Kredyt na žyllo pad 1% — kolki nasamreč daviadziecca pierapłačvać za ŭvieś čas?

Cikavaść pieravyšaje čakańni

Šerah zabudoŭščykaŭ anansavaŭ kredytnyja prahramy pad 1% na 24 miesiacy. Paśla hetaha pieryjadu staŭka vyrastaje da 15,4%. Maksimalny termin vydačy kredytu — 20 hadoŭ, a suma kredytavańnia moža dasiahać 90% ad koštu žytła.

Naturalna, što źjaŭleńnie padobnaj prahramy vyklikała vialikuju cikavaść.

Zabudoŭščyki, jakija ŭdzielničajuć u prahramie, raskazvajuć pra niebyvały rost popytu. Praŭda, niekatoryja patencyjnyja pakupniki, jak adznačyli ŭ «Hrand Krystał», pabačyŭšy pryhožuju ličbu ŭ 1%, navat da kanca nie razumiejuć, što pa zaviaršeńni hrejs-pieryjadu treba budzie płacić 15,4%.

Nakolki heta vyhadna?

Biezumoŭna, luboje źmianšeńnie pracentnych stavak — heta dobra. Ale ŭ vypadku, kali jana mienšaje tolki na dva hady, treba ŭvažliva padličvać vynikovy pracent i vynikovuju pierapłatu.

Dvuchhadovy 1%-ny pieryjad u pieršuju čarhu vyhadny tym, što ciaham 24 miesiacaŭ budzie mahčymaść rabić nievialikija ŭnioski, pakolki płaciož pa pracentach mienšy, čym suma pahašeńnia doŭhu. Heta, naprykład, moža dazvolić adkładvać hrošy na budučy ramont i kuplu mebli.

Kali pieraličyć uvieś finansavy patok na 20 hadoŭ, to akcyjny pieryjad źnižaje realnuju pracentnuju nahruzku z 15,4% da 12,6% hadavych.

Pavialičyć

Inšymi słovami — pierapłaty za ŭvieś čas buduć roŭna takija samyja, jak kali b vam adrazu vydali kredyt pad 12,6%. 

Pry hetym skarystacca hrejs-pieryjadam možna i kudy bolš vyhadna, čym prosta mieć maleńki płaciož. Kali finansy dazvalajuć płacić z samaha pačatku 1470 rubloŭ, jakija treba płacić z 25‑ha miesiaca (na prykładzie kredytu ŭ 100 000 biełaruskich rubloŭ), to praktyčna ŭsie hrošy pojduć na źmianšeńnie cieła kredytu.

U vyniku realnaja pracentnaja nahruzka padaje z 12,6% da kala 9% hadavych, što ŭžo bolš adčuvalna.

Adnak kali jość mahčymaść zakryć kredyt maksimalna chutka, to ŭ takim vypadku faktyčna atrymajecca, što bank daŭ vam hrošy na dva hady ŭsiaho pad 1%.

Praŭda, kali paraŭnoŭvać z pracentami pa ipatečnych kredytach u toj ža Polščy ci Litvie, dzie možna budavacca pad 6%, to 9% i tym bolš 12,6% — heta ŭsio adno vialikija staŭki.

Popyt na novabudoŭli pojdzie ŭhoru? 

Što da ŭpłyvu na rynak, to padobnaja prahrama moža davoli adčuvalna źmianić bałans sił — źmienšycca popyt na druhasnaje žytło.

Navat kali praz uzrosły popyt zabudoŭščyki padymuć ceny, a žytło na druhasnym rynku zastaniecca na raniejšym uzroŭni ci navat stanie krychu tańniejšym, faktar «chalaŭnaha» kredytu pad 1% budzie schilać častku da kupli novabudu.

Pavialičyć

Šturšok dla ekanomiki

U dziaržaŭnych maštabach heta moža dać dadatkovy šturšok dla budaŭničaha siektara, što budzie pazityŭna adbivacca na tym ža VUP.

Praŭda, budaŭnictva žytła — heta nie toj siektar, jaki moža doŭha prynosić stabilny rost ekanomicy. Urešcie rešt va ŭmovach skaračeńnia nasielnictva vialikija abjomy budaŭnictva mohuć pryvieści da taho, što jaho budzie zašmat. Tym bolš, što i ciapier chapaje kvater, jakija prosta stajać z hołymi ścienami hadami i navat dziesiacihodździami.

• 1
• 0
• 2
• 2
• 1
• 0
• 0
• 0