie. Na jaje dumku, hetyja źmieny stali mahčymymi dziakujučy supolnaj pracy biełarusaŭ i mižnarodnych partnioraŭ.
«Heta ŭsio nie adbyłosia samo pa sabie. Heta ŭsio vynik našaj z vami pracy. Praca pravaabaroncaŭ, žurnalistaŭ, palitykaŭ, aktyvistaŭ, vałancioraŭ, i kaniešnie, našych zamiežnych siabroŭ. I ja ŭpeŭnienaja: my možam jašče bolš».
Pra hałoŭnyja zadačy demakratyčnych sił
Śviatłana Cichanoŭskaja nazvała hałoŭnymi zadačami vyzvaleńnie ŭsich palitviaźniaŭ i spynieńnie koła represij, zachavańnie biełaruskaj subjektnaści, movy, kultury i identyčnaści, niedapuščeńnie poŭnaha ŭciahvańnia Biełarusi ŭ vajnu i hatoŭnaść skarystacca novym aknom mahčymaściaŭ.
«I ŭ rešcie rešt, my možam paŭpłyvać na stvareńnie novaha akna mahčymaściaŭ — i być hatovymi im skarystacca. Bo pieramieny ŭ Biełarusi — heta pytańnie času.
Jak by ni fotašopili Łukašenku na BiełTA, jaho čas niepaźbiežna sychodzić».
Mienavita tamu, padkreśliła kiraŭnica Kabinieta, užo ciapier nieabchodna dumać pra postłukašenkaŭskuju Biełaruś: jak nie dapuścić chaosu, viarnuć zakonnaść i biaśpieku, pravieści svabodnyja vybary, vyvieści krainu z-pad rasijskaha kantrolu i viarnuć jaje ŭ jeŭrapiejskuju siamju.
«Buduć heta naturalnyja pryčyny, raskoł u sistemie, ci niešta, čaho siońnia nichto z nas nie moža pradbačyć, — my nie viedajem. Ale treba dumać užo ciapier, jak postłukašenkaŭskaja Biełaruś budzie vyhladać».
Asobna Śviatłana Cichanoŭskaja źviarnułasia da biełarusaŭ unutry krainy z zaklikam nie hublać viery, zachoŭvać suviazi i šukać biaśpiečnyja formy ŭdziełu, a biełarusaŭ za miažoj — być aktyŭnymi i bačnymi.
«Nam dapamahajuć tady, kali nas viedajuć, bačać i nam daviarajuć».
Hałoŭnym, što biełarusam važna zachavać z 2020 hoda, Śviatłana Cichanoŭskaja nazvała adčuvańnie jednaści i ŭzajemnaj padtrymki.
«Padtrymlivajcie adno adnaho. Asabliva tych, chto tolki vyjšaŭ z turmy. Tych, chto apynuŭsia ŭ vyhnańni. Tych, chto pačynaje žyćcio z nula. I jašče — zaŭvažajcie dobraje. Dziakujcie ludziam za pracu. Nie saromiejciesia skazać čałavieku pobač: «Ty małajčyna. Toje, što ty robiš, važna». Bo časam dobraje słova niatchniaje čałavieka macniej za sotniu stratehij. Ja upeŭniena, razam u nas usio atrymajecca, i my ŭsio adolejem. Žyvie Biełaruś!»
Ciapier čytajuć
31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja11
Kamientary